Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

ءۇي ورتەنگەندە كىشكەنتاي اەروزولدىڭ ءوزى ۇلكەن قاۋىپ تۋدىرادى -  ءورت سوندىرۋشىمەن سۇحبات

18 October 2021 14:25

پەتروپاۆل. قازاقپارات - 19-قازان - قۇتقارۋشىلار كۇنى. كۇندەلىكتى قىزمەتتەرىندە ولىممەن بەتپە- بەت كەلىپ، باسقالاردىڭ ءومىرىن قۇتقارۋ ءۇشىن ءوز باسىن قاتەرگە تىگەتىن وسى ءبىر ماماندىق يەلەرى قانداي دا قۇرمەتكە لايىق.

مەرەكە قارساڭىندا قازاقپارات ءتىلشىسى پەتروپاۆلداعى № 1-مامانداندىرىلعان ءورت ءسوندىرۋ ءبولىمىنىڭ ءورت ءسوندىرۋ كولىكتەرىن جۇرگىزۋدەن اعا نۇسقاۋشى مۇرات جۇنىسوۆپەن سۇحباتتاسقان ەدى.

بۇل ماماندىققا قالاي كەلدىڭىز، ءورت ءسوندىرۋشى بولعانىڭىزعا وكىنگەن كەزىڭىز بار ما؟

بۇل سالاعا 2004 -جىلى كەلدىم. شىنىمدى ايتايىن، ءورت ءسوندىرۋشى بولسام ەكەن دەپ ارمانداعان ەمەسپىن. تاعدىر شىعار. ورنالاستىم، بىردەن كىرىسىپ كەتتىم، كوڭىلىمنەن شىقتى. قازىر ءوزىمدى باسقا قىزمەتتە ەلەستەتە المايمىن. ءيا، قيىن ماماندىق. جانىمىزدى شۇبەرەككە ءتۇيىپ جۇرەمىز. الايدا ەش ۋاقىتتا وكىنگەن ەمەسپىن. ادامدارعا كومەكتەسۋ، ولاردى قۇتقارۋ كەرەمەت ەمەس پە؟ ! ال اتقارعان جۇمىسىڭ ءۇشىن ەلدىڭ ىستىق ىقىلاسىنا بولەنىپ، العىس الىپ جاتساڭ ونىڭ ءوزى ءبىر باقىت.

ەڭ ءبىرىنشى شاقىرتۋعا بارعانىڭىز ەسىڭىزدە مە؟

ارينە ەسىمدە. قالانىڭ شەتكەرى جاعىندا جەكە تۇرعىن ءۇي ورتەندى. مەنىڭ باسقارۋىمدا «زيل» كولىگى بولدى. ەكىنشى كەزەكپەن باردىق. العاش رەت ءورت بولىپ جاتقان جەرگە كەلىپ، ارىپتەستەرىمنىڭ قىزىل جالىنمەن ارپالاسۋ ءساتىن كورىپ، ولارعا دەگەن قۇرمەتىم ەسەلەندى. سول كەزدە ەڭبەك ەتكەن جىگىتتەر ماعان كوپ كومەكتەستى، نۇسقاپ، كورسەتىپ وتىردى.

ءورت ءسوندىرۋشى - قاۋىپ-قاتەرگە تولى ماماندىق. باتىلدىقتى تالاپ ەتەدى، دەگەنمەن قاتتى قورىققان كەزىڭىز بولدى ما؟

بيىل وسى سالادا ەڭبەك ەتىپ جۇرگەنىمە 17 جىل. ءار شاقىرتۋعا شىققان سايىن قاۋىپتەنەسىڭ، ويتكەنى ءورت - ءتىلسىز جاۋ، ءتۇرلى جاعداي بولۋى مۇمكىن. جالپى كەز- كەلگەن ادامدا قورقىنىش سەزىمى بولادى، ول قالىپتى جاعداي. ال «ولگەن جەرىم وسى شىعار» دەپ قاتتى قورىققان كەزىم ەكى- ءۇش رەت بولدى. ءبىر جولى جابىق تۇرعان گاراجدا اۆتوبۋس ورتەندى. نىساننىڭ ءىشى كوك ءتۇتىن بولدى.

ءورت ءسوندىرۋشى جىگىتتەر قورعانىش اپپاراتىن كيەدى، ال مەن جۇرگىزۋشىمىن. سول جولى تۇتىنگە تۇنشىعىپ، قاتتى قينالدىم. تاعى بىردە ءۇي ورتەندى. جۇرگىزۋشىلەردىڭ فۋنكتسيونالدىق مىندەتى - ماشينانى باسقا كولىكتەرگە كەدەرگى جاسامايتىنداي دۇرىس قويۋ. بارعان كەزدە جەل قاي جاقتان سوعىپ تۇر، سونىڭ ءبارىن ەسكەرۋىمىز كەرەك. سول ورتتە جەلدىڭ باعىتى كۇرت وزگەرىپ، جالىن مەن ءتۇتىن مەنىڭ ماشيناما قاراي اۋىستى. سوندا قاتتى قورىققانىم ەسىمدە. قازىر بارىنە ۇيرەندىك. وپىق جەمەۋ ءۇشىن ءار قادامدى ابايلاپ باسۋ قاجەت. ارەكەت ەتپەس بۇرىن بۇكىل تاۋەكەلدى جەدەل تۇردە وي ەلەگىنەن وتكىزەسىڭ.





