Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

كەيكى باتىر تۋرالى ايتىلعان «قۇلاننىڭ اجالى» قانداي سەنزۋرادان وتپەي قالدى؟

2021 жылдың 21 қазан 2021 16:53

نۇر- سۇلتان. قازاقپارات - «قازاق حالقىن اش قاسقىرداي تاقىمداعان وسىناۋ «شولاق بەلسەندىلەر» مەن ولارعا قارسى تۇرعان «بانديتتەر» تاقىرىبى تالانتتى رەجيسسەر امانگەلدى تاجىبايەۆتىڭ ودان كەيىنگى فيلمدەرىنىڭ دە تۇعىرلى تاقىرىبىنا اينالدى.

بولشيەۆيكتەردىڭ باسشىلىعىمەن قازاق حالقىن قان قاقساتقان «شولاق بەلسەندىلەر» قوزعالىسى قازاق حالقىنىڭ باسىنا 30- جىلداردىڭ الاپات اشارشىلىق ويرانىن ورناتتى. ولەر الدىندا قويعا شەيىن تۇياق سەرپىپ ولەتىنى بەلگىلى.

قازاق حالقىنىڭ 20-30 - جىلدارداعى كوتەرىلىسى سول اجال الدىنداعى مومىن حالىقتىڭ ارپالىسى ەدى. تورعاي وڭىرىندەگى قىزىلدارمەن كۇرەسى ا. تاجىبايەۆتىڭ «قۇلاننىڭ اجالى» (ا. نۇرمانوۆ رومانىنىڭ جەلىسىمەن) فيلمىنە ارقاۋ بولدى. بۇل جەردە دە سول باياعى «شولاق بەلسەندىلەر» - تومار، بولجىق. بۇل جەردە دە سول باياعى «بانديتتەر» - قۇلان مەرگەن باستاعان جىگىتتەر. كەيكى باتىر نەمەسە قۇلان مەرگەن بولىپ بۇل تاريحي پولوتنودا الدابەك شالبايەۆ وينايدى. پارتيانىڭ قولشوقپارى قىزىل جاساق باسشىسىن س. بايمۇحانوۆ سومدايدى» دەپ جازادى بەلگىلى جازۋشى سماعۇل ەلۋباي.





سماعۇل اعانىڭ بۇل جازباسىنان كەيىن «قۇلاننىڭ اجالى» فيلمىنە بايلانىستى دەرەكتەر ىزدەي باستادىق. ەشقانداي دەرەك جوق. فيلم نە كورەرمەنگە جەتپەگەن، نە «قازاق فيلمنىڭ» ارحيۆىندە قالىپ قويعان سياقتى. مۇنى ءبىر بىلسە، رەجيسسەر عانا ءبىلۋى كەرەك دەگەن ويمەن امانگەلدى اعاعا ىزدەۋ سالدىق. رەجيسسەر قازىر الماتىنىڭ شەتىندەگى ءبىر اۋىلدا تۇرادى ەكەن. جاسى جەتپىستەن اسىپ كەتكەن. كينو سالاسىمەن قوشتاسقانىنا دا وتىز جىلعا تاياپتى. وسىنشاما ۋاقىت رەجيسسەر نەمەن اينالىستى؟ «قۇلاننىڭ اجالى» فيلمى قايدا؟ ول نەگە تەلەارنادان كورسەتىلمەدى؟ رەجيسسەردى ىزدەگەندەگى ماقساتىمىز دا وسى ەدى.

امانگەلدى تاجىبايەۆ رەداكسياعا ءوزى كەلدى. ەڭسەگەي بويلى، قايراتتى كىسى بولعانى تۇرىنەن كورىنىپ تۇر. ءالى دە ىرىلىگى بايقالادى. بۇل كىسى رەجيسسەر عانا ەمەس، «اقىرعى اماناتتاعى» - سەرىكباي، «سوعىستىڭ سوڭعى جىلى ەدى» فيلمىندەگى - تۇراش قوي.





- ءوزىڭ بىلەسىڭ، مەن رەسەيدىڭ استراحانىنان كەلگەن شالا قازاقپىن عوي، - دەپ باستادى امانگەلدى اعا.

