Ауа райы
Астана 2 °С
Алматы 11 °С
валюта бағамы
USD 421.58
EUR 496.83
RUB 5.53
CNY 62.20

Футбол: «Ақжайық» ел чемпионатын жеңіспен бастады

2020 жылдың 16 қыркүйек 2020 22:02

ОРАЛ. ҚазАқпарат – Бірінші лигада ойнайтын Оралдың «Ақжайығы» біріншілікті жеңіспен бастады, деп хабарлайды ҚазАқпарат тілшісі.

Биыл коронавирус індетіне байланысты кейінге шегерілген бірінші лига екі конференцияға бөлініп, 15 қыркүйекте ғана басталды.

Екінші конференцияға түскен оралдықтар Талғарда алғашқы ойынын СДЮСШОР №8 клубымен өткізді.

Өткен жылы екінші лига жеңімпазы атанған елордалық команда оңай шағылатын жаңғақ еместігін көрсетті. Тек 77-минутта қорғаушы Асхат Ермекұлы өз қақпасына гол соғып алды. Есеп – 1:0, «Ақжайықтың» пайдасында.

Оралдық бапкер Артур Авакянц жаттықтыратын батысқазақстандықтар келесі бәсекесін 21 қыркүйекте «Жетісу-2» (Талдықорған) командасымен өткізеді.

Екінші конференцияда сондай-ақ «Атырау», «Қайрат-Жастар», «Академия Оңтүстік», «Шахтер-Болат» ойыншылары бақ сынайды.

«Ақжайық» футбол клубының директоры Азамат Шайхының айтуынша, биыл да оралдықтар премьер-лигаға оралу үшін барын салады. Басты қарсылас – легионерлермен, өзге де белді футболшылармен жасақталған «Атырау» командасы.

«Ақжайық» биыл негізінен жергілікті ойыншыларға үміт артып отыр. Бәрін де алдағы матчтар көрсетеді», деді ҚазАқпарат тілшісіне А.Шайхы.

Еске сала кетейік, бұдан бұрын бірінші лига ойындары басталғанын жазған болатынбыз.


Жоғары қарай