Ауа райы
Астана 8 °С
Алматы 14 °С
валюта бағамы
USD 412.55
EUR 468.66
RUB 5.79
CNY 58.80

Түркістанда әжетхана күзетпегені үшін полиция ұстап әкеткен мұғалімге министр араша түсті

2019 жылдың 14 желтоқсан 2019 17:29

ТҮРКІСТАН. ҚазАқпарат - Түркістанда әжетхана күзетпегені үшін «жазықты» болған мұғалімге Білім және ғылым министрі Асхат Аймағамбетов араша түсті, деп хабарлайды ҚазАқпарат.

Шымкенттік блогер Айгүл Орынбек Facebook парақшасында Түркістандағы Мағжан Жұмабаев атындағы №15 орта мектептің мұғалімі «әжетхана күзетпегені үшін» ұсталғанын хабарлады.

«Мұғалімдер шырылдап көмек сұрап жазыпты. Мұғалімді «кезекшілікте тұрмадың» деп қолын қайырып алып кеткен», - деп жазды ол.




Ол сондай-ақ №15 мектеп директоры К. Әбдіқадырованың хатын қоса тіркеген. Хатта білім ордасында 31 жылдан бері еңбек етіп келе жатқан ұстаз Бақыт Кеукеновты қалалық ішкі істер басқармасының бастығы, полиция подполковнигі Данияр Мейірхан бастаған бір топ полицей ұстап әкеткені жазылған. Директордың жазуынша, мұғалім аяқ киімінен су өткен соң соны ауыстыру үшін мектеп ғимаратына кірген. Алайда полицейлер мұғалімнің қарсылық көрсеткеніне қарамастан қолын қайырып, бөлімшеге әкетіп қалған. Бұл жағдайды сол жерден өтіп бара жатқан ұстаздар мен оқушылар көрген. Полиция болған оқиға бойынша арнайы хаттама толтырып, айыппұл рәсімдеп, төлеткен.

Кейінірек Бақыт Кеукеновтың видеосы әлеуметтік желіде тарады.

Осыған байланысты бүгін Білім және ғылым министрі Асхат Аймағамбетов ұстазға араша түсті.

«Түркістан қаласындағы №15 мектептің мұғаліміне қатысты орын алған оқиғаға ұқсас жағдайға мүлдем жол берілмеуі тиіс. Білім және ғылым министрлігі тарапынан бұл мұғалімді қорғау бойынша барлық қажетті шаралар қабылданатын болады. Сондай-ақ, аталған оқиғаға қатысы бар адамдарды жауапкершілікке тартуды талап ететін боламыз. Оның ішінде, мектеп әкімшілігі мен білім бөліміне де қатысты. Балалардың қауіпсіздігін қамтамасыз ету - ыңғайлы және қауіпсіз жағдай жасау арқылы жүзеге асырылуы тиіс деп санаймын. Егер осындай фактілер қайталанатын болса, қатаң шаралар қолданылады. Орын алған жағдайдың себептерін жан-жақты түсіну үшін мұғаліммен телефон арқылы сөйлестім. Жағдай менің жеке бақылауымда», - деп жазды Асхат Аймағамбетов.

Жоғары қарай