Weather
Нур-Султан +7 °С
Almaty +14 °С
Exchange rates
USD 449.85
EUR 485.43
RUB 5.71
CNY 70.69

ەڭ جوعارى جانە تومەنگى زەينەتاقى اراسىنداعى ايىرماشىلىق ازايادى - تامارا دۇيسەنوۆا

26 May 2022 13:55

نۇر-سۇلتان. قازاقپارات - ەڭ تومەنگى زەينەتاقى مەن جاردەماقى ستاندارتتارى قايتا قارالادى.

بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.

«بيىل ءساۋىر ايىندا الەۋمەتتىك سالا شىعىندارى قوسىمشا %4 عا يندەكستەلدى. سوندا 40-50 مىڭ تەڭگە كولەمىندەگى زەينەتاقى 2 مىڭ تەڭگەگە عانا وسسە، 300-400 مىڭ تەڭگەدەگى زەينەتاقى 16 مىڭعا وسكەن. بۇل تەڭسىزدىكتى قالاي ازايتپاق؟ بۇل قاراجات ەڭ تومەن زەينەتاقى مەن 1 ميلليونعا جۋىق ادامنىڭ تابىسىنىڭ ەڭ تومەنگى كۇنگورىس دەڭگەيىن كوتەرۋگە قانشالىقتى مۇمكىندىك بەرەدى؟ جالپى، يندەكستەۋدەن كەيىن ازاماتتار تولەمدەردىڭ ءوسۋىن بارىنشا سەزىنۋ ءۇشىن ەڭ تومەنگى الەۋمەتتىك ستاندارتتار ءادىسناماسىن قايتا قاراۋ مينيسترلىكتىڭ جوسپارىندا بار ما؟»، - دەپ سۇراق قويدى سەنات دەپۋتاتى رىسقالي ابدىكەروۆ مينيسترگە.

ءوز كەزەگىندە تامارا دۇيسەنوۆا زەينەتاقى جانە باسقا الەۋمەتتىك تولەمدەردى يندەكساتسيالاۋ ينفلياتسيا دالىزىنە قاراي بيۋدجەتتىك تارتىپپەن جاسالاتىنىن جەتكىزدى.

«ەڭ تومەنگى زەينەتاقى، ەڭبەكاقى، جاردەماقى جونىندەگى ءسىزدىڭ پىكىرىڭىزمەن تولىق كەلىسەمىن. سوندىقتان ۇكىمەتتىڭ قازىرگى جوسپارىنىڭ ىشىندە ءبىزدىڭ دە ون شاقتى جوسپارىمىز تۇر. ەڭ تومەنگى زەينەتاقىدان ەڭ تومەنگى جاردەماقىعا دەيىنگى ستاندارتتاردى قايتا قارايمىز. قازىر ءبىز ۇلتتىق جانە حالىقارالىق ساراپشىلاردى شاقىرىپ، جۇمىستى باستادىق. ءبىراز ۇسىنىستارىمىزدى دايارلاپ جاتىرمىز. سونىڭ ناتيجەسىندە جۇمىس توبى قۇرىلادى دەپ وتىرمىز. سول جۇمىس توبىنا وزدەرىڭىزدى دە شاقىرامىز»، - دەدى ول.

مينيستر شىن مانىندە پروبلەما بار ەكەنىن مويىندايدى.

«پروبلەما بار. بۇگىندە ەڭ تومەنگى، ورتاشا جانە جوعارى زەينەتاقى اراسىندا ۇلكەن ايىرماشىلىق پايدا بولدى. ال ەڭ تومەنگى الەۋمەتتىك ستاندارتتاردى قايتا قاراۋ ارقىلى وسى ايىرماشىلىقتى جوندەيمىز»، - دەدى ت. دۇيسەنوۆا.

اۆتور: ايجان سەرىكجان قىزى


Up