Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قاسىم-جومارت توقايەۆ يران يسلام رەسپۋبليكاسىنىڭ پرەزيدەنتىمەن كەزدەستى

17 September 2021 11:50

دۋشانبە. قازاقپارات - كەزدەسۋ بارىسىندا قازاقستان پرەزيدەنتى قاسىم-جومارت توقايەۆ يبراحيم ءرايسيدى جاقىندا وتكەن پرەزيدەنت سايلاۋىنداعى جەڭىسىمەن قۇتتىقتاپ، ەكى ەل اراسىنداعى بايلانىستاردى جوعارى باعالادى، دەپ حابارلايدى اقوردانىڭ باسپا ءسوز قىزمەتى.

- بۇل - ءبىزدىڭ العاشقى كەزدەسۋىمىز. وسى جۇزدەسۋ ءبىزدىڭ ەلدەرىمىزدىڭ اراسىنداعى قارىم- قاتىناستارعا جاڭا سەرپىن بەرەتىنىنە سەنىمدىمىن. يران - ءبىزدىڭ كاسپيي وڭىرىندەگى تاتۋ كورشىمىز جانە يسلام الەمىندەگى جاقىن سەرىكتەسىمىز. ديپلوماتيالىق قارىم- قاتىناس ورناعاننان بەرى مەملەكەتتەرىمىز اراسىنداعى ىنتىماقتاستىق تۇراقتى تۇردە ارتىپ كەلەدى، - دەدى مەملەكەت باسشىسى.








ءوز كەزەگىندە يبراحيم رايسي سايلاۋداعى جەڭىسىمەن قۇتتىقتاعانى جانە ۇلىقتاۋ راسىمىنە ارنايى دەلەگاتسيا جىبەرگەنى ءۇشىن قاسىم-جومارت توقايەۆقا ريزاشىلىعىن ءبىلدىردى.

- يران مەن قازاقستاننىڭ ءوزارا ىنتىماقتاستىعى جان-جاقتى قالىپتاسقان. ارينە، الەۋەتى جوعارى بايلانىستارىمىزدى ودان ءارى كەڭەيتۋگە مول مۇمكىندىك بار. ءبىزدىڭ بۇگىنگى كەزدەسۋىمىز وسى ىقپالداستىقتىڭ باستاۋى بولارىنا سەنەمىن، - دەدى يران پرەزيدەنتى.





سونىمەن قاتار كەزدەسۋدە تاراپتار بيىل ساۋدا- ەكونوميكا باعىتىندا وڭ ۇردىستەر بايقالعانىن اتاپ ءوتىپ، ەكى ەل اراسىنداعى ساۋدا- ساتتىقتى ودان ءارى ارتتىرۋعا جانە كولىك- لوگيستيكا، اۋىل شارۋاشىلىعى، ينۆەستيتسيا سالالارى بويىنشا ىنتىماقتاستىقتى نىعايتۋعا دايىن ەكەنىن ايتتى. كەزدەسۋ سوڭىندا مەملەكەتتەر باسشىلارى ءوزارا ساپار الماسۋعا كەلىستى.


Up