Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Bek Air әуе компаниясына тиесілі тоғыз Fokker-100 ұшағының қызметі тоқтатылды

2020 жылдың 10 қаңтар 2020 17:08

НҰР-СҰЛТАН. ҚазАқпарат – Алматыдағы әуе апатына байланысты Bek Air әуе компаниясына тиесілі тоғыз Fokker-100 ұшағының қызметі тоқтатылды. Бұл туралы ОКҚ-да өткен баспасөз мәслихатында ҚР Индустрия және инфрақұрылымдық даму вице-министрі Берік Камалиев мәлім етті, деп хабарлайды ҚазАқпарат тілшісі.

«Қазақстан Президентінің тапсырмасы бойынша қазір тұрақты түрде жолаушылар тасымалын жүргізіп жатқан отандық әуе компаниялардың бәрі тексеріліп жатыр. Атап айтқанда, әуе кемелерінің ұшу жарамдылығы, қауіпсіздік талаптарына сәйкестігі, ұшу ережелерін сақтауы, авиациялық персоналды дайындауы секілді талаптардың бәрі тексерілуде», - деді Берік Камалиев ОКҚ-да өткен баспасөз мәслихатында.

Вице-министр Алматыдағы әуе апатына байланысты Bek Air әуе компаниясының жұмысы тоқтатылғанын айтып өтті.

«Bek Air әуе компаниясына тиесілі тоғыз Fokker-100 ұшағының қызметі мен жылдық жарамдылығы жайлы сертификаты тоқтатылды. Қазақстанның авиациялық әкімшілігі қазір британдық және еуропалық азаматтық авиация агенттіктері өкілдерінің қатысуымен Bek Air әуе компаниясын тексеріп жатыр. Тексеру қорытындысына сай, әуе компаниясының ары қарайғы жұмысы туралы шешім қабылданады. Жақын арада тексеру қорытындысын жариялаймыз», - деді ол.

Еске сала кетсек, бұған дейін ҚР Премьер-Министрінің орынбасары Роман Скляр BekAir ұшағының апатқа ұшырау себебінің басты нұсқасын атаған болатын.


Фото: 1.bp.blogspot.com


Жоғары қарай