Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Астана Балетте «Леонид Ильич Брежневке қарсы Жарқанат адам» сахналанады

2021 жылдың 28 қазан 2021 19:15

НҰР-СҰЛТАН. ҚазАқпарат – 27-31 қазан күндері ресейлік Кіші Броннаядағы театрдың Қазақстандағы гастролі өтеді, деп хабарлайды ҚазАқпарат тілшісі.

Гастроль аясында «Астана Балет» театрының сахнасында режиссер Саша Денисованың «Леонид Ильич Брежневке қарсы Жарқанат адам» спектаклі көрсетіледі.

«Нұр-Сұлтанға келгенімізге өте қуаныштымыз. Бұл біздің алғашқы халықаралық сапарымыз. Күрделі кезеңде де гастроль өткізіп жатырмыз. Спектакльді ұйымдастырушылар және біздің театрлар Нұр-Сұлтан көрермендерін қуантуға күш-қуат пен мүмкіндік тапты. Театр үшін ең маңызды нәрсе – актерлер мен көрермендер арасындағы байланыс. Онсыз театр өледі. Біз өзіміздің соңғы премьераларымыздың бірі – «Леонид Ильич Брежневке қарсы Жарқанат адам» спектаклін әкелдік. Бұл спектакль алты ай бұрын жарық көрді, ол сыншылар мен көрермендердің оң бағасын алған. Енді нұрсұлтандық көрермендердің де көңілінен шығады деп үміттенеміз», - деді театрдың режиссері әрі көркемдік жетекшісі Константин Богомолов «Астана Балетте» өткен баспасөз мәслихатында.

Спектакль сюжеті Жарқанат адам КСРО-да тоқырау кезеңінде өмір сүрген кеңес азаматы болса, не істер еді деген тақырыптағы фантазияға құрылған. Комикс кейіпкері КСРО-да тұратын қарапайым жазушы Дудочкиннің есімін жамылған. Сырт көзге сылбыр көрінетін ол миллиондаған кеңес азаматының бірі. Ымырт үйіріле Толя Дудочкин қара қанатын жайып, өзі жетілдірген «Жигули» көлігіне мініп, тоқыраудағы Готэм-Град қаласының залымдарын жазалайды. Клеш-джинсы киген кейіпкер – қарапайым кеңес азаматтарының қорғаны. Оқиға барысында ол өзінің ғашығын жолықтырады.

«Спектакльдің өзі бір жағынан ирониямен, лиризммен үйлеседі. Бұл қойылым кейіпкерлері 70-жылдардың аяғы мен 80-жылдардың басындағы заманды көрсетеді. Бұл адамдар, отбасы, сезім, қарым-қатынас туралы қойылым», - дейді К. Богомолов.




«Бұл біздің алғашқы халықаралық турымыз. Театр соңғы екі аптада Ресейдің Омбы қаласына гастрольдік сапармен барды. Бізді Нұр-Сұлтан жылы қарсы алып жатыр. Гастроль әлі де жалғасады және бұл ұзақмерзімді ынтымақтастық болады деп үміттенемін», - Кіші Броннаядағы театрдың директоры Елена Мироненко.

Айта кетейік, Кіші Броннаядағы Театр – 1945 жылдың наурызында негізі қаланған Мәскеу драма театры. Тұңғыш жетекшісі және режиссері Сергей Майоров болған. Броннаядағы Театрдың 74-ші маусымының шымылдығын жаңа көркемдік жетекші – режиссер Константин Богомолов ашты. Ол осы лауазымына 2019 жылдың маусымында тағайындалған еді. Қазіргі кезде театр жас дарынды режиссерлерді шығармашылық ынтымақтастық құруға шақырып, түрлі тың спектакльдер мен жобалар жүзеге асырылуда.








Жоғары қарай