Ауа райы
Астана -4 °С
Алматы 8 °С
валюта бағамы
USD 421.58
EUR 496.83
RUB 5.53
CNY 62.20

Степногорскіде ПХД-қалдықтарын утилизациялау зауыты болмайды – Экология министрлігі

2020 жылдың 3 тамыз 2020 13:30

НҰР-СҰЛТАН. ҚазАқпарат - Степногорск қаласында құрамында полихлордифенил бар (ПХД) қалдықтарды утилизациялау зауыты салынбайды.

Бұл туралы бүгін Степногорск қаласының экология мәселелеріне арналған бейнеконференция барысында Экология, геология және табиғи ресурстар вице-министрі Ахметжан Пірімқұлов мәлімдеді.

Қазіргі заманғы қондырғыны орналастыру үшін өңірден тыс баламалы учаске айқындалатын болады.

Конференцияға 40-тан астам адам қатысты, олар Степногорск қаласының басшысы Еркебұлан Баяхметов, «Жасыл даму» АҚ басшылығы, Қазақстанның экологиялық ұйымдары қауымдастығы, тұрақты органикалық ластағыштармен жұмыс жөніндегі сарапшылар, қоғам қайраткерлері және Степногорск қаласының бастамашыл тобының өкілі Вячеслав Черепков.

Қатысушылар ПХД-қалдықтарды сақтау мәселесіне ерекше назар аударды. Оған тәуелсіз сарапшы Әмина Бейбітованың қорытындысы ұсынылды.

«Қалдықтар халықаралық актілер мен Ұлттық экологиялық заңнаманың талаптарына сәйкес қайта оралған, қаптама материалы БҰҰ талаптарына сәйкес сертификатталған және таңбаланған, сондай-ақ тасымалдау, қайта тиеу және сақтау кезінде ағып кету мен зақымдануды (коррозияны) болдырмайды»,- делінген сарапшының қорытындысында.

Сарапшылар «Эколюкс-АС» ЖШС қоймасындағы ПХД - қалдықтар қаптамасының қорғалу деңгейі халықаралық актілермен белгіленген қажетті талаптардан бірнеше есе асып түскенін атап өтті.

Министрлік өкілдері «Эколюкс-АС» ЖШС қоймаларын қарап, бейнеконференция барысында: «ПХД сақтау шарттары заңнаманың барлық талаптарына сәйкес келеді және қоршаған орта мен халықтың денсаулығына қауіп төндірмейді», - деп түйіндеді.

Өз кезегінде, министрлік «Қазгидромет» РМК мамандарының ПХД-қалдықтарды уақытша сақтау қоймасы аумағындағы ауа мен топырақ сапасына тұрақты мониторинг жүргізу мәселесін қарастыруда.

«ҚР Экология, геология және табиғи ресурстар министрлігі Степногорск қаласындағы жағдайды бақылауда ұстайды және осы өңірдегі өзекті экологиялық мәселелерді талқылау бойынша бірқатар кездесулер өткізуге ниетті»,-делінген министрліктің хабарламасында.


Жоғары қарай