Ауа райы
Астана 1 °С
Алматы 1 °С
валюта бағамы
USD 421.58
EUR 496.83
RUB 5.53
CNY 62.20

Қарағандыда мүмкіндігі шектеулі балаларға арналған тегін спорт секциялары ашылды

2020 жылдың 25 қыркүйек 2020 07:36

ҚАРАҒАНДЫ. ҚазАқпарат - Қарағанды «Тең мүмкіндіктер әлемі» қоғамдық қоры іске асырып жатқан «Саламатты болашақ» әлеуметтік жобасына қосылды, деп хабарлайды ҚазАқпарат.

Аталмыш жоба аясында ерекше балалар спортпен тегін айналыса алады. Адаптивті таэквондо мен жүзу, инклюзивті хореография секциялары ашылды. Бочче бойынша жаттығулар өткізіледі – бұл Қазақстандағы жаңа паралимпиадалық спорт түрі.

Жобаның тұсаукесері балалар мен жасөспірімдер сарайында өтті. Ынтымақтастық туралы меморандумға Қарағанды облысы әкімінің орынбасары Абзал Нүкенов және «Тең мүмкіндіктер әлемі» ҚҚ директоры Нұргүл Үлжекова қол қойды.

- Біз бірлесе жұмыс істейміз және балаларға өзін-өзі танытып, тілектерін орындауға және өз арманына жетуге көмектесеміз. Бұл жоба ерекше балаларды әлеуметтендіруге көбірек мүмкіндік береді, - деді Абзал Нүкенов.

Бұл күні Бочче және бейімделгіш жүзу бойынша ашық жаттығулар өтті.

Қарағандыдағы жоба үйлестірушісі Гаухар Әкіжанованың айтуынша, бағдарламаға қатысу үшін топтар қазірдің өзінде құрылып қойған, бірақ резерв болуы мүмкін.

Бочче секциясы №27 жалпы білім беретін мектепте және тірек-қимыл аппараты бұзылған балаларға арналған облыстық мектеп-интернатта жұмыс істейтін болады. Адаптивті таэквондо секциясы облыстық таэквондо WTF Федерациясының қатысуымен ұйымдастырылған. Инклюзивті хореография сабақтары Достық үйінде өткізіледі.

- Ерекше қажеттіліктері бар балалар үшін қозғалыс белсенділігі маңызды. Бұл, ең алдымен, аз қимылдауға байланысты қайталама асқынулардың алдын алу болып табылады. Бейімделгіш спортпен жүйелі түрде айналысу арқылы балалардың дене және қарым-қатынас қабілеттері жақсарады, - деп атап өтті Нұргүл Үлжекова. - Біз Қарағанды облысы әкімдігінің қызығушылық танытып, қолдау көрсеткеніне қуаныштымыз.

Қор жаттықтырушыларды оқыту, еңбекақы төлеу, әдістемелік сүйемелдеу және арнайы спорттық құралдармен жарақтандыру жөніндегі шығыстарды өз мойнына алады.

- Менің ұлым үш жасынан бастап жүзумен айналысады. Бочче секциясына жазылды. Мен мұндай ойын туралы бұрын білмедім. Интернетте оқыдым, маған ұнады. Бұл мүгедектер арбасына таңылған балалар үшін өте қолайлы. Қарым-қатынас жасаудың қосымша мүмкіндіктері, - деп бөлісті 6 жасар ерекше баланың анасы Татьяна Соковых.

«Саламатты болашақ» жобасы 2017 жылдан бастап жұмыс істейді. Елордада бастау алып, географиясын біртіндеп кеңейтуде. Қазір Нұр-Сұлтан, Павлодар, Шымкент және Қарағанды облыстарында спорттық секциялар жұмыс істейді.

Жоба жергілікті атқарушы органдармен ынтымақтастықта жүзеге асырылады. Бас серіктес – Samruk-Kazyna Trust әлеуметтік жобаларды дамыту қоры. Әлеуметтік серіктестер – Nur Otan партиясы («Кедергісіз келешек - Будущее без барьеров» жобасы аясында) және Batyl Jureq қайырымдылық қоры.

Жобаға қатысу туралы сұрақтармен келесі телефон нөмірі арқылы хабарласып, білуге болады: +7-700-022-12-43.


Жоғары қарай