Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

Жаңаөзендік жас жігіттің ұлттық өнімнен жасалған тәттілері көпшіліктің сұранысына ие болды

31 July 2021 21:22

АҚТАУ. ҚазАқпарат - Жаңаөзендік жас жігіттің ұлттық тәттілері көпшілікті қызықтыруда, деп хабарлайды ҚазАқпарат тілшісі.

Құланды ауылының тұрғыны, Еуразия университетінің 20 жастағы студенті Даниял Төлеуіш — жас кәсіпкер. Ол «AQ DAM» атты ұлттық тәттілер брендін қалыптастыру бағытында өз кәсібін ашып, ерен еңбектенуде.


Отбасылық кәсіптің тетігін тапқан жас жігіт ұлттық өнімдерді тұтынушыға әдемілеп, сыртқы орамын көз тартатындай көркем қылып, көрікті дизайнда безендіру арқылы өзгелерден ерекшеленген түрде ұсынуды жөн санайды. Осылайша, 20 жастағы Даниял Саматұлының отандық бренді қазіргі таңда Маңғыстау өңірінде танымал.


«Әкем мал шаруашылығымен айналысатын болғандықтан, біз мал өнімдерін жеп өстік. Нұр-сұлтан қаласында тұрып жатқан кезімде түйе сүтінен дайындалған өнімдерді сатып алғым келетін. Бірақ ол жақта, түйенің сүтінен жасалған өнімдер біздің Жаңаөзен қаласына қарағанда әлдеқайда қымбаттырақ. Содан маған неге мен өзімізде өндірілген өнімді осында әкеліп қолжетімді бағада сатпасқа деген ой келді. Ата-анаммен бұл ойыммен бөліскенде олар мені бірден қолдады. Солай менде ешқандай қорқыныш болмады»,- деді ол.

Жаңаөзен қаласында ұлттық тәттілерді сатумен айналысатындар көп, алайда «AQ DAM» атты ұлттық тәттілер брендіне қызығушылық танытушылар саны күн санап өсуде. Бүкіл отбасы болып өндіретін өнімді мұндай әдемі етіп қаптап шығару идеясы қалай пайда болғанын айтып берді.

«Басында Нұр-Сұлтан қаласына тасып немесе тапсырыс арқылы алдыртып сатып жүрдім. Бұл тиімсіз болды. Себебі, шұбат сияқты өнім ұзақ жолға тасымалдауға шыдамай қиындықтар тудыратын. Не де болса бұл кәсіпті тоқтатпай, өз өнімдерімізді Жаңаөзен қаласында сатылымға шығаруды ұйғардым. Барлық адам бір нәрсені алып, қолданбас бұрын ең алдымен оның сыртқы түріне, қалай безендірілгеніне қарайды. Сыртқы безендірілгені ұнаса, оны қолданып немесе дәмін татып көргісі келеді. Біздің де өніміміздің сыртқы дизайнына қарап қызығып, дәмін татып көргеннен кейін тұтынушы оны ұнатып қалады. Сөйтіп, адамдар бір-бірінен естіп, көріп қызығушылықпен тапсырыс берушілердің саны көбейе бастады. Қазір тұрақты тұтынушыларымыз да бар. Сыйлыққа беруге немесе дәм ретінде ұсынуға өте қолайлы. Бұл - біздің отбасылық кәсібіміз. Өнімнің барлығы анамның қолынан шығып жатыр. Қаптап, безендіру- қарындастарымның жұмысы. Біз балқаймақ, құрт, ірімшік, шоколадпен қапталған жент өнімдерін шығарамыз. Тары мен талқанды ғана Ақтөбе қаласынан алдыртамыз»,- деді Даниял Төлеуіш.

Жас кәсіпкер қазіргі таңда тапсырыспен жеткізу қызметі арқылы ғана жұмыс істеуде. Өнімдерін Маңғыстау облысының барлық жеріне жеткізеді. Алдағы уақытта үлкен дүкен ашып, Қазақстанның барлық қаласынан және шет мемлекеттерден де тапсырыс қабылдап жеткізу қызметін жасау жоспары да бар.


Up