Ауа райы
Астана 25 °С
Алматы 27 °С
валюта бағамы
USD 409.19
EUR 461.24
RUB 5.67
CNY 58.26

Алматыда JasylAlmaty акциясы аясында 300 мыңнан астам ағаш отырғызылады

2020 жылдың 11 наурыз 2020 18:35

АЛМАТЫ. ҚазАқпарат – Биыл Алматыда #JasylAlmaty акциясы аясында 330 мың түп ағаш отырғызылмақ, деп хабарлайды ҚазАқпарат тілшісі.

Алматы экологиясына немқұрай қарамайтын экобелсенділер мен қарапайым қала тұрғындары #JasylAlmaty ауқымды акциясына қолдау білдірді. Бұл туралы шаһар басшысы Instagram-дағы парақшасында жазды.

«Мерекелік демалыс күні, 8 наурызда экобелсенді Тимур Елеусізов бастаған бастамашыл топ AirVision қорының қолдауымен Алатау ауданының аумағы арқылы өтетін магистральды газ құбырының санитарлық-қорғау бөлігіне 58 түп қарағай көшеттерін отырғызды. Жыл басынан бері мұнда 200-ге жуық қылқан жапырақты ағаш егілген еді. @sosnovy_bor_almaty жобасының бұл игі бастамасы шаһарды көгалдандыруға үлес қосқысы келетін басқа алматылықтар үшін үлгі боларлық іс»,- деп жазды Бақытжан Сағынтаев.

Сонымен қатар, ол ағымдағы жылы шамамен 330 мың түп ағаш пен аумағы 122 мың шаршы метр болатын гүлзарлар отырғызу жоспарда екенін жазды.

«Өткен жылы #JasylAlmaty акциясы аясында Мохнатка мен Көктөбе тауларының баурайына, «Атакент» аумағындағы саябаққа, «Атлетикалық ауыл», Дәстүрлі өнер театрының скверлеріне, қала мектептерінің аумақтарына, «Саялы» ықшамауданында 135 мыңнан астам көшет егілді. Сондай-ақ МЖӘ аясында аумағы 110 шаршы метр болатын алаңқайға гүлзарлар отырғызылды. Ағымдағы жылы шамамен 330 мың жасыл желек пен аумағы 122 мың шаршы метр болатын алаңға гүлзарлар отырғызу жоспарланып отыр. Көктемгі көшет отырғызу науқаны осы айда басталады»,– дейді әкім
Автор Алма Мұқанова
Басты сөздер: Алматы, Әкім, Экология,
Жоғары қарай