Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Индустрия министрлігі баспана бағасын төмендету бойынша шаралар қабылдауда

2022 жылдың 23 мамыр 2022 18:35

НҰР-СҰЛТАН. ҚазАқпарат - Индустрия және инфрақұрылымдық даму министрлігі құрылыс материалдары бағасына мониторинг жүргізуде, деп хабарлайды ҚазАқпарат.

«Тұрғын үй құрылысының өзіндік құны құрылыс материалдарының бағасына тікелей тәуелді екендігі белгілі. Бұл орайдағы оның үлес салмағы 60 пайызға дейін. Қазіргі таңда бағаның төмендеуі байқалады. Мәселен, арматура бағасы 6 пайызға, газ блогы 3 пайызға, шыны 17,6 пайызға кеміген. Ресейлік құрылыс материалдары бағасындағы демпингке орай жақын мерзімде нарықтағы бағаның түсуі болжануда. Құрылысқа қажетті негізгі материалдардың құнына мемлекет тарапынан тұрақты түрде мониторинг жасалуда. Талдама нәтижесі әр тоқсан сайын монополияға қарсы органға берілуде. Бұл жұмыспен «Қазақ құрылыс және сәулет ғылыми-зерттеу және жобалау институты» АҚ айналысуда. Егер де өндірушілер мен жеткізушілер бағаны негізсіз көтергені анықталса, тиісті монополиға қарсы шаралар қолданылатын болады», - делінген министрлік хабарламасында.

Мемлекеттік инвестиция есебінен тұрғызылған тұрғын үй (1 шаршы метрі 160-240 мың теңге аралығында) мен әлеуметтік нысандар (құрылыстың шекті құны) бағасын реттеу және тұрғын үйді бекітілген бағамен сату шартымен жеке құрылыс салушының нысандарына инженерлік-коммуникациялық инфрақұрылымды жүргізу (1 шаршы метрі 220-260 мың теңге аралығында) бойынша бірқатар шаралар қолға алынуда.

Жалпы алғанда, Мемлекет жылжымайтын мүлік нарығындағы бағаға бақылау жүргізбейді. Басты себеп – аталған нарықтағы баға сұраныс пен тұрғындардың ұсынысына орай өздігінен реттеледі. Баспана құны көптеген факторларға байланысты қалыптасады. Атап айтқанда, бұған жер учаскесінің құны, инфрақұрылым, инженерлік жүйелер, нысанның орналасқан жері, тұрғындар арасындағы сұраныс пен құрылыстың өзіндік құны кіреді.

Тұрғын үй бағасын төмендету мақсатында отандық өндірушілердің, соның ішінде үй құрылысы комбинаттарының өнімдерін пайдалану міндеттелген.

Сонымен қатар аталған өнімдер қолданылған типтік тұрғын үйлер жобасы да даярлануда.

Өз кезегінде типтік жобаларды кеңінен қолдау – жобалауға жұмсалатын шығын көлемін едәуір азайтады. Бұл баспана құрылысының өзіндік құнын кемітуге де серпін бермек.


Жоғары қарай