Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Дайын металл өнімдері Ресейден қымбат бағамен импортталуда - министрлік

2022 жылдың 12 мамыр 2022 14:52

НҰР-СҰЛТАН. ҚазАқпарат – Ресейден дайын металл өнімдері қымбат бағамен импортталуда. Бұл туралы ҚР ИИДМ Индустриялық даму комитеті төрағасының орынбасары Тұрар Жолмағамбетов мәлім етті, деп хабарлайды ҚазАқпарат тілшісі.

«ТМД елдері арасында тұрғын үй құрылысы қарқыны бойынша Қазақстан көшбасшылардың қатарында. Ол үшін құрылыс материалдары ауқымды көлемде керек болатыны түсінікті. Еліміздегі құрылыс нысандарына керек арматураның жартысын отандық өндірістер қамтамасыз етеді. Қалғанын бірнеше елден, оның ішінде елеулі көлемін Ресейден импортаймыз. Осы орайда экспортқа уақытша тыйым салу қадамы есебінен, отандық өндірістерді шикізатпен қамтамасыз ету мүмкіндігі бар», - Т. Жолмағамбетов Орталық коммуникациялар қызметінде.

Оның айтуынша, металл қалдықтарының шығарылуын шектей отырып, шикізатты өңдеу, ішкі нарықты қажетті өніммен қамтамасыз ету мақсаты қойылып отыр. 2021 жылы Қазақстаннан Ресейге 124 млрд теңгеге 754 мың тонна қара металл сынықтары пен қалдықтары шығарылды. Бір тоннаның орташа бағасы 165 мың теңге. Биыл Ресейден Қазақстанға 260 млрд теңгеге шамамен 700 мың тонна құрылыс арматурасы импортталды. Бір тоннаның орташа бағасы 375 мың теңге. Сонымен қатар бағасы тоннасына 1 млн теңгеге дейін жететін швеллерді, құбыр мен басқа да дайын өнім импортталады.

«Өзіміздің шикізатты барынша көбірек өңдеп, одан дайын өнімдерді шығаруымыз керек. Осы орайда ішкі нарықты қамтамасыз ету мен дайын заттарды экспортауға мүмкіндік болады», - деді ведомство өкілі.

Бұдан бұрын хабарланғандай, ел аумағынан қара және түсті металдардың сынықтары мен қалдықтарын шығаруға уақытша тыйым салынды.


Жоғары қарай