Ауа райы
Астана 28 °С
Алматы 29 °С
валюта бағамы
USD 411.66
EUR 465.92
RUB 5.81
CNY 58.79

БҚО-да Ресейден келген жамбылдық жұмысшыдан коронавирус табылды

2020 жылдың 21 мамыр 2020 10:14

ОРАЛ. ҚазАқпарат – Батыс Қазақстан облысында Ресейден келген жамбылдық жұмысшыдан коронавирус анықталды, деп хабарлайды ҚазАқпарат тілшісі.

БҚО әкімдігі мәлім еткендей, көрші елде жұмыс істейтін Жамбыл облысының тұрғыны Ресеймен шектесетін «Сырым» автоөткелінен өткен кезде денсаулығына шағымы болмаған.

Алгоритмге сәйкес санитарлық-карантиндік бекет эпидемиологтары жедел жәрдем шақырып, карантиндік стационарға жатқызылған.

Сонымен қатар бұрын ауырғандармен қарым-қатынаста болған облыстағы 10 тұрғыннан зертханалық сынама алынған кезде олардың індетке шалдыққаны анықталды.

Коронавирус жұқтырған тағы бір адам – профилактикалық мақсатта зертханалық сынама алынған медицина қызметкері. Енді бірі – Атырау облысының Теңіз кен орнында жұмыс істейтін өңір тұрғыны. Дене қызуы көтерілгеннен кейін ол провизорлық стационарға түскен.

ПТР диагностикалық зерттеу қорытындысымен барлық 13 адамда COVID-19 диагнозы расталып, облыстық жұқпалы аурулар ауруханасына жатқызылды.

Науқастармен байланыста болғандар бақылауға алынып, ауру ошақтарында дезинфекциялық жұмыстар жүргізілді.

Осылайша БҚО-да ауырғандар саны 352-ге жетіп, соның 189-ы жазылып шықты.

Еске сала кетейік, бұдан бұрын БҚО-да ауруханаға жүгінген ауыл тұрғынынан коронавирус табылғанын жазған болатынбыз.

Жоғары қарай