Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قار بارىسىن ساقتايىق: ەلوردادا ەكولوگيالىق اكسيا ءوتتى

22 October 2021 22:15

نۇر-سۇلتان. قازاقپارات - نۇر-سۇلتان قالاسىندا ەل كولەمىندە سيرەك كەزدەسەتىن جانە جويىلىپ بارا جاتقان قار بارىسىن قورعاۋ پروبلەماسىنا نازار اۋدارۋعا ارنالعان «قار بارىسىن ساقتايىق» اتتى اكسيا ۇيىمداستىرىلدى، دەپ حابارلايدى قازاقپارات ءتىلشىسى.

اتالعان شارا 23- قازان - حالىقارالىق قار بارىسى كۇنى قارساڭىندا ۇيىمدىستىرىلىپ وتىر.

«سوڭعى 100 جىلدا قازاقستاندا قار بارىسىنىڭ مەكەندەۋ ايماعى ءۇش ەسەگە قىسقاردى. بۇگىندە اتالعان جانۋاردىڭ مەكەندەيتىن اۋماعى 20 مىڭ شارشى مەتردەن ءسال عانا اسادى. وسى ورايدا قازاقستانداعى ب ۇ ۇ دامۋ باعدارلاماسى قار بارىسىن ساقتاپ، قورعاۋ جانە ونى زەرتتەۋ ءۇشىن سەرىكتەستەر ۇيىمدارمەن ءوزارا بىرلەسىپ جۇمىس ىستەپ جاتىر. بۇگىنگى كۇنى جەتىسۋ-الاتاۋ اۋدانىنداعى شولاق، دەگەرەس، ماتاي تاۋلارىندا سيرەك كەزدەسەتىن جىرتقىشتىڭ مەكەندەيتىنىن راستاۋ مۇمكىندىگى تۋدى. اتالعان وڭىرلەردە بارىستى العاش رەت فوتوتۇزاق ءتۇسىرىپ الدى»، - دەدى ب ۇ ۇ دامۋ باعدارلاماسى ۇيىمىنىڭ قازاقستانداعى تۇراقتى وكىلى ياكۋپ بەريش اكسيا بارىسىندا.




ونىڭ ايتۋىنشا، بۇگىندە ەلىمىزدە قار بارىسىنىڭ پوپۋلياتسياسىن قورعاۋ جانە ساقتاپ قالۋعا ارنالعان بىرنەشە جوبا قولعا الىندى.

«جوبا شەڭبەرىندە قار بارىسىنا قاتىستى دالالىق زەرتتەۋلەر، براكونەرلىككە قارسى كۇرەس، ەرەكشە قورعالاتىن تابيعي اۋماقتار جەلىسىن قۇرۋ كوزدەلىپ وتىر. سونداي-اق، ادامداردىڭ ەكولوگيالىق ساۋاتتىلىعىن ارتتىرۋمەن قاتار، قازاقستاننىڭ تابيعاتتى قورعاۋ زاڭناماسىن جەتىلدىرۋ جونىندەگى ءىس-شارالار جۇرگىزىلىپ جاتىر»، - دەيدى ول.




«قار بارىسىن ساقتايىق» اكسياسى «بارىس ارەنا» مۇز سارايىندا «بارىس» پەن «لوكوموتيۆ» حوككەي كلۋبى اراسىنداعى ماتچ كەزىندە ۇيىمداستىرىلىپ وتىر. ويىندى تاماشالاۋشىلاردىڭ نازارىنا قار بارىسىنا ارنالعان فوتوكورمە ۇسىنىلىپ، كەلۋشىلەر اراسىندا ۇتىس ويىندار مەن بالالارعا ارنالعان اكۆاگريم شوۋ ءوتتى.




ايتا كەتەيىك، اتالعان شارا ب ۇ ۇ دامۋ باعدارلاماسىنىڭ ۇيىتقى بولۋىمەن ءوتىپ وتىر.



















Keywords: قوعام,
Up