Ауа райы
Астана -5 °С
Алматы 5 °С
валюта бағамы
USD 421.58
EUR 496.83
RUB 5.53
CNY 62.20

Атырауда 385 мас жүргізуші жеті жылға көлік жүргізу құқығынан айрылды

2020 жылдың 16 қыркүйек 2020 19:23

АТЫРАУ. ҚазАқпарат – Атырау облысында жыл басынан бері мас күйде рөлге отырған 433 жүргізушінің 385-і көлік басқару құқығынан айрылды, деп хабарлайды ҚазАқпарат.

Облыстық полиция департаменті баспасөз қызметінің мәліметінше, Атырау қаласы аумағында алкогольді ішімдік ішіп, автокөлік тізгіндеген 433 жүргізуші ұсталып, 385-іне қатысты ҚР Әкімшілк құқық бұзу кодексінің 608-бабымен әкімшілік хаттама толтырылған.

«Мамандандырылған әкімшілік соттың шешімімен бұл жүргізушілер 15-тен 20 тәулікке дейін қамаққа алынып, 7 жыл мерзімге көлік құралын басқару құқығынан айырылды. Сот қаулысымен құқығынан айырылған 47 азаматқа қатысты Атырау қалалық полиция басқармасының анықтау бөлімі ҚР Қылмыстық кодексінің 346-бабы, 1-бөлігімен сотқа дейінгі тергеу жүргізіп жатыр» деп хабарлады департаменттің баспасөз қызметі.

Сондай-ақ, 1-14 қыркүйек аралығында мас күйде көлік басқарған 30 жүргізуші ұсталған.

Олардың арасынан 24 жүргізушіге ҚР Әкімшілік құқық бұзу кодексінің 608-бабымен хаттама толтырылып, 15 тәулікке қамаққа алынған.

Тексеру кезінде 6 жүргізушінің бұдан бұрын көлік басқару құқығынан айырылғаны анықталып, оларға қатысты ҚР Қылмыстық кодексінің 346-бабымен тексеру басталған.


Автор Бек Мұстафа
Басты сөздер: Көлік, Заң, Оқиға, Атырау облысы,
Жоғары қарай