Ауа райы
Астана -18 °С
Алматы 1 °С
валюта бағамы
USD 421.58
EUR 496.83
RUB 5.53
CNY 62.20

Алматыда 50 мың тұрғын сапалы ауыз суға қол жеткізеді

2021 жылдың 20 қаңтар 2021 10:23

АЛМАТЫ. ҚазАқпарат - Алматы әкімі Бақытжан Сағынтаев жұмыс сапары кезінде алматылықтардың өмір сүру сапасын жақсарту үшін салынып жатқан инфрақұрылымдық жобалармен танысты, деп хабарлайды ҚазАқпарат тілшісі.

Қала әкімі Б. Сағынтаев өзінің Instagram-дағы аккаунтында жол айрықтары, электр подстанциялары мен су қабылдайтын станцияларды салу бойынша жұмыстардың барысын тексеру туралы айтты.

«Сейфуллин даңғылы мен Жансүгіров көшесіндегі жолайрықтың құрылысы жалғасуда. Биыл мұнда көлік қозғалысын ашу үшін тиісті шараларды қолға алуды тапсырдым. Осылайша Сейфуллин даңғылының көлік өткізу қабілеті 15-20%-ға, Жансүгіров көшесінде 10-15%-ға өседі», – деп жазды Бақытжан Сағынтаев.

Оның айтуынша, Бостандық ауданында 110 кВ-тық «Алмагүл» қосалқы стансасы салынып жатыр. Ол қаланың оңтүстік бөлігінде салынып жатқан жаңа тұрғын үй кешендеріне қажет қосымша 100 МВт электр энергиясымен қамтамасыз етуге мүмкіндік береді. Бұл шамамен 200 мың тұтынушыға энергия жеткізеді.

Бұдан өзге «Хан Тәңірі» ықшамауданында бой көтеріп жатқан 110 кВ-тық тағы бір қосалқы станса ескірген желілерді ауыстыруға мүмкіндік беріп қана қоймай, электр энергиясына 64 МВт өсім береді. «Алатау», «Нұрлытау», «Ерменсай», «Жайлау» ықшамаудандарын энергиямен қамтамасыз ету жағы жақсарады. Бұл қосылған аумақтардың шамамен 250 мың тұтынушысын қамтиды.

«Наурызбай ауданының 50 мыңға жуық тұрғынын сапалы ауыз сумен қамтамасыз ету үшін «Қарғалы» су тарту және сүзгі стансаларының құрылысы жүріп жатыр. Биыл бұл стансаны төрт ықшамауданмен байланыстыратын магистральдық желілердің құрылысы басталады», - деді Алматы әкімі Бақытжан Сағынтаев.

Жоғары қарай