Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Бас прокуратура заңнамаға енгізілетін түзетулердің тағы бір пакетін әзірлейді

2022 жылдың 19 мамыр 2022 18:52

НҰР-СҰЛТАН. ҚазАқпарат – Президент Қасым-Жомарт Тоқаев Бас прокуратураға 2021 жылдан бергі кәсіпкерлік нысандарды тексеру құжаттарына талдау жасауды тапсырды, деп хабарлайды ҚазАқпарат тілшісі.

«Бас прокуратураға 2021 жылдан бергі осы сипаттағы істерді қарастыру керек. Оның үстіне кәсіпкерлерді қылмыстық қудалаудың негізділігіне ұдайы талдау жүргізіп отыру қажет. Оның мәліметі тоқсан сайын Президент әкімшілігіне кіргізіліп отырсын», - деді Мемлекет басшысы кәсіпкерлермен кездесуде.

Оның айтуынша, Бас прокуратура құқық қорғау органдары қызметкерлерінің қиялынан туындайтын қылмыстық істерді шұғыл түрде тыюға тиіс.

«Мемлекеттің бизнеске қолайлы жағдай жасау саясатына көлеңке түсірген күш құрылымдары басшыларының жауапкершілігін арттыру шараларын айқындау маңызды. Бас прокуратурадан Жоғарғы сотпен және Үкіметпен бірлесіп заңнамаға нақты түзетулер пакетін ұсынуды сұраймын. Президент әкімшілігі бақылауға алсын», - деді Қасым-Жомарт Тоқаев.

Мемлекет басшысы бизнестің мемлекеттік аудит жүйесіне қатысты проблемаларды үнемі көтеріп келе жатқанын атап өтті.

«Тапсырыс беруші меморгандарға жүргізілген мемлекеттік аудит тексерулерінің қорытындысы кәсіпкерлерді қылмыстық қудалауға негіз болып жатады. Бұл жерде жүйе кәсіпкерлер мемлекеттік аудиттің қорытындысына шағымдана да, негізсіз қылмыстық қудалаудан құтыла да алмайтындай етіп түзілген. Мемлекеттік аудиттің қорытындысына азаматтық тәртіппен шағымдану мүмкіндіктері түгел қолданылып біткенше қылмыстық іс қозғау мүмкін болмайтындай тетік енгізген абзал. Жалпы алғанда Бас прокуратура ұлттық кәсіпкерлер палатасымен және бизнес-омбудсменмен бірге шұғыл түрде қылмыстық және азаматтық-құқықтық саладағы шектеулер тетігін әзірлеуге тиіс. Коммерциялық дау-дамайларды нақты азаматтық-құқықтық тәртіпте реттеуді қамтамасыз ету – аса м аңызды міндет», - деді Президент

Айта кетейік, Қасым-Жомарт Тоқаев Ақордада отандық бизнес өкілдерімен кездесіп жатыр.


Жоғары қарай