Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

Шетелден жеткізілген ауыл шаруашылығы өнімдерінен қандай зиянкестер анықталды

26 October 2021 18:55

НҰР-СҰЛТАН. ҚазАқпарат – ҚР АШМ Агроөнеркәсіптік кешендегі мемлекеттік инспекция комитетінің төрағасы Алмабек Марсұлы шетелден ауыл шаруашылығы өнімдерімен бірге келетін зиянкестерге тосқауыл қою қадамдарын айтты, деп хабарлайды ҚазАқпарат тілшісі.

«2021 жылы карантиндік фитосанитариялық бақылау жүргізу кезінде өсімдіктер карантині саласында 5 мыңнан астам заң бұзушылық анықталды. Нәтижесінде, 392 млн теңге әкімшілік айыппұл салынды. Өсімдіктер карантині саласындағы заңнаманы бұзғаны үшін комитет экспорттаушы елдерге карантинге жатқызылған өнімді жеткізу кезінде бірыңғай карантиндік фитосанитариялық талаптарын бұзу туралы 792 нотификация жіберді», - деді А. Марсұлы Орталық коммуникациялар қызметінде.

Осы орайда оның негізгі үлесі Ресейге тиесілі. Одан кейінгі орындарда Өзбекстан, Иран, Түрікменстан елдері тұр. Соның арасында 168 нотификация карантиндік объектілердің анықталуына байланысты жіберілді. Бұл организмдер республика аумағына әкелу кезінде анықталып отыр, бұл ретте 3 мың тоннадан астам жүк қамтылды.

«2021 жылғы қаңтарда комитет қызанақ және бұрыш жемістерінде карантиндік бақылау жүргізу кезінде қызанақ жемістерінің қоңыр қатпарлы вирусы анықталды, 17 жағдайда Әзербайжаннан келген өнімде және 19 жағдайда Түрікменстаннан келген өнімде. Осыған байланысты Әзербайжан мен Түрікменстан аумағынан қызанақ әкелуге уақытша тыйым салынып, карантиндік фитосанитариялық іс-шаралар енгізілді», - деді ол.

Комитет басшысының айтуынша, биылғы сәуір айында карантиндік фитосанитариялық бақылауды жүзеге асыру кезінде Германиядан, Нидерландыдан 228 тонна тұқымдық картоптан, сондай-ақ картоптың «Зебра Чип» карантиндік объектісімен залалданған Франциядан 46,4 килограмм сәбіз тұқымын әкелу тоқтатылды. Бактериялар зертхана сараптамасының қорытындысымен расталды.

«Жоғарыда көрсетілген «Зебра Чип» карантиндік объектісін анықтау фактілері бойынша тиісті карантиндік құжаттар ресімделді. Өсімдіктер карантині саласындағы заңнаманы бұзуға қатысты әкімшілік материалдар сот қарауына жіберілді. Сот қаулысында карантинге жатқызылған өнімнің залалданған партиясын тәркілеу және жүк иелеріне әкімшілік айыппұл салу түрінде тиісті шаралар қабылданды», - деді ол.

Бұдан бұрын хабарланғандай, биыл үйірлі шегіртке еліміздегі 640,8 мың гектар жерге таралды.


Up