Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

قازاق ەكەنىمدى ءبىلسىن دەپ وزبەك باسشىسىمەن انا تىلىمدە سويلەستىم - وزبەكستانداعى جاس كاسىپكەر

2021 жылдың 21 қыркүйек 2021 15:52

نۇر- سۇلتان. قازاقپارات - وتكەن اپتادا الەۋمەتتىك جەلىدە وزبەكستان پرەزيدەنتى شاۆكات ميرزيەۆتىڭ الدىنا شىعىپ، قازاقشا سويلەگەن قازاق قىزىنىڭ ۆيدەوسى كەڭ تارالىپ كەتتى.

ستۋدەنت كەزىنەن بەرى وزبەكستانداعى ناۋاي وبلىسىندا جەكە كاسىپكەرلىكپەن اينالىساتىن مەرەي امانبايەۆا جاعىمدى پىكىرلەر جازىپ، تولاسسىز تىلەكتەر جولداپ جاتقان كوپشىلىكتەن، اسىرەسە قازاقستان حالقىنان مۇنداي رەاكسيا كۇتپەگەنىن ايتادى. 23 جاسىندا زۋلفيا اتىنداعى مەملەكەتتىك سىيلىقتىڭ يەگەرى اتانىپ، وزبەك باسشىسىنىڭ اتىنان كولىك سىيعا العان قانداسىمىز مەرەيگە حابارلاسىپ، سۇحباتتاسقان ەدىك.

- ستۋدەنت كەزىڭىزدەن كاسىپكەرلىكپەن اينالىسقانىڭىزدى ەستىپ، وسى سالا بويىنشا جوعارى ءبىلىم العان بولار دەپ ويلاسام، ناۋاي مەملەكەتتىك پەداگوگيكالىق ينستيتۋتىندا باستاۋىش سىنىپ مۇعالىمى ماماندىعى بويىنشا وقىپسىز. كاسىپكەرلىككە بەت بۇرۋعا نە تۇرتكى بولدى؟

- بالا كەزىمنەن شارۋاشىلىق جۇرگىزۋگە قاتتى قىزىقتىم. ويتكەنى اكەم كوپ جىل بويى زووتەحنيا سالاسىندا ءبولىم باستىعى بولىپ جۇمىس ىستەپ، ءومىرىن وسى سالاعا ارنادى. 9-سىنىپتى بىتىرگەن سوڭ ناۋايدەگى كوللەدجگە ۆەتەريناريا ماماندىعىنا وقۋعا ءتۇستىم. ونى بىتىرگەن سوڭ اۋىلشارۋاشىلىق ينستيتۋتىنا زووتەحنيكتىڭ وقۋىن وقيمىن دەپ ويلاعانمىن. ءبىراق انام «قىز بالاعا شارۋاشىلىقتى جالعىز جۇرگىزۋ قيىن بولادى. ودان دا مۇعالىمنىڭ وقۋىن وقى. پەداگوگتەرگە ءارقاشان جۇمىس تابىلادى» دەپ اقىلىن ايتتى. ءسويتىپ، ناۋاي مەملەكەتتىك پەداگوگيكالىق ينستيتۋتى باستاۋىش سىنىپ مۇعالىمىن دايارلايتىن فاكۋلتەتتىڭ قازاق بولىمىنە وقۋعا ءتۇستىم.





ديپلوم العان سوڭ، اۋىلداعى مەكتەپتە ءبىر جىل ساباق بەردىم. ءبىراق كاسىپكەرلىككە بەت بۇرعان سوڭ، بۇل جۇمىستى جالعاستىرمادىم. قازىر ءوزىم وقىعان ينستيتۋتتاعى مەنەدجمەنت فاكۋلتەتىنىڭ ماگيستراتۋرا بولىمىندە وقيمىن. نەگىزى، مەن - وزبەكستانداعى ناۋاي وبلىسى نۇراتا اۋدانىنىڭ تۋماسىمىن. بىلە بىلسەڭىز، قازاق حالقىنىڭ بىرلىگىن نىعايتۋعا ۇلكەن ۇلەس قوسقان اتاقتى ءۇش ءبيدىڭ ءبىرى ايتەكە بي وسى جەردە جەرلەنگەن.