قانداي ءورتتى سوندىرگەن قيىن؟

بەنزين، گاز سياقتى جارىلعىش زاتتارى بار نىسانداردى ءسوندىرۋ قيىن. ول مىندەتتى تۇردە گاز باللونى بولماۋى دا مۇمكىن، ماسەلەن تۇرعىن ۇيلەردە ءتۇرلى اەروزولدار، قاتتى قىزعاننان جارىلىپ، قاۋىپ تۋدىرادى. كوپ قاباتتى تۇرعىن ۇيدە ءورت شىقسا، وعان جىلدام جەتۋ قيامەت- قايىم. كوشەلەردە كەي جۇرگىزۋشىلەر جول بەرمەسە، اۋلادا تۇرعىنداردىڭ كولىكتەرىن قويىپ تاستاعاننان ءورت شىققان جەرگە جەتە الماي قينالامىز. ءبىزدىڭ جۇمىستا مينۋت ەمەس، ءار سەكۋند قىمبات. قازىر مەن ساتىسى بار كولىكپەن جۇرەمىن. جوعارى قاباتتاعى ادامداردى قۇتقارۋ ءۇشىن كەيدە ماشينانى قويۋ مۇمكىن بولماي جاتادى. مۇندايدا كومەككە پوليتسەيلەر كەلەدى.

ءبىر تاۋلىكتە نەشە رەت ءورت سوندىرۋگە شىعاسىزدار ورتا ەسەپپەن؟

كەيدە كەزەكشىلىكتە 4-5 ءورتتى سوندىرۋگە شىعاتىن كەزدەرىمىز بولادى. كەيدە ءۇشىنشى شاقىرىستى ءبىر ءورتتىڭ ءوزى جەتىپ بولادى. ۇلكەن ورتتەر بولسا ۇيدە دەمالىپ جاتقان قىزمەتكەرلەردىڭ بارلىعى شاقىرىلادى. ءورت كوپ جاعدايدا وتتى ابايسىز قولدانۋدان، تەحنيكا قاۋىپسىزدىگىن ساقتاماۋدان شىعادى. ءبىزدىڭ ەڭ باستى مىندەتىمىز ءورتتىڭ الدىن الۋ، ونىمەن كۇرەستە تاجىريبەمىزدى شىڭداۋ.

زەينەت دەمالىسىنا شىققان ءورت سوندىرۋشىگە ءورت ءسوندىرۋ كولىگىنەن سۋ قۇياتىنىن بىلەمىز. بۇل قايدان شىققان، نەنى بىلدىرەدى؟ ءورت سوندىرۋشىلەردىڭ ءوز اراسىندا تاعى قانداي سالت- جورالارى بار؟

يا، زەينەت دەمالىسىنا شىققان ءورت ءسوندىرۋشىنىڭ ۇستىنە سالتاناتتى تۇردە ءورت ءسوندىرۋ كولىگىنەن سۋ قۇيادى. سونداي- اق ماشينالاردىڭ سيرەناسىن قوسىپ قۇرمەتپەن شىعارىپ سالامىز. ال جاڭا كەلگەن جاس ماماندى ۇستىنە وقىستان شەلەكپەن نەمەسە كولىكتەن سۋىق سۋ قۇيىپ ۇجىمعا قابىلدايمىز. وسىلايشا ونىڭ سترەستى جاعدايدا، كەيدە ءۇستى مالمانداي سۋ بولىپ جۇمىس ىستەيتىنىن بىلدىرەمىز. نەگىزى ءورت سوندىرۋشىلەر اراسىندا ءتۇرلى جورالار كوپ. ماسەلەن، ءورت ءسوندىرۋ كولىگىنە ايەل ادامدى مىنگىزبەيدى. كەزەكشىلىككە جاڭا كيىم كيىپ نەمەسە تازا اياق كيىممەن تۇسۋگە بولمايدى. سول كۇنى كوپ ءورت بولادى دەگەن سەنىم بار. ءورت ءسوندىرىپ كەلگەننەن كەيىن بىردەن باستى جۋۋعا بولمايدى. سول سياقتى كەزەكشىلىكتە ءورت ءسوندىرۋ كولىگىن، كاسكانى جۋماۋعا، جارقىلداۋىقتى سۇرتپەۋگە تىرىسامىز. قيىن ءورت بولادى دەگەن سەنىم بار.

وتباسىڭىز جايىندا ايتىپ بەرسەڭىز. بالالارىڭىز ءسىزدىڭ جولىڭىزدى قۋىپ، ءورت ءسوندىرۋشى بولامىن دەسە قارسى بولمايسىز با؟

زايىبىمنىڭ نەگىزگى ماماندىعى - مۇعالىمدىك، ءبىراق قازىر قىزمەت كورسەتۋ سالاسىندا ەڭبەك ەتەدى. ۇلىم، قىزىم بار. ولاردىڭ ەكەۋى دە مەنىڭ جولىمدى قۋعان جوق. ءبىراق بارامىز دەسە - قارسى بولماس ەدىم. ويتكەنى ءورت ءسوندىرۋشى - ابىرويلى، ناعىز ەلگە كەرەك ماماندىق. قىزىم اگرارلىق سالانى تاڭدادى، ۇلىم ءالى ۋنيۆەرسيتەتتە وقىپ جاتىر.

راحمەت!








اۆتور: اقەركە داۋرەنبەك قىزى

Keywords: قوعام,
Up