Ауа райы
Астана 25 °С
Алматы 27 °С
валюта бағамы
USD 409.98
EUR 462.21
RUB 5.75
CNY 58.43

Токио Олимпиадасының қашан өтетіні белгілі болды

2020 жылдың 30 наурыз 2020 19:11

НҰР-СҰЛТАН. ҚазАқпарат – Токио Олимпиадасы келесі жылдың 23 шілдесі мен 8 тамызы аралығында өтеді, деп хабарлайды ҚазАқпарат тілшісі Ұлттық олимпиада комитетіне сілтеме жасап.

Осылайша Халықаралық олимпиада комитеті, Халықаралық паралимпиада комитеті, Токио-2020 ойындарын ұйымдастыру комитеті, сондай-ақ, Токио қаласы мен Жапония билігі Олимпиада ойындары өтетін жаңа мерзімді бекітті.

Бүгін телефон арқылы өткен жиынға ХОК президенті Томас Бах, Токио-2020 президенті Мори Йоширо, Токио губернаторы Коике Юрико, Олимпиада және Паралимпиада ойындарының министрі Хасимито Сейко қатысты.

Жаңа шешімді қабылдау барысында тараптар 2020 жылдың 17 наурызында ХОК атқарушы комитеті бекіткен негізгі үш қағиданы ұстанды. 1. Спортшылар мен барлық қатысушылардың денсаулығын сақтау, сонымен қатар, COVID-19 індетінің тежелуін қолдау; 2. Спортшылар мен олимпиадалық спорт түрлерінің ұстанымын қорғау; 3. Ғаламдағы халықаралық спорт күнтізбесі.

Жиын барысында жазғы спорт түрлеріндегі барлық халықаралық федерациялар мен ұлттық олимпиада комитеттері қабылданған шешімді қолдады.

Айта кетелік, 24 наурыз күні әлемде COVID-19 індетінің таралуына байланысты Жапония билігі мен ХОК бірлесе отырып, Олимпиада ойындарын келесі жылға қалдыру туралы шешім қабылдаған еді.

Осылайша, жаңадан бекітілген мерзімге сәйкес Токио Олимпиадасы 2021 жылдың 23 шілдесі мен 8 тамызы аралығында өтеді. Паралимпиада ойындары 24 тамыз бен 5 қыркүйек аралығында ұйымдастырылады.

Еске сала кетейік, бұдан бұрын Олимпиада ойындары келесі жылға қалғанын жазған болатынбыз.




Жоғары қарай