جالپى، ناۋاي - قازاقتار كوپ شوعىرلانعان ايماق. مەن وسى ايماققا كىرەتىن ۇشقىرقۇدىق دەگەن قازاق اۋىلىندا ءوسىپ- ءوندىم. ارتىمنان ەرگەن ءتورت ءسىڭلىم، ءبىر باۋىرىم بار. اكەم 2013 -جىلى دۇنيە سالدى. ول كىسى بەتىمىزدى قاقپاي، ەركە قىلىپ ءوسىردى. ول باردا ەش قيىندىق كورمەدىك. اكەم ومىردەن وتكەن سوڭ، ءۇيدىڭ ۇلكەنى بولعاندىقتان، بارلىق جاۋاپكەرشىلىك مەنىڭ موينىما ارتىلاتىنىن ءتۇسىندىم. جالپاق تىلمەن ايتقاندا، باۋىرلارىمدى اش قالدىرماس ءۇشىن انام ەكەۋىمىز ارەكەت ەتىپ، كوپ ەڭبەكتەندىك.

قازىر مەنەن كەيىن تۋعان ءسىڭلىم شەتەلدىك كومپانيادا جۇمىس ىستەيدى. قالعان سىڭلىلەرىم ۋنيۆەرسيتەتتە گرانتتا وقيدى، ال ءىنىم مەكتەپكە بارادى. انام دا ينستيتۋتتا وقيدى. نەگىزى، ول كىسى اۋىلدا مەن اشقان بالاباقشانى باسقارادى. ودان بولەك، شارۋاشىلىققا باس- كوز بولىپ وتىر. ءسىڭلىم دەمەكشى، سىڭلىلەرىمنىڭ ۇلكەنى وزبەكستاندا تىركەۋدەن شىعىپ، قازاقستانعا قونىس اۋدارىپ، الماتىدا ءبىر جىل بويى اعىلشىن تىلىنەن رەپەتيتور بولىپ جۇمىس ىستەدى. انامنىڭ «بارلىعىمىز وزبەكستاندا تۇرامىز، ەلگە بارماي، قاسىمىزدا جۇرە بەرسەڭشى» دەگەنىنە قۇلاق اسپاي، «ول جاقتا اتا- اجەم بار عوي!» دەپ قازاقستاندا قالعىسى كەلدى. «ازاماتتىق الماي قويمايمىن» دەپ ارى- بەرى شاپقىلاپ، قاعازباستىلىقتان قينالىپ، ول تالپىنىسىنان ەشتەڭە ونبەدى. اقىرىندا وزبەكستانعا قايتىپ كەلىپ، قازىر وسىنداعى شەتەلدىك كومپانيادا جۇمىس ىستەيدى.

- «انام دا ينستيتۋتتا وقيدى» دەدىڭىز بە؟ اناڭىز قازىر ءسىز سەكىلدى ستۋدەنت پە؟

- انام كەزىندە تەحنيكۋمدا ەسەپشىنىڭ وقۋىن وقىعان. اكەمنىڭ تابىسى جاقسى بولعاندىقتان، ول كىسى شارۋاشىلىق جۇمىسىنا كوپ كوڭىل بولگەن. انامنىڭ ەكى جىل قاتارىنان وقۋعا تۇسە الماي، ەمتيحانعا دايىندالىپ، قينالىپ جۇرگەنىن كورىپ «وقۋدى نە قىلاسىز؟ ودانشا كاسىبىمىزدى جۇرگىزە بەرسەڭىزشى» دەسەم، «وقۋدىڭ ەرتە- كەشى جوق، ءبىلىمدى جەتىلدىرگەن دۇرىس. مەنىڭ وقىعىم كەلەدى» دەپ تىرمىسىپ- باعىپ، ءۇشىنشى جىلى ناۋاي مەملەكەتتىك پەداگوگيكالىق ينستيتۋتىنىڭ پەداگوگيكا جانە پسيحولوگيا فاكۋلتەتىنىڭ قازاق بولىمىنە وقۋعا ءتۇستى. ءسويتىپ، قازىر 47 جاسىندا 2-كۋرس وقىپ ءجۇر.