- ەلگە كەلگەننەن كەيىن قازاق بولۋعا شىنداپ كىرىستىم. ابايدان باستاپ، بۇكىل قازاقتىڭ ۇلىلارىنىڭ شىعارمالارىن وقىپ شىقتىم. وقىماعان كىتابىم قالمادى. قازاقتىڭ بولمىسىن، قازاقتىڭ ءتۇر- تۇلعاسىن، مىنەزىن، ادەت- عۇرپىن مەڭگەرۋگە تىرىستىم. سونىڭ ىشىندە ماعان ەرەكشە اسەر قالدىرعان شىعارمانىڭ ءبىرى - اقان نۇرمانوۆتىڭ «قۇلاننىڭ اجالى» رومانى بولاتىن. ءتىلى دە بولەك، ءستيلى دە ەرەكشە جازۋشى ەدى. شىعارمانىڭ ءاربىر كەيىپكەرىن تايعا تاڭبا باسقانداي سۋرەتتەپ شىعارعان ەكەن. كەرەمەت جازۋشى. اقان نۇرمانوۆتىڭ تىرىسىندە نەگە كوزگە ىلىنبەگەنىنە تاڭمىن. ۇكىمەت نەگە ەرەكشە باعالامادى ەكەن دەپ ويلايمىن.





وكىنىشتىسى سول، ول «قۇلاننىڭ اجالىن» بىتىرمەي كەتتى. اقاننىڭ دوستارى قاليحان ىسقاق پەن سايىن مۇراتبەكوۆ روماننىڭ سوڭعى نۇكتەسىن قويعان سەكىلدى. ات ۇستىندە قاسقايىپ ءولىپ كەتكەنىن سۋرەتتەپ جازعان قاليحان بولاتىن. سول روماندى وقىعان ساتتەن باستاپ، جانىمنان ءبىر ەلى تاستاعان جوقپىن. وتكەن عاسىردىڭ 70-جىلدارى قاراعاندى قالاسىندا جۇمىس ىستەپ جۇرگەن كەزىمدە ءبىر ساعاتتىق تەلەسپەكتاكلگە اينالدىردىم. سسەناريىن دايىنداعان دا - ءوزىم. شاعىن ستۋديادا «قۇلاننىڭ اجالىن» تولىعىمەن سىيدىرۋ مۇمكىن ەمەس. «ءاي، بۇل كينوعا اينالاتىن دۇنيە عوي» دەپ ويلاۋشى ەدىم. اقىرىندا ءوزىم دە «قازاق فيلمگە» كەلدىم عوي. 7-8 فيلم تۇسىرگەننەن كەيىن عانا «قۇلاننىڭ اجالىن» تۇسىرۋگە مۇمكىندىك تۋدى. سسەناريدى ورىستىڭ ءبىر جازۋشىسىمەن بىرلەسە وتىرىپ دايىندادىق. وندا اۋمالى- توكپەلى زاماننىڭ باستالعان كەزى بولاتىن. «قازاق فيلم» كينوستۋدياسىنىڭ ءوزى جەكەلەگەن ون التى ستۋدياعا ءبولىنىپ كەتكەن تۇسى. قىسقاسى، نە قارجى جوق، نە تەحنيكا جەتپەيدى. سسەناري بار.

سول جىلدارى باس كوتەرگەن جەكەمەنشىك ستۋديانىڭ بىرىندە «قۇلاننىڭ اجالىن» تۇسىرۋگە تۋرا كەلدى. قارجىسىن دا ءوزىمىز تاپتىق. قانداي فيلم تۇسىرسەم دە، ونىڭ ءبارىن قازاقى تانىممەن تۇسىرۋگە تىرىستىم. ەلدىڭ اتىنان سويلەمەسەك، قوعامنىڭ شىندىعىن ۇلتتىق مىنەزبەن بەينەلەي الماساق، وندا فيلم ءتۇسىرۋدىڭ كەرەگى نە؟ رەجيسسەرلىك كاسىپتىڭ جولىنا قول ارتقاندا، مەندە وسىنداي پرينتسيپتى يدەيا بولدى. زەر سالىپ قاراعان ادام مەنىڭ بۇكىل تۋىندىلارىمنان وسى يدەيانى بايقاعان بولار ەدى. ەلدىڭ اتىن شىعارۋ دەگەن نە؟ سىرتقا ءجۇنىڭدى تىكىرەيتۋ. ياعني، قازاقتىڭ اتىن جۇرتقا تانىتۋ.

