Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Мәнерлеп сырғанаушы Элизабет Тұрсынбаева бапкерлікке бет бұрды

2021 жылдың 30 қыркүйек 2021 22:02

ҚЫЗЫЛОРДА. ҚазАқпарат - Мәнерлеп сырғанаудан әлем чемпионатының күміс жүлдегері Элизабет Тұрсынбаева Қызылорда қаласында бапкерлік қызметін бастады, деп хабарлайды ҚазАқпарат тілшісі.

Элизабет Тұрсынбаева 2000 жылы дүниеге келген. Бұған дейін әлем чемпионатының күміс жүлдегері атанса, еліміздің үш дүркін чемпионы болды. Оған қоса жасөспірімдер қысқы олимпиадасының қола жүлдесіне қол созды.

Жақында ол әлеуметтік желіде өзінің спорттағы мансабын аяқтағаны туралы хабарлаған болатын. Ол Қызылорда қаласында журналистерге бұл жөнінде ресми мәлімдеме жасады.

«Мен кішкентай кезімнен мәнерлеп сырғанаудың шебері болуды қаладым. Сол жолда барымды салдым. Үлкен жетістіктерге де қол жеткіздім. Бұл орайда мені қолдаған азаматтар аз болған жоқ. Өкініштісі, денсаулығыма байланысты спорттық мансабымды ерте аяқтауға тура келді. Мұндай шешім қабылдау мен үшін ауыр соқты. Алда талай жақсы жаңалықтар көп болады деген үміттемін. Мені қолдаған баршаңызға алғыс айтамын», - деді Элизабет Тұрсынбаева

Сондай-ақ брифингіде Элизабет Тұрсынбаеваның әкесі және жеке бапкері Байтақ Тұрсынбаев бұл шешімге байланысты өз пікірімен бөлісті.

«Элизабет мәнерлеп сырғанау спортына 2005 жылы келді. Сегіз жасында көптеген жарыстарға қатысты. Сондай-ақ, Қазақстан құрамасында өнер көрсетті. Осы аралықта Элизабет үлкен жетістіктерге жетті. Алға қойған мақсатымыз өте көп еді. Қысқы олимпиадаға қатысуды жоспарлаған едік. Дегенмен денсаулығы сыр берді. Ойласа келе осындай шешімге келдік. Әрине мұндай шешім шығармас бұрын көп ойландық. Бірақ ұзақ уақыт бойы арқа жарақатынан толық айыға алмады. Элизабеттің барша жанкүйерлеріне тек алғыс айтамыз», - деді Байтақ Тұрсынбаев.

Автор Әділжан Үмбет
Басты сөздер: Спорт, Қызылорда облысы,
Жоғары қарай