- كاسىپكەرلىككە قالاي كەلدىڭىز؟ الدىمەن بالاباقشا اشتىڭىز با الدە مال شارۋاشىلىعىنىڭ ونىمدىلىگىن ارتتىرۋدى كوزدەدىڭىز بە؟ قايسىسىن ءبىرىنشى قولعا الدىڭىز؟

- 2016 -جىلى كوللەدج بىتىرگەلى جۇرگەندە كاسىپكەرلەرگە پايىزسىز نەسيە بەرەتىن ءبىر بايقاۋعا قاتىستىم. انگور ەشكىسىن بۋدانداستىرۋ، ودان الىناتىن ونىمدەردىڭ ساپاسىن ارتتىرۋدى، ءبىر جىلدا قانشا پايدا اكەلەتىنىن ساراپتاپ، بيزنەس- جوسپار ازىرلەگەن ەدىم. ءبىراق وبلىستاعىلار مەنىڭ بۇل باستاماما «سەن ءبىزدى مازاق قىلىپ تۇرسىڭ با؟» دەپ مىرس كۇلىپ، بايقاۋدان وتكىزبەي قويدى. سول كەزدە وزىمە «ءتۇبى وسى جوبانى رەسپۋبليكالىق دەڭگەيدەگى بايقاۋعا الىپ شىعىپ، مۇنىڭ ءتيىمدى ەكەنىن دالەلدەيمىن» دەپ ۋادە بەردىم.

سوسىن سول جىلدىڭ قازان ايىندا «كاسىپكەر قىزدىڭ ەڭ جاقسى جوباسى» دەگەن رەسپۋبليكالىق بايقاۋعا قاتىستىم. ايىم وڭىنان تۋىپ، سول بايقاۋدا ءبىرىنشى ورىندى يەلەندىم. ماراپاتتاۋ كەزىندە وزبەكستانعا بەلگىلى قوعام قايراتكەرى ەلميرا باسيتحانوۆا «مەرەي، ايەل ادامنىڭ قولىنان بارلىعى كەلەدى. بۇل ءىسىڭ ءتىپتى دە ۇيات ەمەس. قولىڭنان كەلسە، قونىشىنان باس! سەن باستىسى توقتاما!» دەپ ارقامنان قاعىپ، جىگەرلەندىرىپ جىبەردى. ول كىسىنىڭ بۇل ايتقانى قيالىما قانات ءبىتىرىپ، تىڭ سەرپىلىس بەردى. ءسويتىپ، 21 جاسىمدا كاسىپكەرلىكپەن اينالىسا باستادىم.