- «قۇلاننىڭ اجالى» قاي جىلى ءتۇسىرىلدى؟

- جاڭىلماسام، 1984-85 -جىلدار بولۋى كەرەك. جەكەمەنشىك ستۋديا بولعان سوڭ، نەگە ءتۇسىرىپ جاتسىڭ، نە ءتۇسىرىپ جاتسىڭ دەگەن اڭگىمە بولعان جوق. فيلمدى ءتۇسىرۋىن ءتۇسىرىپ الدىق. دايىن فيلمدى قايدا وتكىزەسىڭ، قالاي وتكىزەسىڭ، ونى جەكەمەنشىك ستۋديانىڭ يەسى شەشەدى. شەتەلدىكتەرگە «قۇلاننىڭ اجالى» ءوتىپ، كورسەتىلىپ جاتقانىن ەستىپ وتىرامىز. ال وزىمىزدە بۇل فيلم كورسەتىلگەن جوق. ويتكەنى ونداي جابىق تاقىرىپتاردى كورسەتۋگە «رۇقسات» جوق ەدى. ۋاقىتىنا سىيماي، قاراجاتقا سىيماي، ءتۇسىرىلىپ قويعان فيلمدى قانسىراتىپ وتىرىپ، قايشىلاۋعا تۋرا كەلدى. ەڭ قۇندى دەگەن تۇستارىن الىپ قالۋعا تىرىستىم. مۇنىڭ ءبارى جانىما قاتتى باتتى. وسى كۇنى قاراپ وتىرسام، «اتتەگەن- اي» دەيتىن تۇستارى بارشىلىق. فيلمنىڭ جاقسى بولۋى نەدەن؟ ماسەلەن، كينودا بىرەۋدى ۇرىپ جىعىپ، ار جاعىن تولىعىمەن كورسەتپەسەڭ، ول كورەرمەننىڭ ساناسىنا سىيماي قالادى. ارەكەتتەن كەيىنگى باعا بەرۋ. ءبىراق قايتەسىڭ، فيلمدى بارىنشا قىسقارتۋ قاجەت بولعان سوڭ، كەيبىر ەپيزودتاردى كەسپەۋگە امال قالمادى.

«قۇلاننىڭ اجالى» عانا ەمەس، «اقىرعى اماناتتىڭ» دا جولى اۋىر بولدى. ونداعى باستى كەيىپكەر - ورازمەرگەن. بىرەۋى - كەيكى، بىرەۋى - ورازمەرگەن. ەكەۋى دە ناعىز ۇلتتىڭ باتىرلارى. «اقىرعى امانات» تۋرالى كەيىن جازىلدى. ءالى ەسىمدە، «اقىرعى اماناتتى» تاللين فەستيۆالىنە جىبەرمەي قويدى. قولىمدا شاقىرتۋ بار، قۇجاتتاردىڭ ءبارى دايىن تۇر. تۋرا سول كەزدە ورتالىق كوميتەتتىڭ يدەولوگيا جونىندەگى ورىنباسارى اۋىسىپ كەتتى. جاڭادان كەلگەن مامانعا مەنىڭ فيلمىم تۋرالى جالعان اقپارات جەتسە كەرەك. سىبىرلاپ ۇلگەرگەن. ەكى كەشتىڭ اراسىندا مەنى كوميتەتكە شاقىرىپ، تۇندەلەتىپ فيلمدى كورسەتۋگە اپاردىق. تاڭەرتەڭ مەنىڭ فيلمىمنىڭ ورنىنا «سىبىرلاعان» ادامنىڭ كينوسى ءوتىپ كەتتى. وتكەنىن قايتەيىك، ول فيلم جۇلدە العان جوق. ەسەسىنە، «اقىرعى اماناتتىڭ» جولىن بايلادى. الايدا ەشكىمگە وكپەم جوق. ءالى كۇنگە «سوعىستىڭ سوڭعى جىلى ەدى»، «وحرانا باستىعى»، «اقىرعى امانات» فيلمدەرى كورسەتىلىپ تۇرادى. فيلمدى كورگەن اعايىندار جان- جاقتان قوڭىراۋ شالىپ، «سەنىڭ فيلمىڭدى كورسەتتى» دەپ ايتقاندا، اجەپتەۋىر ماقتانىپ قالامىن.

