Ауа райы
Астана 18 °С
Алматы 24 °С
валюта бағамы
USD 412.55
EUR 468.66
RUB 5.79
CNY 58.80

«Барыс» ҚХЛ-ға қатыса ма – Лига басшысы жауап берді

2020 жылдың 13 шілде 2020 23:48

НҰР-СҰЛТАН. ҚазАқпарат - Елордалық «Барыс» құрлықтық хоккей лигасы тұрақты кезеңіне қатысудан бас тартқан жоқ. Бұл жөнінде Құрлықтық хоккей лигасының басшысы Алексей Морозов мәлім етті, деп хабарлайды ҚазАқпарат тілшісі.

Құрлықтық хоккей лигасының ресми сайтында ҚХЛ президенті А.Морозовпен сұхбат жарияланды. Онда Лига басшысы чемпионатқа дайындық жұмыстарына қатысты ең өзекті сұрақтарға жауап береді.

Сондай-ақ оған: «Қазақстанда пандемияның екінші толқыны басталды. «Барыстың» чемпионатқа қатыса алмай қалу ықтималдығы бар ма?», - деген сұрақ қойылды.

А.Морозовтың айтуынша, Қазақстанда жағдай күрделі болғанымен, клуб чемпионатқа қатысудан бас тартпаған.

«Біз ҚХЛ ойындарына қатысатын командалар орналасқан елдердегі эпидемиологиялық жағдайды қадағалап отырмыз. Рас, Қазақстандағы жағдай күрделі. Дегенмен, «Барыс» чемпионатқа қатысудан бас тартқан жоқ. Жарыстың басталуына бір айдан астам уақыт қалды. Оған дейін Қазақстан коронавирустың екінші толқынын жеңе алады деп ойлаймын. Мүмкін клуб маусым алдындағы дайындық жоспарына өзгеріс енгізуге мәжбүр болар. Мәселен, алғашқы жиын уақытын кейінгі қалдырар. Не дегенмен, «Барыс» маусымаралық негізгі шараларға қатысудан бас тартпайды. Бұл, «Қазақстан Президенті кубогы» дәстүрлі турниріне де қатысты», - деді лига басшысы.

Бұдан бұрын хоккейден Қазақстан чемпионаты 26 тамызда басталатыны хабарланды.


Автор Әділжан Үмбет
Басты сөздер: Спорт,
Жоғары қарай