كوپتەگەن جوباعا قاتىسىپ، ءىرى كاسىپتى دوڭگەلەتىپ وتىرعان كاسىپكەرلەرمەن بايلانىس ورناتتىم. ودان بولەك، لاۋازىمدى تۇلعالارمەن كوپ كەزدەستىم. قازىر مينيسترلىكتەگىلەردىڭ بارلىعى مەنى تانيدى (كۇلىپ). ال نەلىكتەن بالاباقشا اشۋ ءىسىن قولعا العانىمدى سۇراساڭىز، وتكەن جىلى پرەزيدەنتتىڭ اۋىلدى جەردە وتباسىلىق بالاباقشا اشقاندارعا قولداۋ كورسەتۋ تۋرالى قاۋلىسى كۇشىنە ەنگەن بولاتىن. ال ءبىزدىڭ اۋىلدا بالاباقشا جوق. كىشكەنتاي بالالار ۇنەمى دالادا ويناپ جۇرەدى، مەكتەپكە دەيىنگى وقىتۋ جانە تاربيەلەۋ ءىسى جۇرگىزىلمەيدى. ونىڭ ۇستىنە، ءۇيىمىزدىڭ اۋماعى ۇلكەن، سول سەبەپتى ءۇيدىڭ قاسىنان بالاباقشا اشقىم كەلدى. وعان قوسا، ۇكىمەت قىزمەتكەرلەرگە جالاقى تولەيدى، قۇرال- جابدىقپەن قامتاماسىز ەتەدى. ءبىزدىڭ مىندەت - جۇمىستى ۇيلەستىرۋ.

قازىر جەكە شارۋاشىلىق پەن بالاباقشادان بولەك، كاسىپكەرلىك جۇرگىزۋ بويىنشا ترەنينگتەر وتكىزەمىن. ناۋاي وبلىسى بويىنشا جاستاردى كاسىپكەرلىك جانە ІТ سالاسىنا بەيىمدەۋ جاۋاپكەرشىلىگى ماعان جۇكتەلگەن بولاتىن. كوماندامدا 8 مىقتى مامان بار، سونىڭ ىشىندە ەكونوميكانى بەس ساۋساعىنداي بىلەتىن پروفەسسورلار بار. سول سەبەپتى قازىر ۋاقىتىمنىڭ كوپ بولىگىن وسى ىسكە جۇمساپ ءجۇرمىن.

- جيىرما ءۇش جاسىڭىزدا وزبەكستانداعى دارىندى قىزدارعا بەرىلەتىن زۋلفيا اتىنداعى مەملەكەتتىك سىيلىقتىڭ يەگەرى اتانىپسىز. بۇل ماراپات تا ومىرىڭىزگە ەرەكشە سەرپىلىس بەرمەي قويمايتىنى انىق.

- البەتتە، بۇل ماراپات ومىرىمە كوپ وزگەرىس اكەلدى. بۇل - قوعامدىق ىستەرگە بەلسەنە ارالاساتىن، ءتۇرلى سالادا ءبىراز جاقسى ناتيجە كورسەتىپ جۇرگەن، 18-30 جاس ارالىعىنداعى قىزدارعا بەرىلەتىن مەملەكەتتىك سىيلىق. ونى پرەزيدەنتتىڭ ءوزى تابىستايدى. مۇنداي ەرەكشە سىيلىققا لايىق دەپ تانىلعان ادامنىڭ سوڭىنان «مۇنى الاتىنداي ونىڭ قانداي جەتىستىگى بار؟ سونشاما نە جۇمىس ىستەدى؟ نەگە الىپ ءجۇر؟» دەگەندەي ءتۇرلى ءسوز ەرەتىنى انىق. سول سىيلىقتى العان سوڭ، «انە، قاراڭىز. مەملەكەتتىك سىيلىقتى يەلەنىپ الىپ، جۇمىس ىستەمەي، بوسقا ءجۇر» دەگەندەي اڭگىمە ايتقىزباس ءۇشىن بۇرىنعىدان بەتەر جانتالاسا جۇمىس ىستەدىم. سونداي- اق تۇرمىسى تومەن وتباسىلارعا كومەك كورسەتۋمەن اينالىستىم. اسىرەسە، پاندەميا كەزىندە قيىندىققا تاپ بولعان جاندارعا قولداۋ كورسەتۋگە تىرىستىم.





