Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Түркістан облысында тойханалар спорт кешеніне айналуда

2022 жылдың 12 ақпан 2022 22:02

ТҮРКІСТАН. ҚазАқпарат - Түркістан облысында тойханалар спорт орталықтарына айналуда, деп хабарлайды ҚазАқпарат тілшісі.

Арыс қаласында тойхана иелері кәсіптік бағытын ауыстырып, қызметін басқа салаға бейімдеп жатыр.

Қуантарлығы, оның бірі мүмкіндігі шектеулі жандарға арналған әлеуметтік салаға бағытталса, енді бірі жастарды олимпиадалық спорт түрлеріне дайындайтын орталыққа айналуда.

Мәселен, Арыс қаласының іргесінде орналасқан Ақдала ауылдық округінде бұрынғы 500 орындық салтанат сарайы 1200 баланы қабылдауға қауқарлы спорттық бағыттағы ғимарат болып ауысқалы жатыр.

Санаулы күннен кейін іске қосылатын спорт орталығында бокс, дзюдо, қазақ күресі мен би үйірмесі жұмыс істейтін болады.




Жасөспірімдердің тегін жаттығатын орталығына тәжірибелі мамандар жан-жақтан арнайы шақыртылған.

Жастардың шынығып, шымыр болуына жағдай жасаған жас кәсіпкер Әлібек Құралбек «табыстан гөрі туған жерді түлетуге құмарттым» дейді.

Жалпы бүгінде Арыс қаласында орналасқан 18 тойхана бар болса, қазіргі кезде соның 5-еуі нысаналы мақсатын ауыстырып, әлеуметтік бағытта ел игілігіне қызмет етуде.

Бұл игілікті іске ұйытқы болған кәсіпкерлер мемлекеттік бағдарламаның арқасында қаржыландырылады.




Сондықтан тұрғындар үшін барлығы тегін.

Тек ғимаратты өз ақшасына сұранысқа сай жабдықтап, талапқа сай бейімдеуі керек.

Айта кетейік, Арыста бұған дейін де бір тойхана «Тең қоғам» әлеуметтік орталығы болып бейімделген болатын.




Мұнда мүмкіндігі шектеулі азаматтар үшін бос уақытын тиімді үйлестіруге жағдай жасалған.

Аптасына бес күн жұмыс істейтін нысанда үстел теннисі, жаттығу залы мен ой-өрісті дамытуға арналған түрлі жабдықтар қойылған.

Тіпті, тәжирибелі маманның массажы мен кітапханасы да бар.

Мұнда қызметке қабылданған жұмысшылар да мүмкіндігі шектеулі жандардан құралған.










































Жоғары қарай