Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

QazaqGeography тарихи-мәдени және табиғи мұраны сақтауға бағытталған жоспарын таныстырды

2021 жылдың 9 қараша 2021 19:18

НҰР-СҰЛТАН. ҚазАқпарат - QazaqGeography республикалық қоғамдық бірлестігі тарихи-мәдени және табиғи мұраны сақтау идеясын одан әрі дамытуға арналған жаңа ұсыныстарын таныстырды, деп хабарлайды ҚазАқпарат.

Президент Әкімшілігі Басшысының бірінші орынбасары Дәурен Абаевтың төрағалығымен өткен медиакеңесте ұйымдастырушылар бірлестіктің жаңа жоспарын назарға ұсынды. Бұл жоспарда Бірлестікті география және соған сабақтас – табиғатты қорғау, экотуризмді дамыту салалары бойынша жетекші сараптау ұйымына айналдыру көзделген.

Медиакеңеске ҚР Ақпарат және қоғамдық даму министрі Аида Балаева, «QazaqGeography» РҚБ Басқарма төрағасы Орман Нұрбаев, республикалық БАҚ басшылары қатысты.




«Қоршаған ортаға және рекреациялық ресурстарға ұқыпты қарау – Мемлекет басшысы саясатының маңызды құрамдас бөліктерінің бірі. Осы тұрғыда Қазақстанның тарихи-мәдени мұрасын, бірегей табиғи капиталын сақтау мен дамытуға бағытталған жаңа ұстанымдарға ерекше назар аудару қажет. «QazaqGeography» бірегей әрі танымал бренд ретінде осы өзгерістерді жүзеге асыру ісінде зор әлеуетке ие», – деп атап өтті Дәурен Абаев.

«QazaqGeography» мақсатының бірі – қоршаған ортаны қорғау, отандастарымызға ата-бабамыздан қалған ұлт игілігі, бай мұрасына ерекше қамқорлық көрсетуді дәріптеу. «QazaqGeography» бірлестігінің жобалары қоршаған ортаны сақтауға, қоғамда тарих, география, мәдениет, өлкетану, экологиялық туризм салалары бойынша ағарту жұмыстарын жүргізуге бағытталған.

«QazaqGeography» РҚБ Басқарма төрағасы Орман Нұрбаев кездесу барысында: «Біз қазақстандықтарды QazaqGeography қауымдастығының мүшесі болуға шақырамыз. Күш-жігерімізді біріктіре отырып, еліміздің жаңа тарихи және табиғи дестинацияларын ашуға және қолданыстағыларын кеңінен тануға, қоғамның географиялық білімін жетілдіруге, экологияны жақсартуға ықпал ете аламыз», – деді.

Медиакеңес аясында «QazaqGeography» РҚБ мен республикалық БАҚ басшылары ынтымақтастық жөніндегі меморандумға қол қойылды.

QazaqGeography қызметі мен бірлестікке мүше болу жайлы толығырақ ақпаратты qazaqgeography.kz сайтынан алуға болады, сондай-ақ+7 (7172) 999-336 (ішкі. 1014/1033), +7 705 760 29 50 нөмірлеріне хабарласа аласыз.











Жоғары қарай