Ауа райы
Астана -9 °С
Алматы -8 °С
валюта бағамы
USD 421.58
EUR 496.83
RUB 5.53
CNY 62.20

Нұртөре Жүсіп кітап пен қолжазбаны цифрландырудағы кемшіліктерді айтты

2020 жылдың 26 қараша 2020 12:09

НҰР-СҰЛТАН. ҚазАқпарат - Қазіргі кезде елімізде кітапханалардағы кітаптарды және архивтердегі құжаттар мен жазбаларды сақтау, цифрландыру ісінде айтарлықтай олқылықтар бар. Сенатор Нұртөре Жүсіп Премьер-Министрдің орынбасары Ералы Тоғжановтың атына жолдаған депутаттық сауалында осы мәселені көтерді, деп хабарлайды ҚазАқпарат тілшісі.

Сенатордың айтуынша, бүгінде отандық кітапханалар мен мұрағаттарда құжаттар мен жазбаларды сақтау ісіне жеткілікті көңіл бөлінбейді. Тіпті елордадағы Ұлттық архивке қарасты Қолжазбалар мен сирек кітаптар ұлттық орталығында қолжазбалар мен сирек кітаптар сақтайтын жер өте тар.

«Қор көбейген сайын, ғимаратқа сыймай барады. Орталықтың ғимараты еуропалық талаптарға мүлдем сай емес. Оның үстіне, көрермендерге арнап дайындаған көрмесі де кішкентай. Сондықтан кітап қоры көбейген сайын орталықта ғылыми сараптамалық топты ұлғайту керек», – деді Нұртөре Жүсіп.

Сауал барысында сенатор елімізде реставрация саласын жетілдіру, осы бағытта маман даярлау, аймақтардағы архивтердің жағдайын жақсарту мәселелеріне де назар аударды.

Сонымен қатар ол кітаптар мен құжаттарды цифрландыру ісі көңіл көншітпейтінін айтты.

«Көпшілігінің сапасы нашар және оқылуы қиын. Облыстардағы кей архивтердің сайты да жоқ. Шет елдердегідей архив құжаттарымен онлайн танысу мүмкін емес. Бізде совет кезінен қатып қалған көптеген тыйымдар бар. Соның бірі – көшірмелер жасауға тыйым салу», – деген депутат соның салдарынан пандемия кезінде еліміздегі ғылыми жұмыстар айтарлықтай зардап шеккенін жеткізді.

Сенатор бұл мәселелерді Мәдениет және спорт министрлігі мен Білім және ғылым министрлігі бірлесе қолға алып, жетілдіру керектігін тілге тиек етті. Сондай-ақ, елімізде қолжазбалар, сирек кітаптар, басқа да құнды құжаттарды цифрландырып, олардың қолжетімділігін қамтамасыз ету және халықтың қажетіне жарату қажет екенін атап өтті.


Жоғары қарай