- كەيكى باتىر تۋرالى فيلمىڭىز قايدا قالدى؟

- «قۇلاننىڭ اجالى» - جەكەمەنشىك ستۋديانىڭ ءونىمى. ول كەزدە باقتالاستىقتىڭ كۇشەيىپ تۇرعان كەزى. بۇل فيلمگە سەنزۋرانىڭ اسەرى بولدى دەپ ايتا المايمىن. ويتكەنى ءوزىمىز تۇسىردىك. باستىسى، فيلم دايىن. ونىڭ ۇستىنە «امانگەلدى انتي سوۆەتتىك فيلم ءتۇسىردى» دەگەن اقپارات ءبارىنىڭ قۇلاعىنا جەتىپ قويعان. «قۇلاننىڭ اجالىن» كىم ءتۇسىردى؟ امانگەلدى. سول ءۇشىن دە فيلم كورسەتىلمەي قالىپ قويدى.

- بىردە- ءبىر رەت كورسەتىلگەن جوق پا؟

- كورسەتىلمەدى. ءوزىمنىڭ جەكە ارحيۆىمدە تۇر.

- «باستى ءرولدى دوسحان جولجاقسىنوۆ وينادى» دەگەن اقپارات قايدان شىقتى؟

- دوسحان جولجاقسىنوۆ كەيكىنىڭ رولىن ويناعان جوق. ول مەنىڭ باسقا سسەناريىمدە باستى ءرولدى سومدادى. ماسكەۋدە وقىپ جۇرگەنىمدە «باندىنى قۋعان حاميت» دەگەن سسەناري جازىپ اكەلگەم. «قازاق فيلمگە» كەلگەننەن كەيىن باسشىلىق: «امانگەلدى، سەن ءالى جاسسىڭ. ءالى تالاي فيلم ءتۇسىرىپ ۇلگەرەسىڭ. ابدوللا جۇمىسسىز قالىپ قويدى. سسەناريىڭدى ابدوللاعا بەرەيىك» دەدى. «باندىنى قۋعان حاميتتى» ابدوللا قارساقبايەۆ ءتۇسىردى دە، باستى ءرولدى دوسحان جولجاقسىنوۆ وينادى. ابدوللا ەكەۋمىز ەكى رەت وسىلاي الماستىق. قاليحان بەيىمبەت مايليننىڭ اڭگىمەلەرىنىڭ جەلىسىندە «وحرانا باستىعى» دەگەن ءبىر دۇنيە جازىپتى. سۇلباسى بار، سسەناري جوق. ماعان ديپلوم جۇمىسىنا قاجەت. سوندىقتان قاليحاندى قاسىما الىپ، كينونى تۇسىرۋگە كىرىسىپ كەتتىك.

- «وحرانا باستىعىن»، «اقىرعى اماناتتى» «قازاقفيلمدە» تۇسىرگەن جىلدارى «قۇلاننىڭ اجالىن» دا بىرگە تۇسىرۋگە مۇمكىندىك بولمادى ما؟

- «قۇلاننىڭ اجالىنىڭ» ءجونى بولەك. نۇرمانوۆ ونى نەگە قۇلان دەپ اتادى؟ بىرىنشىدەن، قۇلان دەگەن رۋدان. ەكىنشىدەن، قۇلان - قازاقتىڭ دالاسىندا ەركىن جۇزگەن ماقۇلىق ەدى عوي. ەشكىمگە قياناتى جوق، اساۋ، باسىنا قۇرىق سالدىرمايتىن ەرەكشە جانۋار بولاتىن. مىنە، سول قۇلان - قازاقتىڭ ءوزى. قازاق تا - قۇلان سەكىلدى ەركىن حالىق. باسىمىزعا بۇعاۋ سالدىرماي وستىك. قازاق نەگە «مالىم - جانىمنىڭ ساداعاسى، جانىم - ارىمنىڭ ساداعاسى» دەيدى؟ ارىما كىر كەلتىرگەنشە، ولگەنىم ارتىق دەپ سانادى. سونداي ەشكىمگە باس يمەگەن، بۇعاۋ سالدىرماعان قازاقتى بۇعاۋلاۋدىڭ جولىنا كىرىستى. كەيكى - سونداي ەركىن، اساۋ، مىقتى قازاقتاردىڭ ءبىرى بولاتىن. ونى قالاي قولعا ءتۇسىردى؟ وڭاي قولعا تۇسىرە المايتىنىن بىلگەن سوڭ، الداپ اكەلدى. قازاقتى نەگە نامىسىنان ايىرعىسى كەلدى؟ ويتكەنى ولارعا كونبىس، مومىن، باس كوتەرمەيتىن قازاق كەرەك بولدى. سول سەبەپتى دە، اتقا مىنگەندەردىڭ باسىن الدى. قازاقتى باسىنان ايىرسا، رۋحىن سىندىرا الاتىنىنا كوزى جەتتى. اقان قۇلان دەپ اتاعانىندا، قازاقتىڭ ەركىندىگىن، مىنەزىن مەڭزەسە كەرەك. ونداي فيلمدى جەكەمەنشىك ستۋديا بولماسا، «قازاقفيلم» ول كەزدە تۇسىرمەيتىنى انىق ەدى.

