Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

شەتەلدەن جەتكىزىلگەن اۋىل شارۋاشىلىعى ونىمدەرىنەن قانداي زيانكەستەر انىقتالدى

26 October 2021 20:57

نۇر-سۇلتان. قازاقپارات - ق ر ا ش م اگروونەركاسىپتىك كەشەندەگى مەملەكەتتىك ينسپەكسيا كوميتەتىنىڭ ءتوراعاسى المابەك مارس ۇلى شەتەلدەن اۋىل شارۋاشىلىعى ونىمدەرىمەن بىرگە كەلەتىن زيانكەستەرگە توسقاۋىل قويۋ قادامدارىن ايتتى، دەپ حابارلايدى قازاقپارات ءتىلشىسى.

«2021-جىلى كارانتيندىك فيتوسانيتاريالىق باقىلاۋ جۇرگىزۋ كەزىندە وسىمدىكتەر كارانتينى سالاسىندا 5 مىڭنان استام زاڭ بۇزۋشىلىق انىقتالدى. ناتيجەسىندە، 392 ميلليون تەڭگە اكىمشىلىك ايىپپۇل سالىندى. وسىمدىكتەر كارانتينى سالاسىنداعى زاڭنامانى بۇزعانى ءۇشىن كوميتەت ەكسپورتتاۋشى ەلدەرگە كارانتينگە جاتقىزىلعان ءونىمدى جەتكىزۋ كەزىندە ءبىرىڭعاي كارانتيندىك فيتوسانيتاريالىق تالاپتارىن بۇزۋ تۋرالى 792 نوتيفيكاتسيا جىبەردى»، - دەدى ا. مارس ۇلى ورتالىق كوممۋنيكاتسيالار قىزمەتىندە.

وسى ورايدا ونىڭ نەگىزگى ۇلەسى رەسەيگە تيەسىلى. ودان كەيىنگى ورىنداردا وزبەكستان، يران، تۇرىكمەنستان ەلدەرى تۇر. سونىڭ اراسىندا 168 نوتيفيكاتسيا كارانتيندىك وبەكتىلەردىڭ انىقتالۋىنا بايلانىستى جىبەرىلدى.

بۇل ورگانيزمدەر رەسپۋبليكا اۋماعىنا اكەلۋ كەزىندە انىقتالىپ وتىر، بۇل رەتتە 3 مىڭ توننادان استام جۇك قامتىلدى.

«2021-جىلعى قاڭتاردا كوميتەت قىزاناق جانە بۇرىش جەمىستەرىندە كارانتيندىك باقىلاۋ جۇرگىزۋ كەزىندە قىزاناق جەمىستەرىنىڭ قوڭىر قاتپارلى ۆيرۋسى انىقتالدى، 17 جاعدايدا ازەربايجاننان كەلگەن ونىمدە جانە 19 جاعدايدا تۇرىكمەنستاننان كەلگەن ونىمدە. وسىعان بايلانىستى ازەربايجان مەن تۇرىكمەنستان اۋماعىنان قىزاناق اكەلۋگە ۋاقىتشا تىيىم سالىنىپ، كارانتيندىك فيتوسانيتاريالىق ءىس-شارالار ەنگىزىلدى»، - دەدى ول.

كوميتەت باسشىسىنىڭ ايتۋىنشا، بيىلعى ءساۋىر ايىندا كارانتيندىك فيتوسانيتاريالىق باقىلاۋدى جۇزەگە اسىرۋ كەزىندە گەرمانيادان، نيدەرلاندىدان 228 توننا تۇقىمدىق كارتوپتان، سونداي-اق كارتوپتىڭ «زەبرا چيپ» كارانتيندىك وبەكتىسىمەن زالالدانعان فرانسيادان 46,4 كيلوگرام ءسابىز تۇقىمىن اكەلۋ توقتاتىلدى. باكتەريالار زەرتحانا ساراپتاماسىنىڭ قورىتىندىسىمەن راستالدى.

«جوعارىدا كورسەتىلگەن «زەبرا چيپ» كارانتيندىك وبەكتىسىن انىقتاۋ فاكتىلەرى بويىنشا ءتيىستى كارانتيندىك قۇجاتتار رەسىمدەلدى.

وسىمدىكتەر كارانتينى سالاسىنداعى زاڭنامانى بۇزۋعا قاتىستى اكىمشىلىك ماتەريالدار سوت قاراۋىنا جىبەرىلدى. سوت قاۋلىسىندا كارانتينگە جاتقىزىلعان ءونىمنىڭ زالالدانعان پارتياسىن تاركىلەۋ جانە جۇك يەلەرىنە اكىمشىلىك ايىپپۇل سالۋ تۇرىندە ءتيىستى شارالار قابىلداندى»، - دەدى ول.

بۇدان بۇرىن حابارلانعانداي، بيىل ءۇيىرلى شەگىرتكە ەلىمىزدەگى 640,8 مىڭ گەكتار جەرگە تارالدى.

Up