Ауа райы
Астана 7 °С
Алматы 27 °С
валюта бағамы
USD 399.51
EUR 447.33
RUB 5.78
CNY 56.10

Ауа райының нашарлауынан 4 өңірде Жедел штабтар жұмысын қайта бастады

2020 жылдың 14 ақпан 2020 08:00

НҰР-СҰЛТАН. ҚазАқпарат – Ауа райының нашарлауына байланысты ҚР Ішкі істер министрлігі Төтенше жағдайлар комитетінде және бірнеше өңірде Жедел штабтардың жұмыстары жандандырылды, деп хабарлайды ҚазАқпарат.

«Ауа райының бұзылуына байланысты 13 ақпан күні Төтенше жағдайлар комитетінде және Ақмола, Қарағанды, Павлодар облыстары мен Нұр-Сұлтан қаласында Жедел штабтар жұмыстарын қайта бастады. Сондай-ақ шұғыл желі жұмысын жалғастырып жатқанын еске саламыз», - деді ҚР ІІМ ТЖК-дан.

Мәлім етілгендей, 14 ақпан таңертеңгі сағат 06.00-дегі жағдай бойынша елімізде 40 автотрасса жабық тұр. Оның 12-сі республикалық, 28-і облыстық маңызы бар жолдар.

«Өткен тәулікте 41 адам құтқарылды, оның екеуі – балалар, 30 адам эвакуацияланды. Қар құрсауынан 2 көлік шығарылды. Қазгидромет 14 ақпанға 6 өңірде ескерту жариялады. Осыған байланысты біздің ұсыныстарымызды ескеріп, елді мекендерден тыс жерге шықпауды сұраймыз», - делінген ТЖК хабарламасында.

Айта кетейік, 13 ақпан күні қатты бұрқасын салдарынан елордадан шығатын екі ақылы жолда жаппай жол-көлік апаттары болды.

Оның бірі сағат 15:00-де «Щучинск—Нұр-Сұлтан» автожолында тіркелді. Жолдың Нұр-Сұлтан қаласына қарай 36-шақырымында 20-ға жуық автокөлік соқтығысып қалды.

Ал елордадан Щучинскіге қарай жолдың 37-шақырымында 16 автокөлік өзара соқтығысты. Мұнда 5 адам жарақат алды. Оның ішінде 2 жасар бала да бар.

Үшінші жол-көлік оқиғасы «Нұр-Сұлтан-Теміртау« автожолының 1408-шақырымында сағат 16:00 кезінде болды. Шоқай елді мекенінің маңында 15 көлік соқтығысып қалған. Оның ішінде 3 жүк машинасы, 2 газель, 10 жеңіл көлік бар.



Жоғары қарай