Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قاسىم- جومارت توقايەۆ: التىن وردا مۇراسىن تۋريزمدى دامىتۋعا پايدالانۋىمىز كەرەك

28 October 2021 13:26

اتىراۋ. قازاقپارات - پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ اتىراۋدا ءوتىپ جاتقان «ۇلىق ۇلىس - التىن وردا» اتتى حالىقارالىق عىلىمي- پراكتيكالىق كونفەرەنسيانىڭ قاتىسۋشىلارىنا ق ر پرەزيدەنتى قاسىم- جومارت توقايەۆتىڭ قۇتتىقتاۋ حاتىن وقىدى، اتتى دەپ حابارلايدى قازاقپارات ءتىلشىسى.

«بارشاڭىزدى «ۇلىق ۇلىس - التىن وردا» اتتى حالىقارالىق كونفەرەنسيانىڭ اشىلۋىمەن قۇتتىقتايمىن. بۇل القالى جيىن تاۋەلسىزدىگىمىزدىڭ 30 جىلدىق مەرەيلى بەلەسىنە وراي وتكىزىلۋدە. التىن وردا تاريحى قازىرگى قازاق مەملەكەتتىلىگىنىڭ جىلناماسىمەن تىعىز بايلانىستى. ايگىلى جوشى حان كەسەنەسى مەن سارايشىق قالاسىنىڭ قازاقستان اۋماعىندا ورنالاسۋى جانە شەتەل مۇراعاتتارىنان كوپتەگەن جازبا دەرەكتەردىڭ تابىلۋى - وسىنىڭ ايقىن دالەلى. شىن مانىندە التىن وردانىڭ تاريحى ءالى دە تەرەڭ زەرتتەۋدى قاجەت ەتەدى. ءتۇرلى سەبەپتەرگە بايلانىستى ءتول شەجىرەمىزدىڭ وسى بىرنەشە عاسىرلىق كەزەڭى نازاردان تىس قالدى»، - دەلىنگەن مەملەكەت باسشىسىنىڭ قۇتتىقتاۋىندا.

سونداي- اق، پرەزيدەنت ەلىمىز ەگەمەندىگىن العاننان كەيىن عانا بۇل ولقىلىقتىڭ ورنىن تولتىرۋعا جول اشىلعانىن ەسكە سالدى.

«ەلباسىنىڭ باستاماسىمەن قولعا الىنعان اۋقىمدى باعدارلامالار جۇرتىمىزدىڭ تاريحي ساناسىن جاڭعىرتۋعا زور ۇلەس قوستى. سانمىڭجىلدىق شەجىرەمىزدەگى ساباقتاستىق جالعاسىن تاۋىپ، ۇلتتىق رۋحىمىز بيىكتەي ءتۇستى. ءبىز التىن وردا داۋىرىنەن كەلگەن قۇندى جادىگەرلەردى دۇنيە جۇزىنە تانىتىپ، ونى تۋريزم سالاسىن دامىتۋ ءۇشىن ءتيىمدى پايدالانۋىمىز كەرەك»، - دەپ جازىلعان قۇتتىقتاۋ حاتتا.

اۆتور: ەسىمجان ناقتىباي

Up