ناۋاي وبلىسىنىڭ اكىمى قابىل تۇرسىنوۆتىڭ پرەزيدەنت سىيلاعان كولىكتىڭ كىلتىن تابىستاۋ ساتىنەن

- «وزبەكستان پرەزيدەنتىمەن التى رەت كەزدەستىم» دەيسىز. سوندا پرەزيدەنتپەن وتەتىن كەزدەسۋلەردە ناۋاي وبلىسى بويىنشا جاس كاسىپكەرلەردىڭ اتىنان ءسىز سويلەيسىز بە؟

- ءيا، وزبەكستان پرەزيدەنتى قاتىستاتىن كەزدەسۋلەرگە ءبىزدىڭ وبلىستاعى جاس كاسىپكەرلەردىڭ، سونداي- اق جاستاردىڭ اتىنان قاتىسامىن. پرەزيدەنت مەن كوتەرگەن ماسەلەلەردىڭ بارلىعىنا قولداۋ ءبىلدىردى. جالپى، ءبىزدىڭ پرەزيدەنت جاستارمەن ءجيى كەزدەسكەندى قۇپ كورەدى، ولاردىڭ ىركىلمەستەن ويلارىن اشىق جەتكىزگەنىن ءجون سانايدى. مەيرىمدىلىك تانىتىپ، جاستاردى جاقىن تارتادى.

مىسالى، كەشە تاۋەلسىزدىك كۇنىنە وراي ۇيىمداستىرىلعان كەزدەسۋدە ورتاعا شىعىپ سويلەيمىن دەگەن وي ءتىپتى دە بولعان جوق. شاۆكات ميرزيەۆپەن كەزدەسۋدىڭ سوڭى جىلى جۇزدەسۋگە اينالىپ، سوڭىندا ءوزى «تاعى سويلەيمىن دەۋشىلەر بار ما؟» دەگەن سوڭ، قولىمدى كوتەرىپ، ورتاعا قالاي شىققانىمدى بىلمەي قالدىم. ءتىپتى كولىك سىيلايتىنىن دا بىلگەن جوقپىن. ەرتەڭ وزبەكستان پرەزيدەنتى سايلاۋ الدىندا جاستارمەن تاعى كەزدەسۋ ۇيىمداستىرماق. وزبەكستاندا ءۇشىنشى رەنەسسانس باستالىپ، دەموكراتيالىق وزگەرىستەر بولىپ جاتىر. سوندىقتان ول كىسى جاستارمەن ءجيى كەزدەسىپ تۇرادى. ەسەپتەپ قاراسام، ون بەس كۇندە وزبەك پرەزيدەنتىمەن ءتورت رەت كەزدەسىپپىن.





وزبەك باسشىسى سىيلاعان كولىكتىڭ كىلتىن تابىستاۋ ساتىنەن

- سول كەزدەسۋدە ورتاعا شىققاندا وزبەكستان پرەزيدەنتىمەن الدىمەن قازاقشا سويلەسىپ، كەيىننەن وزبەك تىلىندە سويلەۋگە رۇقسات سۇراعانىڭىزعا كوپشىلىك ءتانتى بولدى. ءتىپتى، شاۆكات ميرزيەۆ سىزبەن سويلەسكەن ءساتى تاسپالانعان ۆيدەونى Facebook-تەگى جەكە پاراقشاسىنا جۇكتەپ قويىپتى. وزبەك پرەزيدەنتىنىڭ الدىندا قازاق تىلىندە سويلەۋدى بۇرىننان ويلاستىرىپ ءجۇرىپ پە ەدىڭىز الدە بۇل سول جەردە توسىننان كەلگەن يدەيا ما؟

- مەن مۇنى بۇرىننان ويلاپ جۇرگەنمىن. «پرەزيدەنتپەن كەزدەسەتىن بولسام، الدىمەن قازاق تىلىندە سويلەيمىن، وسىلايشا ول قازاق ەكەنىمدى ءبىلسىن، سوسىن وزبەكشە جالعاستىرامىن، وزبەك تىلىنە دەگەن قۇرمەتىمدى ءبىلسىن» دەپ ويلاپ جۇرەتىنمىن. نەگىزى، ەرەجە بويىنشا الدىمەن وزبەكشە سويلەپ، سوسىن قازاق تىلىندە سويلەۋگە رۇقسات سۇراۋىم كەرەك ەكەن. ال مەن كەرىسىنشە الدىمەن قازاقشا سويلەپ، كەيىن وزبەكشە سويلەۋگە رۇقسات سۇرادىم، ءبىراق پرەزيدەنت وزبەكشە جالعاستىرۋعا رۇقسات سۇراعانىما قۋانىپ، العىسىن ءبىلدىردى.

