Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

قانى قازاق بالۋاندار ءبىر سالماقتا باق سىناستى

2021 жылдың 2 тамыз 2021 14:47

نۇر- سۇلتان. قازاقپارات - 1- تامىزدا توكيو وليمپياداسىندا كۇرەس تۇرلەرىنەن مەدالدار ساراپقا سالىنعان بولاتىن. گرەك- ريم كۇرەسىنەن 60 كەلىگە دەيىنگى سالماقتا ءۇش بىردەي قازاق جىگىتتەرى توكيو تورىندە ونەر كورسەتتى.

جەڭىس تۇعىرىنان قازاق ۇلتىنىڭ ازاماتىن كورسەك دەپ ۇمىتتەنگەن ەدىك. الايدا بالۋاندارىمىز باسەكەنىڭ العاشقى كۇنى ءسۇرىنىپ، تاريحي ءساتتىڭ كۋاسى بولۋ باقىتى بۇيىرمادى. قازاقستاندىق سپورتشىمىز مەيرامبەك ايناعۇلوۆ جارىستىڭ ءبىرىنشى كەزەڭىندە قىرعىزستاندىق جولامان شارشەنبەكوۆتەن جەڭىلدى. مەيرامبەك ايناعۇلوۆ - كۇرەس تۇرلەرىنەن الەم چەمپيوناتى. 1994 -جىلى 17- اقپاندا دۇنيەگە كەلگەن.

وزبەكستان تۋى استىندا باق سىناعان قانداسىمىز ەلمۇرات تاسمۇراتوۆ ءبىرىنشى بەلدەسۋدە ۋكراينالىق لەنۋر تەميروۆتەن جەڭىلىپ قالدى. ەلمۇرات - ريو وليمپياداسىنىڭ قولا جۇلدەگەرى، ازيانىڭ 5 دۇركىن جەڭىمپازى. قازاق ۇلتىنىڭ تۋماسى 1991 -جىلى 12- جەلتوقساندا دۇنيەگە كەلگەن. ول شىمكەنتتەگى بەكزات ساتتارحانوۆ اتىنداعى سپورت ينتەرناتىنىڭ تۇلەگى. 2008 -جىلى داۋلەت تۇرلىحانوۆ اتىنداعى تۋرنيردە جەڭىلگەننەن كەيىن قازاقستان ۇلتتىق قۇراماسىنا قابىلدانبايدى. وسىلايشا سپورتشى وزبەكستان اتىنان شىعۋدى تاڭداپ، 2010 -جىلى كورشى ەلدىڭ ازاماتتىعىن الدى.

قىتايداعى قانداسىمىز ۋاليحان سەرىكتە وسى سالماقتا جۇلدە ءۇشىن تالاسقا تۇسكەن ەدى. العاشقى اينالىمدا ۋاليحان گەرمانيالىق ەتەن كينزينگەردى جەڭگەن بولاتىن. شيرەك فينالدا جاپون بالۋانى كەنيچيرو فۋميتاعا ەسە جىبەرىپ، جۇباتۋ بەلدەسۋىنە شىعۋعا مۇمكىندىك الدى. بۇل كەزدەسۋدە الجير وكىلى ابەلكاريم فەرگاتتى جەڭدى. وسىلايشا قىتايلىق قانداسىمىز قولا جۇلدە ءۇشىن ۋكراينالىق لەنۋر تەميروۆپەن كۇرەسەدى.

ەسكە سالا كەتەيىك، بەلدەسۋ بۇگىن، 2- تامىز قازاقستان استاناسىنىڭ ۋاقىتىمەن 16:30-دا وتەدى. قىتاي ەلى اتىنان حالىقارالىق جارىستاردا باق سىناپ جۇرگەن بالۋان 1992 - جىلى 3- ناۋرىزدا دۇنيەگە كەلگەن. 2018 -جىلى ۆەنگريانىڭ بۋداپەشت قالاسىندا وتكەن الەم چەمپيوناتىندا 60 كەلىگە دەيىنگى سالماق دارەجەسىندە قولا مەدال جەڭىپ العان.

www.24.kz


Басты сөздер: شەتەل قازاقتارى , سپورت,
Жоғары қарай