Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

لوندوندا قازاق كينوسىنىڭ ونلاين اپتالىعى باستالدى

2 December 2021 18:40

لوندون. قازاقپارات - قازاقستان كينەماتوگرافىنىڭ تاريحى مەن زاماناۋي ترەندتەرى لوندونداعى قازاقستان كينوسىنىڭ ونلاين-اپتالىعىن اشقان دوڭگەلەك ۇستەلدىڭ تاقىرىبى بولدى، دەپ حابارلايدى قازاقپارات.

شارانى قازاقستان تاۋەلسىزدىگىنىڭ 30 جىلدىعىنا وراي ق ر ۇلى بريتانياداعى ەلشىلىگى جانە «شاكەن ايمانوۆ اتىنداعى «قازاق فيلم» ا ق بىرلەسىپ ۇيىمداستىردى.

دوڭگەلەك ۇستەلگە ق ر ۇلى بريتانياداعى ەلشىسى ەرلان ىدىرىسوۆ، دجوردج ۆاشينگتون ۋنيۆەرسيتەتىنىڭ فاكۋلتەت ىستەرى جانە زەرتتەۋ باستامالارى جونىندەگى دەكاننىڭ ورىنباسارى پروفەسسور پيتەر روللبەرگ، سونداي-اق ابەريستۋيت ۋنيۆەرسيتەتى كينوتانۋ عىلىمىنىڭ قۇرمەتتى پروفەسسورى بيرگيت بويمەرس قاتىستى. مودەراتور لوندوندىق ماريا پاتشايىم ۋنيۆەرسيتەتىنىڭ ۆيزۋالدى مادەنيەتتەر كافەدراسىنىڭ دوكتورانتى ءاسيا يسەمبەرديەۆا بولدى.

ەلشى ە. ىدىرىسوۆ العى سوزىندە قازاق ءومىرىنىڭ بارلىق سالاسىن قامتيتىن باي اۋىزشا شىعارماشىلىق جانە تابيعاتپەن بىرلىك ءداستۇرى قازاق مادەنيەتىنىڭ اجىراماس بولىگى ەكەندىگىن اتاپ ءوتتى.




ە. ىدىرىسوۆتىڭ ايتۋىنشا، بۇگىندە بۇل ءداستۇر كينوعا ءجيى جۇگىنەدى، ال قازاقستاندىق كينەماتوگراف ونداعان جىلدار بويى ساپالى تۋىندىلارىمەن تانىمال بولىپ، كەڭەستىك كينوماستەرلىك مەكتەبىنىڭ ۇزدىك قاسيەتتەرىن دالا دۇنيەتانىمىمەن ۇشتاستىرا ءبىلدى.

پروفەسسور پ. روللبەرگ اۋىزشا شىعارماشىلىق جانە ونىمەن بايلانىستى اكتەرلىك شەبەرلىك پەن يمپروۆيزاتسيا ونەرى قازاق مادەنيەتىندە ەرەكشە دامىعاندىعىمەن كەلىستى.

ول قازاقستاندىق كينەماتوگرافتىڭ دامۋ كەزەڭدەرىنە جان-جاقتى توقتاپ، اتاپ ايتقاندا، «امانگەلدى»، «ءبىزدىڭ سۇيىكتى دارىگەر»، «اتامەكەن»، «سۇلتان بەيبارىس» فيلمدەرى جايلى، سونداي-اق قازاقستاندىق رەجيسسەر جانە كينواكتەر، اڭىز ادام شاكەن ايمانوۆ تۋرالى اڭگىمەلەپ بەردى. پروفەسسور ب. بويمەرستىڭ بايانداماسى كەيىنگى كەزەڭگە - «جاڭا تولقىن» جانە تاۋەلسىز «پارتيزان كينوسىنىڭ» گۇلدەنۋىنە ارنالدى.

ونىڭ ايتۋىنشا، قازاقستاندىق كينەماتوگرافتىڭ زاماناۋي ترەندتەرى قازاقستانعا ءىرى حالىقارالىق كينوفەستيۆالدەردە ءجيى اتىن شىعاراتىن مۇمكىندىكتەر بەرەدى. ول سونداي-اق قازاقستاندىق كينەماتوگرافتى دامىتۋ، تاۋەلسىز كينونى قولداۋ جانە حالىقارالىق كينوپروديۋسەرلەرمەن بايلانىس ورناتۋ ءۇشىن جاعداي جاساۋدىڭ ماڭىزدىلىعىن اتاپ ءوتتى.

