Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

اقمولا مەن جامبىل وبلىستارىنداعى بايىرعى اتاۋلاردى قايتارۋ ۇسىنىلدى

7 December 2021 15:27

نۇر- سۇلتان. قازاقپارات - مادەنيەت جانە سپورت مينيسترلىگىنىڭ ونوماستيكا ءبولىمى اقمولا مەن جامبىل وبلىستارىنىڭ بايىرعى جەر- سۋ اتاۋلارىنا زەرتتەۋ جۇرگىزدى، دەپ حابارلايدى قازاقپارات.

مينيسترلىكتىڭ حابارلاۋىنشا، «تاريحي- دياحروندىق ءادىستى قولدانۋ ارقىلى ونوماستيكالىق اتاۋلاردى جۇيەلەندىرۋ قىزمەتى» جوباسى بىلتىردان بەرى جۇزەگە اسىرىلىپ كەلەدى. بىلتىر جوبا اياسىندا س ق و جانە قاراعاندى وبلىس تارىنىڭ توپونيميكالىق اتاۋلارى زەرتتەلگەن بولاتىن.

«اتالعان جوبانى مەملەكەتتىك ساتىپ الۋ ارقىلى «قاينار» كاسىبي دايىندىقتىڭ جوعارى مەكتەبى» جشس ۇتىپ العان. بۇگىندە اتالعان سەرىكتەستىك تەحنيكالىق ەرەكشەلىكتەرگە سايكەس، بەلگىلى عالىمدار، گەوگرافتار، عالىمداردان جۇمىس توبىن قۇرىپ، ءبىرقاتار ەڭبەك ەتتى. سونداي- اق، مينيسترلىك تاراپىنان ونوماستيكالىق كەڭىستىكتى رەتتەۋ جانە ستاندارتتاۋ مىندەتى قويىلعان. ەل اۋماعىنداعى تاريحي جەر- سۋ اتاۋلارىن حالقىمىزدىڭ تاريحىنان عانا ەمەس، دۇنيەتانىمى مەن ۇلتتىق ۇستانىمدارىنان دا حابار بەرەتىنى قۇندى. بيىل اقمولا جانە جامبىل وبلىستارىن الىپ وتىرمىز. قاراشا ايىندا كوكشەتاۋ جانە تاراز قالالارىندا مامانداردىڭ قاتىسۋىمەن سەمينار ۇيىمداستىرىلدى»، - دەدى ق ر مادەنيت جانە سپورت مينيسترلىگى مادەنيەت كوميتەتى ونوماستيكا ءبولىمىنىڭ باسشىسى ەلەركە تورەحان ق ر ۇلتتىق كىتاپحاناسىندا وتكەن قورىتىندى بريفينگتە.

جوبا ناتيجەسى رەتىندە اتالعان وڭىرلەر كەستەلى سوزدىك جاسايدى، سونىمەن بىرگە توپونيميكالىق اتاۋلاردىڭ وزگەرۋ ديناميكاسى جاسالادى. ەلىمىزدىڭ بارلىق 17 ءوڭىرىنىڭ توپونيميكالىق اتاۋلارى، ولاردىڭ بايىرعى تاريحي اتاۋلارى زەرتتەلىپ بولعاسىن، قازاقستاننىڭ بارلىق ونوماستيكالىق اتاۋلارىنىڭ 3D كارتاسىن ازىرلەۋ جوسپارلانىپ وتىر. بۇل كارتا مەتوديكالىق كومەك رەتىندە جەرگىلىكتى اكىمدىكتەرگە جۇمىس بارىسىندا باسشىلىققا الۋ ءۇشىن تاراتىلادى.

«الداعى ۋاقىتتا بۇل جوبا قازاقستاننىڭ بارلىق وبلىسىنداعى ەلدىمەكەندەردىڭ تاريحي اتاۋلارىن قالپىنا كەلتىرۋگە نەگىزدەلەدى. جوبادان كۇتىلەتىن ناتيجە - بىرىنشىدەن، دياحروندىق ءادىس بويىنشا تاريحي اتاۋلاردىڭ ەتيمولوگياسى مەن ماعىناسى ايقىندالادى. ەكىنشىدەن، كونە اتاۋلاردىڭ قازىرگى قازاقستان ونونماستيكالىق كەڭىستىگىندەگى جەر- سۋ اتاۋلارى مەن ءوزارا تىلدىك- گەنەتيكالىق بايلانىسى، مازمۇندىق- سەمانتيكالىق ورتاقتىعى، سونداي- اق تاريحي ساباقتاستىعىنا تالداۋ جاسالادى. ۇشىنشىدەن، تاريحي دالەلدەردى كەلتىرۋ ماقساتىندا كەڭەس كەزەڭىنە دەيىنگى جانە كەڭەس كەزەڭىندەگى كارتاداعى اتاۋلار زەرتتەلەدى. ياعني، كونە زامانداعى كارتالارمەن جۇمىس جاسالادى، ءوزارا سالىستىرۋ جۇمىستارى جۇرگىزىلەدى. تورتىنشىدەن، بايىرعى تاريحي اتاۋلاردى قالپىنا كەلتىرۋ بارىسىندا جوبا زەرتتەۋشىلەرى ءار وبلىس بويىنشا عىلىمي- زەرتتەۋ ناتيجەلەرىمەن تانىستىرىپ، تۇرعىنداردى حاباردار ەتىپ، جەرگىلىكتى اتقارۋشى ورگانداردىڭ وڭتايلى شەشىم قابىلداۋىنا مۇمكىندىك بەرەدى»، - دەدى ە. تورەحان.

«قاينار» كاسىبي دايىندىقتىڭ جوعارى مەكتەبى» ج ش س ديرەكتورى گۇلنار بەكەنوۆانىڭ ايتۋىنشا، اقمولا وبلىسىندا 180 جەر- سۋ اتاۋىنىڭ، جامبىل وبلىسىندا - 100-دەن استام جەردىڭ بايىرعى اتىن قايتارۋ جانە وزگەرتۋ تۋرالى ۇسىنىم بەرىلگەن. ەڭ الدىمەن بۇل ۇسىنىمداردى جەرگىلىكتى اتقارۋ ورگاندارى جانە ونوماستيكالىق كوميسسيا قاراستىرادى. سودان كەيىن جەرگىلىكتى اتقارۋشى ورگان ورتالىققا ۇسىنىم جىبەرۋى قاجەت جانە سوڭعى شەشىمدى رەسپۋبليكالىق ونوماستيكالىق كوميسسيا قابىلدايدى جانە ۇكىمەت ارنايى قاۋلى شىعارادى.

اۆتور: ايجان سەرىكجان قىزى

Up