Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Психиканың бұзылуын емдеуге болады – дәрігер

2021 жылдың 12 қазан 2021 12:44

АЛМАТЫ. ҚазАқпарат - Халыққа психикалық көмек көрсету қолжетімді бола түсті. Бұл туралы ҚР Денсаулық сақтау министрлігінің Республикалық психикалық денсаулық ғылыми-практикалық орталығы бас директорының міндетін атқарушы Қуаныш Алтынбеков Өңірлік коммуникациялар алаңында өткен брифингіде мәлім етті, деп хабарлайды ҚазАқпарат тілшісі.

10 қазан – Халықаралық психикалық денсаулық күні.

Биыл Дүниежүзілік психикалық денсаулық күні «Психикалық денсаулық туралы қамқорлық барлығына: оны шындыққа айналдырайық» ұранымен атап өтіледі.

Қуаныш Алтынбековтың айтуынша, елімізде 17 аймақтық психикалық денсаулық орталығы, қалалық емханалардың құрылымында 82 алғашқы психикалық денсаулық орталығы, аудандық деңгейде 201 психикалық денсаулық бөлмесі қызмет етеді.

«2018 жылға дейін психиатр дәрігерлердің қабылдауы тек психиатриялық ұйымдарда жүзеге асырылатын. 2021 жылдың 9 айында алғашқы психикалық денсаулық орталықтары мен психикалық денсаулық бөлмелеріне көмекке 297 464 адам жүгінді. Көріп отырғанымыздай, халыққа көрсетілетін көмек бұрынғыдан қолжетімді бола түсті. Бұл, психикалық денсаулық саласында науқасқа бағдарланған көмек көрсету үлгісін жетілдірудің арқасы», - деді ол.

Сонымен қатар ол психикалық денсаулық орталықтарында психикалық ауытқуы бар адамдарға 735 төсек-орынға арналған 16 күндізгі стационар жұмыс істейтінін айтты.

Балаларға көмек көрсетуді қолжетімді етуге үлкен көңіл бөлініп отыр.

«Соңғы жылда 65 төсек-орынға лайықталған балаларға арналған 3 күндізгі стационар бөлімшесі құрылды. Қарағанды облысы мен Шымкент қаласында ауысымына 20 жүгінуді қамтитын балаларға арналған екі медициналық-әлеуметтік оңалту бөлімшесі ашылды. Оған қоса денсаулық сақтау ұйымдарында балалар психиатрларының саны артты. Бұл көрсеткіш 2017 жылғы 65-тен 2020 жылы 97-ге дейін жетті», - деді спикер.

Қуаныш Алтынбеков психикалық денсаулықты байыпты қабылдау қажет екенін атап өтті.

«Психиканың бұзылуын емдеуге болады және бұл күрделі: мұнда дәрі-дәрмектер, терапия, физикалық белсенділік және тағы басқалар бар», - деді ол.

Дәрігерлік кадрлар бойынша 2021 жылы 124 психиатр дәрігер резидентураны аяқтап, денсаулық сақтау ұйымдарында жұмыс істеуге кіріскен.





Жоғары қарай