Weather
Нур-Султан +7 °С
Almaty +14 °С
Exchange rates
USD 449.85
EUR 485.43
RUB 5.71
CNY 70.69

سەنات مەملەكەتتىك باستامالاردى ەلباسىمەن كەلىسۋ قاجەتتىلىگىن جويۋدى ۇسىندى

27 January 2022 11:03

نۇر- سۇلتان. قازاقپارات - سەناتورلار مەملەكەتتىك باستامالاردى ەلباسىمەن كەلىسۋ قاجەتتىلىگىن جويۋدى ۇسىنادى.

بۇل نورما بۇگىن پالاتانىڭ جالپى وتىرىسىندا سەناتورلار قاراعان «تۇڭعىش پرەزيدەنت - ەلباسى تۋرالى» كونستيتۋتسيالىق زاڭدا جازىلعان، دەپ حابارلايدى قازاقپارات ءتىلشىسى.

بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى كونستيتۋتسيالىق زاڭ جوباسىن، سونداي- اق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر ەنگىزۋ تۋرالى» زاڭ جوباسىن قارادى.

بۇل رەتتە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنا، قازاقستان رەسپۋبليكاسىنىڭ «ساياسي پارتيالار تۋرالى» زاڭىندا دەپۋتاتتىق مانداتتاردى ءبولۋ كەزىندە كۆوتانى مىندەتتى ەسەپكە الۋ تۋرالى نورمانى زاڭنامالىق بەكىتۋگە جانە ايەلدەر مەن جاستاردان باسقا، مۇگەدەكتىگى بار ادامدار ءۇشىن كۆوتا بەلگىلەي وتىرىپ، كۆوتا بەرىلەتىن ساناتتارىنىڭ تىزبەسىن كەڭەيتۋ ەسكەرىلگەن. ياعني، دەپۋتاتتاردى ماجىلىسكە تىركەگەن كەزدە پارتيالىق تىزىمدە ءۇش سانات وكىلدەرىنىڭ: ايەلدەردىڭ، جيىرما توعىز جاسقا تولماعان ادامداردىڭ جانە مۇگەدەكتىگى بار ادامداردىڭ سانى تىزىمگە ەنگىزىلگەن ادامداردىڭ جالپى سانىنىڭ كەمىندە 30 پايىزىن قۇراۋعا ءتيىس، بۇل كۆوتا دەپۋتاتتىق مانداتتاردى ءبولۋ كەزىندە دە ساقتالۋى ءتيىس. بۇدان بولەك دەپۋتاتتار «قاۋىپسىزدىك كەڭەسى تۋرالى» جانە «قازاقستان حالقى اسسامبلەياسى تۋرالى» زاڭدارعا بۇرىن ۇسىنىلعان وزگەرىستەر مەن تولىقتىرۋلاردى تالقىلادى.

تۇزەتۋلەردە ەلباسىنىڭ قاۋىپسىزدىك كەڭەسىندە جانە قازاقستان حالقى اسسامبلەياسىندا ءومىر بويى ءتوراعالىق ەتۋ قۇقىعىنىڭ كۇشىن جويۋ كوزدەلەدى. جوعارعى پالاتا دەپۋتاتتارى ماجىلىسمەندەردىڭ بۇرىن ايتىلعان بارلىق وزگەرىستەرىن ماقۇلدادى. ءبىراق، ءوز تۇزەتۋلەرىن ۇسىنا وتىرىپ، زاڭ جوباسىن تومەنگى پالاتاعا قايتا قاراۋعا قايتارىپ وتىر.

«سەناتورلار زاڭناماعا ەنگىزىلىپ وتىرعان مەملەكەتىمىزدىڭ قاۋىپسىزدىك كەڭەسىن، قازاقستان حالقى اسسامبلەياسىن مەملەكەت باسشىسى ءوزىنىڭ قىزمەتىنە سايكەس باسقارۋى ءتيىس دەگەن وزگەرىستەردى قولدادى. سونىمەن قاتار زاڭدى تالقىلاۋ بارىسىندا ءبىر نورما ەنگىزىلىپ وتىر. ول - «تۇڭعىش پرەزيدەنت تۋرالى» زاڭنان مەملەكەتتىڭ ىشكى جانە سىرتقى ساياساتىنا بايلانىستى باستامالاردى ەلباسىمەن كەلىسىلۋگە ءتيىس دەگەن نورما الىپ تاستالىپ وتىر. سوندىقتان دا سەنات زاڭناماعا ەنگىزىلگەن وزگەرىستەردى تۇجىرىمدامالى تۇردە قولداپ، ءبىر وزگەرىسپەنەن ماجىلىسكە قايتارىپ وتىر»، - دەپ اتاپ ءوتتى سەناتور ءلاززات سۇلەيمەن.

ەندى بۇل تۇزەتۋدى ءماجىلىس دەپۋتاتتارى قارايدى جانە قابىلدانعان جاعدايدا زاڭ جوباسى پرەزيدەنتكە قول قويۋعا جىبەرىلەدى. سونىمەن قاتار سەنات ءتوراعاسى ماۋلەن اشىمبايەۆ بۇگىن قارالعان زاڭ جوبالارى مەملەكەت باسشىسىنىڭ ەلىمىزدى جاڭارتۋ باعدارىن ىسكە اسىرۋعا ارنالعانىن اتاپ ءوتتى.

«سوعان سايكەس، ماجىلىستەگى دەپۋتاتتىق مانداتتاردىڭ كەمىندە 30 پايىزى كەپىلدى تۇردە ايەلدەرگە، جاستارعا جانە مۇگەدەكتىگى بار ادامدارعا بەرىلەدى. بۇل پارلامەنتتىڭ وكىلدى فۋنكتسيالارىن كۇشەيتەدى، سونداي- اق ونىڭ جۇمىسىنا بارلىق ماڭىزدى الەۋمەتتىك توپتاردىڭ قاتىسۋىنا كەپىلدىك بەرەدى. مۇنداي قادام قابىلداناتىن زاڭداردىڭ ساپاسىنا اسەر ەتەتىنى ءسوزسىز. مۇگەدەكتىگى بار ادامداردى ءماجىلىس قۇرامىنا قوسۋ - پارلامەنتتىڭ ينكليۋزيۆتىلىگىن دە ارتتىرادى. بۇل وسى ساناتتاعى ازاماتتاردى ەلىمىزدىڭ جالپى ساياسي ومىرىنە بەلسەندى جۇمىلدىرۋعا مۇمكىندىك بەرەدى. سونىمەن قاتار، قابىلدانعان نورمالارعا سايكەس، قازاقستان رەسپۋبليكاسىنىڭ پرەزيدەنتى حالىق پەن مەملەكەتتىك بيلىك بىرلىگىنىڭ نىشانى ءارى كەپىلى رەتىندە قازاقستان حالقى اسسامبلەياسى مەن قاۋىپسىزدىك كەڭەسىن باسقارادى»، - دەدى م. اشىمبايەۆ.



Up