Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قازاقستاندا قاي ماماندىقتاردى بىتىرگەندەر ەڭ جوعارى جالاقى الادى

8 October 2021 12:39

نۇر-سۇلتان. قازاقپارات- قازاقستاندا ەڭ كوپ جالاقىنى «اسكەري ءىس جانە قاۋىپسىزدىك» سالاسى بويىنشا وقۋدى اياقتاعان تۇلەكتەر الادى.

سونداي-اق ماگيستراتۋرا تۇلەكتەرى باكالاۆريات تۇلەكتەرىنەن ورتا ەسەپپەن %35 عا كوپ تابىس تاباتىنى انىقتالدى.

زەرتتەۋلەر ءبىلىم جانە عىلىم مينيسترلىگىنىڭ 2017 -جىلعى 120 مىڭ تۇلەك تۋرالى اقپاراتى نەگىزىندە جۇرگىزىلدى. ول 2018 -جىلى ۋنيۆەرسيتەتتەردىڭ رەيتينگتەرىن جاساۋ ءۇشىن، سونداي- اق ولاردىڭ تالدانىپ وتىرعان كەزەڭدەگى زەينەتاقى جارنالارىن ەسكەرە وتىرىپ جاسالىندى.

باكالاۆرلار اراسىنداعى دايارلاۋ باعىتتارى بويىنشا ەڭ كوپ جالاقى «اسكەري ءىس جانە قاۋىپسىزدىك» سالاسى بويىنشا وقۋدى اياقتاعاندار اراسىندا بولدى. ولاردىڭ جالاقىسى 2020 -جىلى ورتا ەسەپپەن 268,5 مىڭ تەڭگەنى قۇرادى.

بۇدان باسقا، «دەنساۋلىق ساقتاۋ جانە الەۋمەتتىك قامتاماسىز ەتۋ (مەديتسينا) « باعىتى بويىنشا تۇلەكتەردىڭ جالاقىسى سالىستىرمالى تۇردە جوعارى - 207,9 مىڭ تەڭگە، سونداي-اق «تەحنيكالىق عىلىمدار مەن تەحنولوگيالار» باعىتى بويىنشا - 200,9 مىڭ تەڭگە. ەڭ تومەنگى جالاقى «ۆەتەريناريا» تۇلەكتەرىنىڭ اراسىندا - 129,6 مىڭ تەڭگە، سونداي- اق «اۋىل شارۋاشىلىعى عىلىمدارى» - 130,6 مىڭ تەڭگەنى قۇرادى.

باكالاۆريات تۇلەكتەرىنىڭ اراسىندا ناقتى ماماندىقتار بويىنشا ەڭ جوعارى جالاقىنى «ۇشۋ اپپاراتتارى مەن قوزعالتقىشتارىن ۇشۋدا پايدالانۋ» باعىتىن بىتىرگەن تۇلەكتەر الادى - 1 ميلليون تەڭگەدەن استام.

سونىمەن قاتار «مۇناي- گاز ءىسى» (338,4 مىڭ تەڭگە)، «تەڭىز تەحنيكاسى جانە تەحنولوگيالارى» (298,7 مىڭ)، «تاۋ-كەن ءىسى» (276,1 مىڭ)، «گەولوگيا جانە پايدالى قازبالار كەن ورىندارىن بارلاۋ» (257,4 مىڭ)، «اقپاراتتىق تەحنولوگيالار جۇيەسى» (268,5 مىڭ) ماماندىقتارى بار.

ماگيسترلەرگە كەلەتىن بولساق، ەڭ جوعارى جالاقىنى - «ىسكەرلىك اكىمشىلىك» (614,8 مىڭ تەڭگە)، «قوعاممەن بايلانىس» (500,7 مىڭ تەڭگە)، «تاۋ-كەن ءىسى» (391,6 مىڭ)، «مۇناي-گاز ءىسى» (386 مىڭ تەڭگە)، «ەسەپتەۋ تەحنيكاسى جانە باعدارلامالىق قامتاماسىز ەتۋ» (374,7 مىڭ تەڭگە) سالالارى بويىنشا بىتىرگەندەر الادى.

ۋنيۆەرسيتەتتەر اراسىندا الماتى قالاسىنداعى ق ب ت ۋ (415,6 مىڭ تەڭگە)، ك ي م ە پ (380,4 مىڭ تەڭگە)، ازاماتتىق اۆياتسيا اكادەمياسى (347,6 مىڭ تەڭگە)، ح ا ت ۋ (327,8 مىڭ تەڭگە)، سونداي- اق نۇر-سۇلتان قالاسىنىڭ قارجى اكادەمياسىنىڭ (325,4 مىڭ تەڭگە) تۇلەكتەرى جالاقى دەڭگەيى بويىنشا كوشباسشى بولىپ تۇر.

