СҚО-ның 400 полицейі заңсыз мигранттарға рейд ұйымдастырды
ПЕТРОПАВЛ. ҚазАқпарат - Солтүстік Қазақстан облысында 400 полицей елде заңсыз жүрген мигранттарды анықтау мақсатында рейд өткізді, деп хабарлайды ҚазАқпарат облыстық ІІД-нің баспасөз қызметіне сілтеме жасап.
Үш күннің ішінде СҚО-да көші-қон заңнамасын бұзудың 354 фактісі анықталды. Соттардың қаулысымен 15 шетелдік Қазақстан аумағынан аластатылды. Олардың үшеуі елде болу ережесін бір жылдың ішінде екінші рет бұзып отыр. Операция барысында іздеуде болған 2 қылмыскер анықталды. Жеке тұлғасын анықтау мақсатында 12 адам қабылдау-тарату орындарына жеткізілді. 87 шетелдік азаматқа қатысты елде болу мерзімін қысқарту туралы шешім қабылданды.
Ағымдағы жылдың 11 айында облыстың ішкі істер органдарында 20700-ден астам шетелдік азамат тіркелді. Шетелдіктердің жеке тұлғаларда еңбек етуіне рұқсат қағаздары 2171 азаматқа берілді. Көші-қон заңнамасын бұзғаны үшін 3140 шетелдік жауапқа тартылды.
