Ауа райы
Астана 11 °С
Алматы 14 °С
валюта бағамы
USD 421.58
EUR 496.83
RUB 5.53
CNY 62.20

Ақмолалықтар Нұр-Сұлтанға 14 мың тонна ет және ет өнімдерін жеткізген

2020 жылдың 7 шілде 2020 06:10

КӨКШЕТАУ. ҚазАқпарат – Ақмола облысы биылғы алты айда Нұр-Сұлтан қаласына 14 мың тонна ет және ет өнімдерін жеткізді, деп хабарлайды ҚазАқпарат тілшісі.

Ақмола облыстық ауыл шаруашылығы басқармасының басшысы Димаш Таласбаевтың айтуынша, елорда тұрғындарына ақмолалық тауар өндірушілердің өнімін тікелей жеткізу бойынша «AQMOL» фирмалық дүкендер желісі жұмыс істейді.

«Осы күні елордаға жеткізіліп жатқан тауардың көбі осы «AQMOL» дүкендер желісі мен 44 сауда орнында сатылуда. Күн сайын облыстың кәсіпорындары 80 тонна ет пен ет өнімдерін, 200 тонна сүт өнімдерін, 700 мың дана жұмыртқа және 25 тонна ұн жеткізеді», - дейді Димаш Таласбаев.

Жалпы, 2019 жылы мұнда жалпы құны 495 миллион теңге болатын 290 тоннадан астам азық-түлік өнімі сатылды. Осының нәтижесінде елорда тұрғындары нарық бағасынан 15-20 пайызға арзан азық-түлікті сатып алу мүмкіндігіне ие болып отыр.

«Үкімет бекіткен елорданың айналасында азық-түлік белдеуін қалыптастыру бойынша Жол картасы шеңберінде 2021 жылға дейін 4 900 басқа арналған 4 тауарлы сүт фермасын ашу жоспарланған. Сондай-ақ, тамшылатып суару жерлерінің көлемін 18 мың гектарға жеткізу мәселесі де назарда. Елордаға жеткізілген азық-түлік өнімдері «Метро», «Астықжан», «Магнум», «Рамстор» және «Еуразия», «Әлем», «Шапағат» тәрізді 44 ірі сауда орындарында сатылады.

Үстіміздегі жылдың алты айында 14 мың тонна ет және ет өнімдері жеткізілді. Облыстағы ет өндіруші ірі кәсіпорын «KazBeef» компаниясы Метр желісімен ет жеткізіп беріп тұру бойынша ұзақ уақытқа келісім-шартқа тұрды. Осының аясында жыл сайын премиум класты 5 мың тонна сиыр етін жетікіп тұрады. Облыста бірінші кезекте Макинск құс фабрикасы іске қосылды. Өткен жылы кәсіпорында 25 тонна суытылған тауық еті өндірілді. Кәсіпорынның басты тұтынушысы Нұр-Сұлтан қаласы. Кәсіпорын келешекте өндіріс қуатын 100 мың тоннаға дейін жеткізуді көздеп отыр», - деп толықтырды Димаш Таласбаев.

Айта кетейік, басқарма басшысының бізге берген деректеріне сүйенсек, Ақмола облысы елорданың сүтке деген сұранысының 34 пайызын жабады. Биылғы алты айда астанаға 64 мың тонна сүт өнімдері жеткізілді. Оның ішінде «Родина агрофирмасы», «МилкПроджект» серіктестіктері және «Астана өнім» акционерлік қоғамы күн сайын 100 тоннаға дейін сүт өнімдерін тасымалдайды. Өңірде ұн тарту және жұмыртқа шығару өнеркәсібі дұрыс жолға қойылған. Сондықтан, облыс елорда тұрғындарының ұн мен жұмыртқаға деген сұраныс толық жаба алады. Жыл басынан бері «Қазгер құс», «Ижевский» өндірістік кооперативі» «Үш бұлақ», «Агроинвест 2015» тәрізді серіктестер 137 миллон дана жұмыртқа жеткізіп, астаналықтардың жұмыртқаға деген сұранысының 94 пайызын жапты.

Бұдан бөлек, өткен жылы ақмолалық ауыл шаруашылығы тауарларын өндірушілер 102 мың тоннадан астам картоп (сұраныстың 92 пайызы), 30,3 мың тоннадан астам көкөніс (сұраныстың 30 пайызы) жеткізді.

Жалпы, Ақмола облысының ауыл шаруашылығы туараларын өндірушілер биылғы жылдың қорытындысы бойынша елордаға барлығы 100 мың тоннадан астам картоп, 30 тоннадан астам көкөніс жеткізуді жоспарлап отыр.


Жоғары қарай