Ауа райы
Астана 6 °С
Алматы -1 °С
валюта бағамы
USD 421.58
EUR 496.83
RUB 5.53
CNY 62.20

Төтенше жағдай режимі: Кәсіпкерлер мүлік салығынан босатылуы мүмкін

2020 жылдың 19 наурыз 2020 20:18

НҰР-СҰЛТАН. ҚазАқпарат – Қазақстанда кәсіпкерлік субъектілерін мүлік салығынан босату мәселесі қарастырылып жатыр. Бұл туралы «Атамекен» ҰКП кәсіпкерлерді құқықтық қорғау департаментінің директоры Шыңғыс Темір айтып берді, деп хабарлайды ҚазАқпарат тілшісі.

«Жалға беруші жалдау ақысын талап еткенде жалға алушы оны төлей алмайды. Қазір оның қызмет түріне тыйым салынса, онда бұл жағдайдан шығудың бірнеше жолы бар. Егер осы мерзімдегі жалдау ақысын тоқтатуға келісе алмасаңыз, төлемді кейінге қалдыру әдісін қарастыра аласыз», - деді Ш. Темір онлайн-брифингте.

Сонымен бірге, «Атамекен» ҰКП Үкіметпен бірлесіп, жалға берушілер үшін қаржылық міндеттемелердің кейбір түрлерін жеңілдету нұсқаларын қарастыруда.

«Жалға беру де бизнес болып саналады, жалға берушінің несие және салық сынды өз міндеттемелері бар. Осыған байланысты біз бизнесті салықтан босатуды ұсынып отырмыз. Яғни, салық төлеушілердің белгілі бір санатын белгілі бір салық түрлерінен босатуды ұсынамыз. Қазіргі уақытта кәсіпкерлік субъектілерін, кәсіпкерлер мен заңды тұлғаларды мүлік салығын төлеуден босату мәселесі пысықталуда. Осылайша қиындыққа тап болған кәсіпкерлерге көмектескіміз келеді», - деді Шыңғыс Темір.

Бұған дейін палата өкілі қазақстандық кәсіпкерлерге форс-мажор жағдайын растайтын анықтаманың тегін берілетінін мәлімдеген еді.

Сондай-ақ «Атамекен» ҰКП төтенше жағдайдың жариялануынан зардап шеккен кәсіпкерлер туралы баяндады.


Жоғары қарай