Ауа райы
Астана 14 °С
Алматы 14 °С
валюта бағамы
USD 405.69
EUR 455.51
RUB 5.72
CNY 57.42

Қытайдан Қазақстанға 5 тонна гуманитарлық көмек келді

2020 жылдың 9 сәуір 2020 22:20

НҰР-СҰЛТАН. ҚазАқпарат - Коронавируспен күрес шаралары аясында Қытай Қазақстанға 5 тонна гуманитарлық көмек жіберді, деп хабарлайды ҚазАқпарат тілшісі.

ҚР Денсаулық сақтау вице-министрі Камалжан Надыровтың айтуынша, гуманитарлық көмек түрінде жеке қорғаныс құралдары мен науқастарды емдеу үшін дәрілік препараттар жеткізілді.

«Қытайда эпидемиялық жағдай нашарлағанда Қазақстан атынан гуманитарлық көмек жіберілген еді. Бүгінгі жүк арасында медициналық құрылғылар жоқ. Бір реттік қорғаныс киімі, медициналық маска, көзілдірік сынды медицина мамандарына қажет қорғаныс құралдары жеткізілді. Оның жалпы салмағы 5 тоннадан асады», - деді вице-министр елорда әуежайында тілшілерге берген сұхбатында.

Сонымен бірге, Қытайдың Қазақстандағы елшісі Чжан Сяо дәстүрлі дәрілердің де жеткізілгенін айтты.

«Дәрігерлер бортынан бөлек, екінші ұшақта гуманитарлық көмек жеткізілді. Оның арасында медициналық бетперде, тепловизор, көзілдірік, қолғап және дәстүрлі қытай дәрілері бар. Жаңа вирусқа қарсы вакцина мен белсенді дәрілер болмағандықтан, дәл осы дәстүрлік дәрілер коронавируспен күресте көмек көрсеткен еді», - деді Чжан Сяо.

Елшінің айтуынша, қытайлық тарап тағы да қосымша гуманитарлық көмек жіберуге дайын.

Айта кетейік, бүгін Қытайдың Шыңжан-Ұйғыр автономды ауданынан 10 дәрігер Қазақстан астанасына келді. Олар коронавирус инфекциясын жұқтырғандарды емдеу бойынша тәжірибе алмасады. Елшінің айтуынша, Қытайдың медициналық бригадалары бүгінде Пәкістан, Италия, Иран елдерінде жұмыс істеп жатыр. Қазақстан - ҚХР дәрігерлері барған ТМД елдері арасындағы жалғыз мемлекет.


Жоғары қарай