Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

گەرمانيادا اباي قۇنانباي ۇلىنا ەسكەرتكىش اشىلدى

24 October 2021 08:54

نۇر-سۇلتان. قازاقپارات - قازاقستان رەسپۋبليكاسى تاۋەلسىزدىگىنىڭ 30 جىلدىعى اياسىندا گەرمانيا فەدەراتيۆتىك رەسپۋبليكاسىنىڭ استاناسى بەرلين قالاسىندا، ەلىمىزدىڭ ۇلى اقىنى، اعارتۋشى، قازاق جازبا ادەبيەتىنىڭ، قازاق ادەبي ءتىلىنىڭ نەگىزىن قالاۋشى اباي قۇنانباي ۇلىنا ارنالعان ەسكەرتكىشتىڭ رەسمي اشىلۋ سالتاناتى ءوتتى.

ەسكەرتكىشتىڭ اشىلۋ راسىمىنە مادەنيەت جانە سپورت ءمينيسترى اقتوتى رايىمقۇلوۆا مەن قازاقستان رەسپۋبليكاسىنىڭ گەرمانياداعى توتەنشە جانە وكىلەتتى ەلشىسى داۋرەن كارىپوۆ قاتىستى، دەپ حابارلايدى قازاقپارات ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

اقتوتى رايىمقۇلوۆا گەرمانيا حالقى مەن ۇكىمەتىنە ەلىمىزدىڭ ابايعا ەسكەرتكىش ورناتۋ جونىندەگى ۇسىنىسىن قولداپ، دەمەۋ كورسەتكەنى ءۇشىن العىس ءبىلدىردى.

«بىلتىر ءبىز الەمدىك دەڭگەيدەگى ويشىل، ۇلى اقىن، قازاق جازبا ادەبيەتىنىڭ نەگىزىن قالاۋشىلاردىڭ ءبىرى - اباي قۇنانباي ۇلىنىڭ 175 جىلدىق مەرەيتويىن اتاپ وتتىك. مەرەيتوي اياسىندا سينگاپۋردا، بولگاريادا، ماجارستاندا، بىرىككەن اراب امىرلىكتەرىندە، پاكستاندا، ەفيوپيادا، چەحيادا اباي ورتالىعى وقىرمانعا ەسىگىن ايقارا اشتى. سونىمەن قاتار ماجارستان، وڭتۇستىك كورەيا رەسپۋبليكاسى، فرانسيا، تۇركيا، وزبەكستان، مىسىر، رەسەي فەدەراتسياسى جانە باسقا ەلدەردە اباي ەسكەرتكىشى اشىلدى.

اباي شىعارماشىلىعى قازاق حالقى مەن وزگە ۇلتتار مادەنيەتى اراسىنداعى دانەكەر. اباي قازاق حالقىنىڭ عانا تۇلعاسى ەمەس. ونىڭ جالپى ادامي قۇندىلىقتاردى ناسيحاتتايتىن شىعارماشىلىعى ادامزاتقا ورتاق، ءارى الەمدىك ادەبيەتتىڭ اجىراماس بولىگىنە اينالدى. اباي قۇنانباي ۇلى مەن گەرمانيا حالقىنىڭ ۇلى اقىنى گەتە پوەزياسى اراسىندا تاڭعالارلىق ۇندەستىكتى بايقاماۋ مۇمكىن ەمەس. اباي اۋدارماسىنىڭ ارقاسىندا ءبىز يوگانن گەتەنىڭ ءبىرشاما تۋىندىسىمەن ەتەنە تانىستىق. سونىڭ ءبىرى، ءارى بىرەگەيى حاكىم انا تىلىمىزدە سويلەتكەن «قاراڭعى تۇندە تاۋ قالعىپ» ولەڭى.

وسىلايشا، اباي ەكى حالىقتىڭ ادەبيەتى مەن مادەنيەتىن بايلانىستىرۋشى بەرىك كوپىرگە اينالدى. اباي مەن گەتە سەكىلدى ادامزاتتىڭ اسىل ۇلدارىن ارداقتاۋ، ولاردىڭ مۇراسىن، ەسىمىن اسقاقتاتۋ - ءسىز بەن ءبىزدىڭ پارىزىمىز. بۇگىن مازمۇندى مەيماندوستىق داستۇردە ءوتىپ جاتقان ءىس-شارا جوعارىدا ايتىپ وتكەن رۋحاني بايلانىستى نىعايتا بەرەرىنە سەنىمىم مول»، - دەدى مادەنيەت جانە سپورت ءمينيسترى.

ايتا كەتەيىك، اباي قۇنانباي ۇلى ءمۇسىنىنىڭ اۆتورى «الەم حالىقتارىنىڭ ونەرى» حالىقارالىق اسسوتسياتسياسىنىڭ لاۋرەاتى بولات مەكەبايەۆ.

Up