«بۇل قازاقستانعا ءالى دە ءوزىنىڭ ءتىلى بولىپ تابىلاتىن، ءبىراق سونىمەن بىرگە حالىقارالىق رەزونانس پەن امبەباپ كونتەكستكە يە تىلدە سويلەي باستاۋعا ناقتى سەرپىن بەرەدى. مۇنداي ىنتىماقتاستىق قازاقستاندىق فيلمدەردىڭ حالىقارالىق كورەرمەنگە جول تابۋى ءۇشىن وتە ماڭىزدى»، - دەدى پروفەسسور.

ۇلى بريتانياداعى قازاقستاندىق كينونىڭ ونلاين-اپتالىعىندا وتاندىق كينەماتوگراف كلاسسيكاسىنىڭ جاۋھارلارى، سونداي-اق قازاقستاندىق كينەماتوگرافيستەردىڭ حالىقارالىق دەڭگەيدە تانىلعان جۇمىستارى ۇسىنىلعان.

ءبىرىنشى كۇنى كورەرمەندەرگە رەجيسسەر بولات مانسۇروۆتىڭ «سۇلتان بەيبارىس» فيلمى كورسەتىلدى. تۋىندىدا ءبىر كەزدەرى قۇلدىققا الىنىپ، مىسىردىڭ بيلەۋشىسى بولعان قىپشاق بالاسىنىڭ وقيعاسى باياندالادى.

كارتينانىڭ باستى كەيىپكەرى ءوزىنىڭ ۇزاق جانە درامالىق ءومىرىنىڭ سوڭىنا قاراي بيلىكتى، ماحابباتتى، رەنىشتى جانە وتانىنا دەگەن جان كۇيزەلىسىن باستان كەشىرىپ، اتا-باباسى تۇرعان جەرگە - تۋعان قازاق دالاسىنا ورالادى. ونلاين-كورسەتىلىمدەرگە بريتانيالىق كينوسىنشىلاردىڭ قاتىسۋىمەن ۇيىمداستىرىلعان اكتەر جانە رەجيسسەرلەرمەن ەكسكليۋزيۆتى سۇحباتتار وتكىزىلدى.

سۇحباتقا قاتىسۋشىلار: - «قىز جىلاعان» فيلمىندە ەكىنشى پلانداعى ءرولدى سومداعان بەلگىلى قازاقستاندىق اكتەر دۋلىعا اقمولدا.

فيلم يادرولىق قارۋدى سىناۋدىڭ ەپيتسەنترىندە ورنالاسقان سەمەي وبلىسىنداعى قازاق اۋىلىنىڭ ءومىرى تۋرالى باياندايدى.

فيلمنىڭ رەجيسسەرى ساتىبالدى نارىمبەتوۆ 2021-جىلى مەزگىلسىز قايتىس بولدى؛

- ناريمان تورەبايەۆ، فەدور دوستويەۆسكيدىڭ «بەلىە نوچي» پوۆەسىنىڭ جەلىسىمەن تۇسىرىلگەن «شىتىرمان» فيلمىن تۇسىرگەن تانىمال قازاقستاندىق كينورەجيسسەر؛

- اكتەر جانە رەجيسسەر سانجار ءمادي.

ول ەۋروپالىق جۇرتشىلىققا قازاقتىڭ ۆوكالدىق-ورىنداۋشىلىق ونەرى مەن ۇلتتىق اسپابى - دومبىرانى ءبىرىنشى بولىپ الەمگە تانىتقان امىرە قاشاۋبايەۆ تۋرالى سىر شەرتەتىن «امىرە» فيلمىنىڭ باستى كەيىپكەرى؛

- كينورەجيسسەر ءادىلحان ەرجانوۆ.

ونىڭ «سارى مىسىق» فيلمى 2022-جىلعى «وسكار» سىيلىعىنا «شەت تىلىندەگى ۇزدىك فيلم» نوميناتسياسىنا قازاقستاننان ۇسىنىلدى.

بارلىق فيلمدەر مەن سۇحباتتار 2021-جىلدىڭ 15- جەلتوقسانىنا دەيىن مىنا سىلتەمە بويىنشا قول جەتىمدى.

Keywords: مادةنيةت,
Up