Ауа райы
Астана -1 °С
Алматы -3 °С
валюта бағамы
USD 421.58
EUR 496.83
RUB 5.53
CNY 62.20

Премьер-лига: «Қайрат» тең түсіп, «Астана» жеңіске жетті

2020 жылдың 27 қыркүйек 2020 20:12

АЛМАТЫ. ҚазАқпарат - Бүгін футболдан Премьер-лига командалары арасындағы Қазақстан чемпионатының он бірінші турында екі ойын өтті, деп хабарлайды ҚазАқпарат тілшісі.

Алғашқы ойын Алматының «Қайраты» мен Көкшетаудың «Оқжетпес» командасы арасында болды. Бұл кездесуде барлығы 6 гол соғылды. Алдымен 6-шы минутта «Оқжетпес» ойыншысы Пламен Димов есеп ашты. Оған алматылық Небойша Косович 28, 38-минуттарда екі голмен жауап қайырды.

Ойынның екінші кезеңінің 46, 57-минуттарында көкшетаулық команда сапынан Артем Дмитриев мергендік танытты. Ал 73-минутта «Қайраттың» шабуылшысы Вагнер Лав таразы басын теңестірді. Кездесу 3:3 есебімен тең аяқталды.

Ал елордалық «Астана» мен Талдықорғанның «Жетісу» командалары арасында тартысты ойын өрбіді. Елордалық клуб сапынан Жарко Томашевич 39, 65-минуттарда қарсыластар қақпасынан саңылау тапты. Ал 77-минутта «Астана» сапынан Абзал Бейсебеков есепті ұлғайта түсті. Ойында елордалықтар 3:0 есебімен жеңіске жетті.

Бұл ойыннан кейін турнир кестесінде «Қайрат» пен «Астана» арасындағы ұпай айырмашылығы төрт ұпайға қысқарды. Қазір «Қайратта» - 25, «Астанада» - 21 ұпай бар.

Сондай-ақ, аталған турда 26 қыркүйекте Жамбыл облысының «Таразы» мен Қостанайдың «Тобылы» арасындағы кездесуде жеңімпаз анықталған жоқ. Командалар 0:0 есебімен тең тарқасты.

Аталған турда 29 қыркүйекте «Шахтер» мен «Каспий», «Қызылжар» мен «Қайсар» командалары кездеседі.

Автор Әділжан Үмбет
Басты сөздер: Спорт,
Жоғары қарай