Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قازاقستاندا موبيلدى ينتەرنەت جىلدامدىعى ارتتى

27 October 2021 19:40

نۇر-سۇلتان. قازاقپارات - جىل باسىنان بەرى ەلىمىزدە موبيلدى ينتەرنەت جىلدامدىعى سەكۋندىنا 19,52 دەن 31,74 مەگابيتكە دەيىن ءوستى.

Finprom.kz ساراپشىلارى قىركۇيەك ايىنداعى موبيلدى ينتەرنەت جىلدامدىعى بويىنشا ەلدەر رەيتينگىندە قازاقستان ءبىر ايدا ءۇش ساتىعا كوتەرىلىپ، 80-ورىنعا تۇراقتاعانىن حابارلادى. رەيتينگكە سايكەس، ەلىمىزدە جىل باسىنان بەرى موبيلدى ينتەرنەت جىلدامدىعى 62,2 پايىزعا، سەكۋندىنا 19,52 دەن 31,74 مەگابيتكە دەيىن ارتقان.

ءدال وسىنداي رەيتينگتە ورتالىق ازيا ەلدەرى اراسىندا قازاقستان ءبىرىنشى ورىنعا يە بولدى، سونىمەن قاتار ەلىمىز بەلارۋس پەن رەسەيدى باسىپ وزعان. ينتەرنەت جىلدامدىعى بويىنشا كوشباسشىلار - ب ا ءا، وڭتۇستىك كورەيا، نورۆەگيا، كاتار جانە قىتاي مەملەكەتى.

زەرتتەۋدە 2021-جىلدىڭ توعىز ايىندا بايلانىس سالاسىنا سالىنعان ينۆەستيتسيا 17,8 پايىزعا ءوسىپ، 88,8 ميلليارد تەڭگە بولعانى ايتىلعان. كەيىنگى بەس جىلدا كۇردەلى سالىمدار كولەمى جىلىنا ورتا ەسەپپەن 19 پايىزعا ءوسىپ وتىر. ۇلتتىق ستاتيستيكا بيۋروسىنىڭ مالىمەتى بويىنشا، 2021-جىلدىڭ ەكىنشى توقسانىندا جالپى بايلانىس سالاسىنداعى زەرتتەلگەن كاسىپورىنداردىڭ 45 پايىزى جانە 39 پايىزى تيىسىنشە نەگىزگى قورلار مەن قۇرال-جابدىقتارعا، اتاپ ايتقاندا ەسكى جابدىقتاردى اۋىستىرۋعا، وندىرىستىك قۋاتتاردى تارتىپپەن كەڭەيتۋگە ينۆەستيتسيا سالعان.

2021-جىلدىڭ ءبىرىنشى جارتىجىلدىعىندا قازاقستاندا 24,2 ميلليون ۇيالى بايلانىس ابونەنتى بولعان، بۇل وتكەن جىلمەن سالىستىرعاندا 1,2 پايىزعا كوپ. ساراپشىلار 2019-2025-جىلدار ارالىعىندا موبيلدى ينتەرنەتتى پايدالانۋشىلار سانى 54 پايىزعا ارتادى دەپ بولجايدى. وسى ۋاقىتقا دەيىن G3 قىزمەتتەرى جالپى نارىقتىڭ 28 پايىزىن، G4 تەحنولوگيالارى 60 پايىزىن، ال جاڭا G5 جەلىلەرى نارىقتىڭ 12 پايىزىن قامتىماق.

بۇعان دەيىن سيفرلىق دامۋ ءمينيسترى G5- گە كەزەڭ- كەزەڭىمەن كوشۋ 2022-جىلعا دەيىن جۇرگىزىلەتىنىن جانە رەسپۋبليكالىق ماڭىزى بار قالالاردا جوسپارلانعانىن حابارلاعان بولاتىن.

2021-جىلدىڭ قازان ايىنىڭ باسىندا بايلانىس وپەراتورلارى نۇر-سۇلتان مەن الماتىدا G5 جەلىلەرىن سىناقتان وتكىزۋدى باستادى.

Keywords: قوعام,
Up