Ауа райы
Астана 27 °С
Алматы 31 °С
валюта бағамы
USD 405.66
EUR 454.70
RUB 5.71
CNY 57.43

Шымкентте екі айда 20 мыңға жуық адам коронавирусты анықтайтын тестілеуден өткен

2020 жылдың 26 мамыр 2020 06:29

ШЫМКЕНТ. ҚазАқпарат – Шымкентте төтенше жағдай жарияланған күннен бастап 2 миллионнан астам маска шығарылған. Кәсіпкерлер сондай-ақ, 88 тонна дезинфекциялық зат пен 166 мыңнан астам спрей сатқан, деп хабарлайды ҚазАқпарат тілшісі.

Қала әкімі Мұрат Әйтеновтың айтуынша, мегаполисте инфекцияның тез таралуына жол бермеу мақсатында әкімшілік тарапынан бірнеше маңызды шара қабылданған. Жұқпалы аурулар ауруханасында коронавирусқа арналған төсек-орын 300-ден 450-ге көбейтіліп, 320 төсек-орындық провизорлық стационар мен 1 416 карантиндік орын ашылған.

«Covid-19 жұқтырған азаматтарды уақытылы анықтау мақсатында лабораториялық тестен өткізу шаралары күшейтілді. Қаладағы Ұлттық зерттеу орталығының филиалынан бөлек, қосымша 3 лаборатория ашылды. Нәтижесінде күніне тестілеу қуаты 300-ден 500-ге жеткізілді. Сонымен қатар, жаңадан 2 зертхана ашылып, тестілеуді 3 есеге дейін ұлғайтамыз. Сәуір-мамыр айларында жоспарлы тестілеуден өтетін 23 мың адамның 19 845-і, яғни 86% ПТР тестілеуден өткізілді»,-деді әкім.

Айта кетейік, қалада індетпен күресу мақсатында 30 мыңнан астам медицина маманы мен полиция және әскери қызметкер жұмылдырылған. 25 мамырдағы жағдай бойынша қалада коронавирус жұқтырған азаматтар саны 606-ға жеткен. Оның ішінде 218 науқас емделіп шықса, 6 адам қайтыс болған.

«Қалада 18-24 мамыр аралығында күніне орташа 31-50 адамнан тіркелді. Ал өткен тәулікте жүргізілген лабораториялық зерттеу 36 жаңа жағдайды анықтады. Тәуліктегі өсім - 6,3%. Covid-19 вирусының 22-сі - сырттан келгендер болса, 359 адам науқастармен қарым-қатынаста болған. Ал, 225-і жергілікті жерден шыққан. Қалада 260 карантиндік ошақ тіркелген. Бүгінгі күні 132–сі бақылауда»,-деді Мұрат Әйтенов.

Соңғы күндердегі эпидемиологиялық жағдайға байланысты санитарлық тексеру күшейтіліп, 4 136 нысанда мониторинг жүргізілген. Тексеру қорытындысымен 127 әкімшілік шара қолданылған.


Жоғары қарай