مەن ۇنەمى ايتامىن: قازاق پەن وزبەك - ءتۇبى ءبىر، باۋىرلاس ۇلتتار. وزبەكستاننان كەۋدەمىزدى يتەرىپ، ەشكىم كەت دەپ جاتقان جوق. كەرىسىنشە جاعدايىمىزدى جاقسارتۋعا مۇمكىندىك بەرىپ وتىر. ناۋاي وبلىسىنىڭ اكىمى قابىل تۇرسىنوۆ قازاقتاردى كوپ قولدايدى. كاسىپكەر بولعان سوڭ، جولىڭدى كەس- كەستەپ، كۇندەيتىندەر تابىلادى. سونداي تەرىس پيعىلى بار ادامداردىڭ ماعان كەدەرگى كەلتىرۋىنە جول بەرمەي، ءاردايىم دەمەپ جۇرەدى. ول كىسى اسىرەسە دومبىرادا ءان شىرقاعاندى ۇناتادى. اۋىل- ايماقتى ارالاعان كەزدە شوپان قازاقتارمەن بىرگە وتىرىپ، ءان تىڭداپ، شۇيىركەلەسىپ قايتادى. وسىدان- اق ول كىسىنىڭ قازاقتىڭ مادەنيەتىن جوعارى باعالايتىنىن باعامداۋعا بولادى.

ال قازاقستانعا بارۋ نيەتىم تۋرالى سۇراعىڭىز كەلسە، جۋىردا «اتامەكەن» ۇلتتىق كاسىپكەرلەر پالاتاسىنىڭ وكىلدەرى حابارلاسىپ، كەزدەسۋگە شاقىردى. كوماندامنان بەس- التى ماماندى ەرتىپ، قىركۇيەكتىڭ جيىرمالارىنا تامان ەلگە بارۋدى جوسپارلاپ وتىرمىن. جالپى، مەن قازاقستانداعى ماڭىزدى وقيعالاردان حاباردار بولىپ، جاستارعا قانداي قولداۋ كورسەتىلىپ جاتقانىن باقىلاپ وتىرامىن. نەگىزى، ەلگە بارسام، قاسىم- جومارت توقايەۆپەن كەزدەسكىم كەلەدى. ول كىسىگە ايتارىم بار.


- ءبىزدىڭ پرەزيدەنتپەن كەزدەسۋدىڭ ءساتى ءتۇسىپ جاتسا، نە ايتار ەدىڭىز؟

- وزبەكستانداعى قازاقتاردىڭ ول كىسىگە تارتۋ ەتەر سىيلىعى بار. ودان بولەك، كوكەيىمدە ءتۇيىپ جۇرگەن ءبىراز نارسەنى بولىسكىم كەلەدى. مىسالى، قازاقستان جانە وزبەكستانداعى بەلسەندى قازاقتار، اسىرەسە جاستار اراسىندا فورۋم وتكىزىلسە ەكەن دەيمىن. سونىمەن قاتار ەكى ەلدەگى مىقتى كاسىپكەرلەر اراسىندا پىكىر الماسۋلار كوپ بولعانىن قالايمىن. كوپشىلىك الدىندا ايتا المايتىن تاعى باسقا جوبالار بار. جالپى، ول كىسىمەن بەيرەسمي كەزدەسۋدە سۇحباتتاسقىم كەلەدى.

