Ауа райы
Астана -25 °С
Алматы -7 °С
валюта бағамы
USD 421.58
EUR 496.83
RUB 5.53
CNY 62.20

Түркістан облысында алғаш рет мүгедектікке шығу деңгейі  18%-ға төмендеді

2020 жылдың 2 желтоқсан 2020 17:31

ТҮРКІСТАН.ҚазАқпарат - Түркістан облысында алғаш рет мүгедектікке шығу деңгейі 18%-ға төмендеді. Бұл туралы ҚР Премьер-Министрі Асқар Маминнің төрағалық етуімен өткен Үкімет отырысында Түркістан облысының әкімі Өмірзақ Шөкеев мәлімдеді, деп хабарлайды ҚазАқпарат тілшісі.

Мүмкіндігі шектеулі жандарды әлеуметтік қорғау мәселелері қаралған отырыста аймақ басшысы осы бағытта атқарылып жатқан жұмыстар барысын баяндады.

«Түркістан облысында 94 500 мүмкіндігі шектеулі азамат тұрады. Бұл облыс халқының 5%-ын құрайды. Мүмкіндігі шектеулі азаматтарды оңалту шараларымен қамтамасыз ету үшін бюджеттің барлық көздерінен бөлінген қаржы 22%-ға ұлғайып, 2020 жылы 4,8 млрд теңгеге жеткен. Нәтижесінде, 34 мыңнан астам адам немесе қажеттіліктің 74%-ы оңалтудың техникалық құралдарымен және әлеуметтік қызметтерімен қамтылатын болады»,- деді Өмірзақ Шөкеев.

Облыс әкімі сондай-ақ, өңірде мүгедектерге арналған заманауи оңалту орталығын құру қажеттілігі туындап отырғанын атап өтті. Бүгінгі таңға мүгедектерге арналған сыйымдылығы 50 орындық 6 әлеуметтік нысанның және 200 орындық оңалту орталығының құрылысын жүргізуге жобалау-сметалық құжаттамалары әзірленген. Құрылыс жұмыстары 2024 жылға дейін кезең-кезеңімен жүргізілетін болады. Оның ішінде 50 орындық 3 нысанның құрылысы бизнестің әлеуметтік жауапкершілігі аясында жүргізу жоспарланған.

«Ұлттық жоспардың маңызды бағыты мүмкіндігі шектеулі азаматтарға қолжетімді орта құру. Осы бағытта облыста бейімделуге жататын 2 895 нысанның 98%-ы сәйкестендірілген. Осы бағыттағы жұмыстарды жалғастыру үшін басқарма және қоғамдық ұйымдар тарапынан мониторинг жүргізіліп, қолжетімді ортаны одан ары арттыру бойынша тиісті іс-шаралар атқарылуда. Биылғы жылы пилоттық режимде бастама алған «Әлеуметтік қызметтер порталы» мүмкіндігі шектеулі азаматтар үшін 2021 жылы толық іске асырылады», - деді облыс әкімі.

Айта кетейік, бүгінгі күнге мүгедектігі бар азаматтардың 94%-ы электрондық-цифрлық қолтаңба алған. Бұл 42 мыңға жуық мүгедектігі бар азаматтарға оңалту шараларын сапалы және делдалсыз еркін таңдауға тиісінше, толық мүмкіндік береді. Өңірдегі ерекше білім беруді қажет ететін балалардың 48%-ы (17 272 бала) инклюзивті және арнайы біліммен оқытылуда. Мүгедектіктің алдын-алу мақсатында анықтау, профилактикалық және емдеу шараларын жүргізу нәтижесінде 2019 жылмен салыстырғанда алғаш рет мүгедектікке шығу деңгейі 18%-ға төмендеді.


Жоғары қарай