Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Жаңа қаулы: Астана оқушылары төртінші тоқсанда қалай оқиды

2021 жылдың 10 сәуір 2021 03:00

НҰР-СҰЛТАН. ҚазАқпарат - Нұр-Сұлтан қаласының бас санитария дәрігері Сархат Бейсенованың жаңа қаулысы шықты, деп хабарлайды ҚазАқпарат.

Шаһардағы эпидемиологиялық ахуалды реттеуге бағытталған жаңа құжатта негізінен IV тоқсандағы білім беру форматына бірқатар өзгерістер енгізілген,

Атап айтқанда білім объектілерінде оқытуды ұйымдастыру тәртібі былай белгіленген:

- 19 сәуірден бастап ата-аналардың өтініші бойынша оқушы саны 300-ге дейін, сыныптағы бала саны 10 адамнан аспайтын қалалық мектептерде балалар дәстүрлі форматта оқиды.

- білім объектілерінің жұмысын қашықтан оқыту тәртібінде ұйымдастыру көзделген. Мұнда тек мектеп бітіруші сынып (9, 11 (12) сыныптар) оқушыларының ата-ана өтініші бойынша мектепке барып оқуына рұқсат етілген. Олар сабақты аралас форматта (пәндердің 70% - дәстүрлі форматта, 30% - қашықтан) оқиды. Сыныпта 15 адамнан артық болмауы керек.

Білім объектілерінің жұмысы Денсаулық сақтау министрінің 2020 жылғы 28 тамыздағы №ҚР ДСМ-98/2020 бұйрығының 10-тарауын сақтай отырып рұқсат етіледі.

Білім объектілерінде COVID-19 жағдайы тіркелген кезде объектіні карантинге жабу осы қаулының №1 қосымшасына сәйкес жүргізіледі.

Жоғары оқу орындары мен колледждердің бірінші курс студенттерін қашықтан оқыту жалғасады.

Білім мекемелерінде сабақтан тыс уақытта оқушылардың жеке оқуын ұйымдастыруға тыйым салынады.

Меншік нысанына қарамастан, мектепке дейінгі ұйымдарда кезекші топтардың жұмысын әр топта 15 баладан артық емес етіп толтырып ұйымдастыруға рұқсат етілген. Жаңа кезекші топтарды ашуға тыйым салынады.

Қаулының толық мәтінімен мына сілтемеде танысуға болады.

Бас санитардың жаңа қаулысы 12 сәуір күні сағат 00.00 бастап күшіне енеді.

Бұған дейін хабарлағанымыздай, елордада вакцина салатын пунктілер, соның ішінде сауда, ойын-сауық орталықтарындағы егу кабинеттері сағат 00.00-ге дейін жұмыс істейтін болады.



Жоғары қарай