Ауа райы
Астана -5 °С
Алматы -3 °С
валюта бағамы
USD 421.58
EUR 496.83
RUB 5.53
CNY 62.20

Түркістандықтар министр Біржан Нұрымбетовке мәселесін айтты

2019 жылдың 26 қазан 2019 20:44

ТҮРКІСТАН. ҚазАқпарат - «Nur Otan» партиясы Түркістан облыстық филиалының «Open Space» форматындағы Қоғамдық қабылдау бөлмесінде Қазақстан Республикасының Еңбек және халықты әлеуметтік қорғау министрі Біржан Нұрымбетов тұрғындарды қабылдады.

Министрге облыстың 7 тұрғыны жеке мәселелері бойынша арыз-шағымдарын айтып, көмек сұрады, деп хабарлайды ҚазАқпарат тілшісі.

Мәселен, Кентау қаласының тұрғыны А.Ыбырайым атаулы әлеуметтік көмек алуға құжат тапсырып, үш айының ақшасын ғана алғанын айтады. Алайда бүгінгі таңға дейін белгісіз себептермен қалған ақшалай көмегіне қол жеткізе алмай отыр екен. Сол сияқты жеті баланың анасы А. Жүзтаева да атаулы әлеуметтік көмек алуға құжаттарын тапсырғанымен, екі айына ғана алғанын айтып арызданды. Министр екі ананың да талаптары орынды екенін айта келе Түркістан облыстық жұмыспен қамтуды үйлестіру және әлеуметтік бағдарламалар басқармасының басшысы Ә.Темірбаева мен Кентау қаласының әкімдігіне атаулы әлеуметтік көмекпен уақтылы қамту жөнінде тапсырма берді.




Арыстық К.Иманбекова болса тұрақты жұмысқа орналаса алмай жүргенін айтып шағымданды. Министр Арыс қаласы әкімдігіне К.Иманбекованы жұмысқа орналастыру шараларын қолға алу жөнінде тапсырма берді. Мәселе бақылауға алынды.

Түркістандық К.Тұңғышбаева өз мамандығы бойынша тұрақты жұмысқа орналасу үшін талай есікті тоздырған. Алайда мәселе шешілмеген. Енді бұл ананың да жанайқайы назарға алынатын болды. Оған Түркістан қаласы әкімдігі тарапынан қаладағы бос жұмыс орындары туралы мәлімет беріліп, жұмысқа орналастырудың нақты қадамдары жасалады. «Еңбек» мемлекеттік бағдарламасы бойынша да жұмыс ұсынылмақ.

Қоғамдық қабылдауда ордабасылық Ф.Әшірбаева, сарыағаштық Б.Бекмұрзаева, түркістандық М.Сәрсембаева атаулы әлеуметтік көмек мәселесін қозғады. Біржан Бидайбекұлы тұрғындар тарапынан айтылған мәселелерді мұқият тыңдады. Әрбір арыз-шағымға кең көлемде жауап беріп, кеңесін айтты. Кей мәселелердің шешілуін бақылауында ұстайтындығын сөз етіп, әкімдіктер мен мекеме басшыларына тапсырма берді. Әрбір шағымданушы туралы мәліметті тіркеп алды.




«Қоғамдық қабылдауға Түркістан облысының бірнеше тұрғыны келді. Олардың басым бөлігі жұмыспен қамту, атаулы әлеуметтік көмек, тұрғын үй мәселесін қозғады. Атаулы әлеуметтік көмектің уақтылы төленбеуі жайлы да шағымданғандар бар. Бүгінде бюджет тарапынан Түркістан облысына тиісті қаражат аударылып, қазан айының атаулы әлеуметтік көмегінің қаражаты төленіп жатыр. Жалпы Түркістан облысында 103 мың отбасы, 500 мың адам атаулы әлеуметтік көмекті алады. Кей жағдайда тұрғындар осы көмектің шарттары туралы толық білмейді. Оларға кеңес берілді. Сондай-ақ бос жұмыс орындарын ұсынатын мемлекеттік бағдарламалар туралы да мағлұмат жетпегендер бар. Өңірлердегі жұмыспен қамту орталықтарына барып, мағлұмат алып қана қоймай, жұмысқа орналасуға болады», – деді министр Б.Нұрымбетов.

Қоғамдық қабылдауға келген азаматтардың шағымдары «Nur Otan» партиясы Түркістан облыстық филиалының тұрақты бақылауына да алынды.

Жоғары қарай