- تاعى ءبىر بايقاعانىم، سول كەزدەسۋدە قازاقشا سويلەگەنىڭىزگە ريزا بولعان قازاقستاندىقتاردىڭ باسىم كوپشىلىگى «قازاق ءتىلىن ۇمىتپاعانىڭىزعا راقمەت!» دەپ پىكىر قالدىرىپ، اقجارما تىلەكتەرىن ءبىلدىرىپ جاتىر. سول ۆيدەو الەۋمەتتىك جەلىدە كەڭىنەن تارالىپ، قازاقستاندىقتار مۇنداي رەاكسيا تانىتادى دەپ كۇتپەگەن بولارسىز، ءسىرا؟

- «قازاق ءتىلىن ۇمىتپاعانىڭىزعا راقمەت» دەگەن پىكىرلەردى مەن دە وقىدىم. ءبىز جاقتا انا ءتىلىمىزدى بىلمەيتىن قازاقتار جەتەرلىك. كوپشىلىك سول سەبەپتەن سۇراپ جاتقان بولار. ال ءبىزدىڭ اۋىلدا وزبەكتەر بىلاي تۇرسىن، تاجىكتەر دە قازاقشا سويلەيدى. ال قازاقستانداعىلار وسىنشالىق رەاكسيا تانىتادى دەپ كۇتپەگەنىم راس. سول كەزدەسۋدىڭ ەرتەسىندە- اق، قازاقستانداعى ب ا ق- تاردىڭ مەن تۋرالى جارىسا جازعانىن بايقادىم. وسىدان سوڭ، «ەگەر مەن مىنا جاقتا قينالىپ قالسام، كومەكتەسەتىندەر بار ەكەن. ارتىمدا ءبىر قاۋىم ەل بار ەكەن عوي» دەگەن وي ءتۇيدىم.





وبلىس اكىمشىلىگىندەگىلەر «پرەزيدەنت سىيلاعان كولىكتىڭ كىلتىن تابىستاعاندا قانداي سەزىمدە بولدىڭىز؟» دەپ سۇرايدى. مەن بولسام «قازاقستانداعىلاردىڭ قالاي قولداپ جاتقانىن كورىپ جاتىرسىزدار عوي. كولىكتىڭ كىلتىن العاندا بۇلاي قۋانباعانمىن مەن» دەپ، قۋانىشىمدى جاسىرا الماي، ماقتان كورىپ ءجۇرمىن. ارادا اپتا وتسە دە، جىلى لەبىزدەر، ىزگى تىلەكتەر لەگى تاۋسىلار ەمەس. وزبەكستانداعى كوپشىلىك قازاقتىلدى سايتتاردى وقيدى ەكەن. ءتىپتى، وبلىس اكىمى «بۇگىن قانشا قارالىم بولدى؟ ال پىكىرلەر سانى قانشا؟» دەپ سۇراپ وتىرادى. سوسىن ول كىسىگە «ەسەپ» رەتىندە سكرينشوتتار جىبەرەمىن (كۇلىپ). وسى رەتتە باسىلىمدارىڭىز ارقىلى مەنى باۋىرىنا تارتىپ، تىلەكشى بولىپ جۇرگەن قازاقستان حالقىنا العىسىمدى جەتكىزگىم كەلەدى. قاي مەملەكەتتە تىنىشتىق بولسا، سول مەملەكەتتە دامۋ بولادى. وزبەكستان مەن قازاقستان حالقىنىڭ ۇيقىسى تىنىش، اسپانى اشىق. لايىم سولاي بولسىن! «قازاق» دەگەن اتىمىز وشپەسىن! «مەن - قازاقپىن!» دەپ ماقتانا ايتاتىن ماقتانىشتارىمىز كوبەيە بەرسىن!

اڭگىمەلەسكەن

ءاليا تىلەۋجان قىزى

https://turkystan.kz /

Басты сөздер: شەتەل قازاقتارى ,
Жоғары қарай