Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

Колледждердің 5 мыңға жуық оқытушысы ірі кәсіпорындарда тағылымдамадан өтеді

28 October 2021 15:53

НҰР-СҰЛТАН. ҚазАқпарат - Қазақстандық колледждердің мыңдаған оқытушысы біліктілікті арттыру аясында алғаш рет кәсіпорындарда тағылымдамадан өтуде. Мұндай жаңашылдықты ҚР Білім және ғылым министрлігі енгізді.

Министрлік колледж оқытушыларының білім беру процесіне енгізіліп жатқан оқыту әдістемелері мен жаңа технологияларды игеруі аудиторияларда емес, салалық кәсіпорындар мен мекемелер базасында өтуі үшін келіссөздер жүргізіп, келісімдерге қол жеткізді.

Яғни, егер бұрын педагогтер біліктілігін теория жүзінде арттырса, ендігі кезекте практикалық білім сапасын арттыруға басымдық беріледі.

Осы жылдың соңына дейін еліміздің түрлі өңірлерінен 5 мыңға жуық колледж оқытушысы ірі кәсіпорындарда оқудан өтеді.

«Министрлік қазір колледжде оқып жүрген студенттердің болашақта жұмысқа орналасуы үшін қажетті практикалық білім алуына үлкен көңіл бөледі. Алға қойылған мақсатқа жету үшін біз қазір педагогтерді өндіріс орындарында оқытамыз. Жақын арада біз оқыту сапасындағы оң өзгерістерді көре аламыз деп ойлаймын. Оқытушылар «Атамекен» Ұлттық Кәсіпкерлер палатасы ұсынған кәсіпорындар базасында немесе колледждердің өздері ынтымақтастық орнатқан жұмыс берушілердің ұйымдарында тағылымдамадан өтіп жатыр. Сондай-ақ педагогтер колледж жанындағы құзыреттілік орталықтарында біліктілігін арттыра алады. Бұл орталықтар «Жас маман» жобасы аясында құрылған және олардың барлығы қажетті заманауи жабдықтармен жабдықталған», — деді ҚР БҒМ Техникалық және кәсіптік білім департаментінің директоры Насымжан Оспанова.

Кәсіпорындарда тағылымдамадан өткен кезде педагогтер практикалық құзыреттіліктерін жетілдіріп, жұмыс берушілермен бірлесе колледж түлектерінің қандай дағдыларды меңгеру керектігін анықтайды. Содан кейін, аудиториялық оқыту кезінде педагогтер еңбек нарығының қажеттіліктері мен жұмыс берушілердің сұраныстарын ескере отырып, білім беру бағдарламаларына өзгерістер енгізе алады.

Айта кетейік, оқу жылының басынан бастап техникалық және кәсіптік білім беру ұйымдарына академиялық дербестік берілді. Енді қазақстандық колледждер жұмыс берушілермен бірлесіп, білім беру бағдарламаларының мазмұны мен оқу мерзімдерін өздері айқындайды.


Up