- كەيكىنىڭ رولىنە الدابەك شالبايەۆتى قايدان تاپتىڭىز؟

- فيلمگە اكتەر تاڭداۋ وڭاي بولعان جوق. اسىرەسە، كەيكىنىڭ بەينەسىن سومداۋ كەز كەلگەن اكتەردىڭ قولىنان كەلەتىن دۇنيە ەمەس. سوندىقتان كەيكىنىڭ رولىنە كەلەتىن ادامدى كوپ ىزدەدىك. ءسويتىپ ءجۇرىپ تالدىقورعاننان الدابەك شالبايەۆ دەگەن جىگىتتى تاپتىق. كينو مەن تەاتردان حابارى جوق، ارنايى اكتەرلىك ءبىلىمى جوق ازامات. شارۋاشىلىقتىڭ ادامى. ءبىراق كەلبەتى، بولمىسى بار. قابىلەتى بولەك. ءجۇرىس- تۇرىسى، تۇلعاسى، كوزقاراسى باتىر ادامعا كەلىپ تۇر. ونى ويناتۋدىڭ دا قاجەتى جوق. ءوزى- اق ويناپ تۇر. شىن مانىندە، ادام تانۋدا قاتەلەسپەگەن ەكەنمىن. الدابەك ناعىز كەيكىنىڭ وبرازىن جاسادى. بۇل جاعىنان ۇتتىم دەپ ويلايمىن. قاسىمدا تانىس اكتەرلەر دە جەتەرلىك بولاتىن. «قۇلاننىڭ اجالىن» تۇسىرۋدەگى ماقساتىم - وسىنداي مىقتى قازاقتاردان ايىرىلىپ قالعانىمىزدى كورسەتۋ ەدى. قۇلان - كەيكىنىڭ تاعدىرى عانا ەمەس. ول - بارشا قازاقتىڭ تراگەدياسى بولاتىن.

- فيلم 1984-85 - جىلدارى ءتۇسىرىلدى دەلىك، سوندا 31 جىل بويى ءسىزدىڭ جەكە ارحيۆىڭىزدە جاتىر ما؟ «قازاق فيلم» بۇل فيلمنىڭ كورسەتىلۋىنە نەگە مۇددەلى بولمادى؟

- جەكەمەنشىك ستۋديا تۇسىرگەن سوڭ، وعان «قازاقفيلمنىڭ» قاتىسى بولعان جوق. ستۋديانىڭ باسشىسى ماكسيم سماعۇلوۆ ول فيلمدى كينوستۋدياعا وتكىزدى مە، جوق پا، ول جاعىنان حابارسىزبىن. ال ءوزىمنىڭ باسشىلىققا اسا جۇعىمىم بولعان جوق. ويتكەنى اكەم ماعان «بەل بەرگەن بۇگىلمەيتىن، باس بەرگەن ەشبىر جانعا يىلمەيتىن».

- «قۇلاننىڭ اجالىنان» كەيىن ەشقانداي كينو تۇسىرمەدىڭىز بە؟

- بۇل فيلمنەن كەيىن «قازاقفيلمنەن» مۇلدەم قول ءۇزىپ كەتتىم.

- كينونى تاستاعان سوڭ نەمەن اينالىستىڭىز؟

- بالا- شاعانى اسىراۋ ءۇشىن ىستەمەگەن جۇمىسىم قالمادى. كوللەدجدە ساباق بەرگەن كەزدەرىم دە بولدى.

