Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Волейбол: Өскеменнің «Алтайы» Қазақстан кубогының жеңімпазы атанды

2021 жылдың 27 қазан 2021 17:47

НҰР-СҰЛТАН. ҚазАқпарат – Бүгін Өскемен қаласында волейболдан әйелдер командалары арасында Қазақстан кубогының ойындары мәреге жетті, деп хабарлайды ҚазАқпарат тілшісі.

Финалдық матчта ел чемпионы – Өскеменнің «Алтайы» мен күміс жүлдегер – Талдықорғанның «Жетісу» командасы бас жүлдені сарапқа салды.

Соңғы кезде чемпиондық атақ үшін өзара таласып жүрген қос команда құрамында жаңа маусым алдында бірқатар өзгерістер болды.

«Алтайды» бұрынғыша сербиялық маман Марко Гршич жаттықтырса, «Жетісу» тізгінін белгілі қазақстандық волейболшы Елена Павлова алды.

Алғашқы екі партияда Қазақстан ұлттық құрамасының капитаны, Орал волейболының түлегі Сана Анарқұлова бастаған өскемендіктер 25:22, 25:16 есебімен басым түсті. Алайда бұдан кейін талдықорғандықтар қатарынан екі партияны алып, таразы басын теңестірді. Әсіресе, олардың қатарында ресейлік Валерия Шатунова сияқты волейболшылар нәтижелі ойынымен көзге түсті. Дегенмен соңғы сетте «Алтай» 15:11 есебімен жеңісті жұлып алып, бесінші рет ел кубогының иегері атанды. Қос команданың либеролары, өскемендік Мәдина Бекет пен талдықорғандық Томирис Сағынбаева да қорғаныста сәтті ойнай білді.

Енді «Алтай» мен «Жетісу» 29 қазан күні Өскеменде суперкубок үшін қайта алаңға шығатын болады.

Еске сала кетейік, бұдан бұрын «Алтайдың» бесінші рет ел чемпионы атанғанын жазған болатынбыз.




Автор Елжан Ералы
Басты сөздер: Спорт,
Жоғары қарай