«تۇلەكتەردىڭ جالپى سانىنان 105,4 مىڭ ادام باكالاۆرياتتى، ونىڭ ىشىندە 77,5 مىڭى - كۇندىزگى وقۋ نىسانىن، 13,8 مىڭى - ماگيستراتۋرانى، 858 ادام - رەزيدەنتۋرانى جانە دوكتورانتۋرانى اياقتادى. اعىمداعى جىلدىڭ تامىز ايىنداعى جاعداي بويىنشا تۇلەكتەردىڭ جالپى سانىنان 286 ادام كوز جۇمدى، ال 773 ى قازاقستاننان كەتكەن»، - دەيدى دەپارتامەنت ديرەكتورى دميتري شۋمەكوۆ.

ول وقۋشىلاردىڭ كوپشىلىگى ءبىتىرۋ كەزىندە جۇمىس ىستەپ ۇلگەرگەنىن اتاپ ءوتتى.

ماسەلەن، 2016 -جىلى باكالاۆرياتتى ءبىتىرۋى كەرەك تۇلەكتەردىڭ 44,3 مىڭىندا (%42) زەينەتاقى جارنالارى بولعان. ال ماگيسترلەر اراسىندا 8,8 مىڭ ادامدا (%63,8) اۋدارىمدار بولدى.

«وسىلايشا، 53,7 مىڭ ادامدا (%44,8) وقۋ اياقتالاردان ءبىر جىل بۇرىن رەسمي جۇمىس تاجىريبەسى بولدى. 2017 -جىلى بۇل سان 78,4 مىڭ ادامعا (%65,3)، ال 2018 -جىلى 87,8 مىڭ ادامعا (%73) دەيىن ءوستى. 2017-2020 -جىلدارى 104,9 مىڭ ادامدا نەمەسە تۇلەكتەردىڭ %87 ىندا وقۋ اياقتالعاننان كەيىن كەمىندە ءبىر رەت رەسمي زەينەتاقى اۋدارىمدارى بولعان»، - دەدى دميتري شۋمەكوۆ.

ماسەلەن، 2017 -جىلعى تۇلەكتەردىڭ سەنزۋرالانعان ىرىكتەمەسىنىڭ زەينەتاقى اۋدارىمدارىنا جۇرگىزىلگەن تالداۋ (جىلدىق ورتاشا جالاقى ەسەبىنەن ەڭ جوعارى جانە ەڭ تومەنگى كولەمى بار تۇلەكتەردىڭ %5 ى الىپ تاستالدى) جالاقىنىڭ ەڭ جوعارى ءوسىمى PhD دوكتورانتۋراسىن اياقتاعان تۇلەكتەردە ەكەنىن كورسەتتى. 2017 -جىلدان باستاپ 2020 -جىلعا دەيىنگى كەزەڭدە ونىڭ ءمانى 2,5 ەسە ءوستى.

سىرتتاي وقيتىن باكالاۆريات تۇلەكتەرىنىڭ ورتاشا جالاقىسى 1,7 ەسەگە ءوستى، ال كۇندىزگى وقۋ ءتۇرىن اياقتاعان باكالاۆرلار ءۇشىن ول 2 ەسەگە ءوستى، ال ماگيسترلەردىڭ جالاقىسى 1,8 ەسە ءوستى.

ابسوليۋتتى ماندەردە 2020 -جىلى دوكتورانتۋرا بىتىرۋشىلەردىڭ ورتاشا تابىسى 330,3 مىڭ تەڭگەنى، كۇندىزگى وقۋ نىسانىندا ماگيستراتۋرانى اياقتاعانداردىكى- 227,7 مىڭ تەڭگەنى جانە سىرتتاي وقۋدى اياقتاعانداردىكى - 579,3 مىڭ تەڭگەنى، باكالاۆرياتتا - 165,1 مىڭ تەڭگەنى جانە سىرتتاي وقيتىنداردا - 187,9 مىڭ تەڭگەنى قۇرادى.

«وسىلايشا، وقۋدى اياقتاعاننان كەيىن ءۇش جىل وتكەن سوڭ ماگيسترلەردىڭ جالاقىسى كۇندىزگى جانە سىرتتاي وقۋ نىسانىنا بولىنبەستەن ورتا ەسەپپەن 230,5 مىڭ تەڭگەنى قۇرايدى، بۇل باكالاۆريات تۇلەكتەرى اراسىنداعى ۇقساس كورسەتكىشتەن %35 عا جوعارى. دوكتورانتۋرا تۇلەكتەرىنىڭ جالاقىسى 336,5 مىڭ تەڭگەنى قۇرايدى. بۇل باكالاۆرلارعا قاراعاندا %97 عا (170,8 مىڭ تەڭگە) جانە ماگيسترلەرگە قاراعاندا %46 عا جوعارى»، - دەپ حابارلادى تالداۋشى.


Up