- «قازاقفيلم» قايتا ىزدەۋ سالمادى ما؟

- كينوفەستيۆالدەرگە ءجيى شاقىرادى. فەستيۆالدە ءادىلقازى بولۋعا دا شاقىرعان كەزدەرى بولعان. ءبىراق ەشقايسىسىنا بارمادىم. مەنىڭ ەڭ جامان قاسيەتىم، كوڭىلىم قالعان جەرگە قايتا جولاعىم كەلمەيدى. ولجاس سۇلەيمەنوۆتىڭ ەكى سسەناريى بويىنشا فيلم ءتۇسىردىم. ونىڭ بىرەۋى - «اقىرعى امانات»، ەكىنشىسى - «سوعىستىڭ سوڭعى جىلى ەدى». ودان كەيىن دە ولجاس حابارلاسىپ، ماحامبەت تۋرالى فيلم تۇسىرۋگە شاقىردى. سسەناريى كوڭىلىمنەن شىقپادى. سول ءۇشىن كەلىسىم بەرمەدىم.

وسىلايشا، «قۇلاننىڭ اجالى» فيلمىن تاپتىق. ءبىراق ول فيلم امانگەلدى تاجىبايەۆتىڭ جەكە قورىندا قالىپ قويدى. جارىققا شىققان جوق. رەجيسسەر توككەن تەر، جاساعان ەڭبەك دالادا قالىپ قويدى. ونىڭ باستى وكىنىشى - وسى. تاعى ءبىر قينالاتىن تۇسى، ءۇش ساعاتتىق فيلمىنىڭ قيدالانىپ كەتكەنى. قازىر قولىنداعى «قۇلاننىڭ اجالى» فيلمى ءبىر ساعات، جيىرما مينۋتتان تۇرادى. سول سەبەپتى دە، «قۇلاننىڭ اجالىن» قايتا تۇسىرگىسى كەلەدى. «فيلمدى قايتا تۇسىرۋگە مۇمكىندىك بەرسە، ويلانباستان كەلىسەر ەدىم» دەيدى رەجيسسەر.

جازۋشى انەس ساراي: «امانگەلدى تاجىبايەۆ ءبىراز جىل قازاقستان كينەماتوگرافيستەر وداعى باسقارماسىنىڭ حاتشىسى بولىپ، كينو ونەرى ۇجىمىنا جەتەكشىلىك ەتتى. باسقا بىرەۋ بولسا، قولىندا تۇرعان بيلىك پەن لاۋازىمدى پايدالانىپ، ومىراۋىنا قاتار- قاتار وردەن جاپسىرىپ، الام دەگەن اتاعىن الىپ قالۋدىڭ قامىن جاسار ەدى. ارى تازا ازامات ونداي ۇياتتى ىسكە باسپادى، وزگەلەرگە اپەردى، وزگەلەردىڭ دارەجەسىن كوتەردى، ءسويتىپ ءجۇرىپ ءوزى اتاقسىز قالدى. مۇنى «امانگەلدى اپەندىلىگى» دەپ اتاۋعا لايىق سيندروم دەمەي كور. ەندى قازىر ۇسىنىلۋدان دا كەندە ەمەس، سىزىلىپ قالۋى دا كەم ەمەس» دەپ جازادى رەجيسسەر حاقىندا.

جاسى سەكسەنگە جاقىنداعان رەجيسسەردىڭ ەشقانداي اتاعى دا جوق. بار اتاعى - ءوزى تۇسىرگەن فيلمدەرى عانا. «وحرانا باستىعى»، «سوعىستىڭ سوڭعى جىلى ەدى»، «اقىرعى امانات» سەكىلدى فيلمدەرىمەن جانىن جۇباتادى. ودان بولەك، امانگەلدى الەمى دەسە، ول تۇسىرگەن دەرەكتى فيلمدەردى ەسكە تۇسىرەرى انىق. ونىڭ ءاربىر فيلمىنىڭ ءوزى جەكە- جەكە تاريح. وتكەن عاسىردىڭ 70-80 -جىلدارداعى قازاق كينوسى تۋرالى تاڭدى- تاڭعا ۇرىپ، اڭگىمە ايتۋعا بار. ويتكەنى ول كەزەڭ قازاق كينوسىنىڭ داۋىرلەۋ زامانى ەدى. ال ول زامانداعى كلاسسيكتەردىڭ قاتارىندا امانگەلدى تاجىبايەۆتىڭ دا ەسىمى قاتار اتالاتىنى انىق.

ال ءبىز ۇمىتتىق. رەجيسسەردى دە، ول تۇسىرگەن «قۇلاننىڭ اجالىن» دا...

گۇلزينا بەكتاس

«ايقىن» گازەتى. 2016 - جىل


Басты сөздер: مادةنيةت, قوعام,
Жоғары қарай