Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

باتىس قازاقستاندا كيىكتەر جول سالۋشىلار قازعان ترانشەياعا ءتۇسىپ كەتتى

16 September 2021 18:51

ورال. قازاقپارات - باتىس قازاقستان وبلىسىندا كيىكتەر جول سالۋشىلار قازعان ترانشەياعا ءتۇسىپ كەتتى، دەپ حابارلايدى قازاقپارات ءتىلشىسى.

ب ق و ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنان تۇسكەن مالىمەتكە قاراعاندا، وقيعا جانىبەك اۋدانى اۋماعىندا بولدى. 14- قىركۇيەك كۇنى شامامەن ساعات 10.00-دە «WhatsApp» جەلىسى بويىنشا ينسپەكسيا قىزمەتكەرىنە ۆيدەوتۇسىرىلىم كەلىپ تۇسكەن. وندا شامامەن 12-15 باس كيىكتىڭ (نەگىزىنەن تەكەلەرى) تەرەڭدىگى 2,5-3 مەتر، ۇزىندىعى 700-800 مەتر ترانشەيادا جۇرگەنى بەينەلەنگەن.

جانىبەك اۋدانىنا ينسپەكسيا قىزمەتكەرى شۇعىل اتتانىپ، «وحوتزووپروم» ءو ب» ر م ق ك باتىس قازاقستان ايماقتىق فيليالىنىڭ ينسپەكتورلارىمەن بىرلەسىپ، وقيعانى انىقتادى. ۆيدەونى 11-12- قىركۇيەك كۇندەرى كازتالوۆ- جانىبەك اۆتوجولى بويىندا قۇرىلىس- جوندەۋ جۇمىستارىن جۇرگىزىپ جاتقان «تەمىرجول جوندەۋ» - «سپەتسسترويمونتاج» ج ش س فيليالىنىڭ قىزمەتكەرلەرى تۇسىرگەن. كيىكتەر اتالعان جولدى كەسىپ وتكەن كەزدە قورشاۋدىڭ جوقتىعىنان ترانشەياعا ءتۇسىپ كەتىپ، شىعا الماعان. سودان كەيىن ارنايى تەحنيكانىڭ كومەگىمەن توپىراق سەبىلىپ، اق بوكەندەر بوساتىلعان.

«اتالعان اۋماق باتىس قازاقستان وبلىسىنداعى كيىكتەردىڭ كوشىپ- قونىپ جۇرەتىن جەرى بولىپ ەسەپتەلەدى. سوندىقتان «تەمىرجول جوندەۋ» - «سپەتسسترويمونتاج» جشس فيليالى باسشىلىعىنا الداعى ۋاقىتتا مۇنداي جاعدايعا جول بەرمەۋ قاجەتتىگى ەسكەرتىلدى»، دەپ حابارلادى قازاقپارات تىلشىسىنە ب ق و ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى.

«تەمىرجول جوندەۋ - «سپەتسسترويمونتاج» ج ش س فيليالىنىڭ قىزمەتكەرلەرى اتالعان وقيعادان كيىكتەرگە زالال كەلمەگەنىن، ارنايى تەحنيكانىڭ كومەگىمەن شىعارىپ جىبەرگەنىن راستادى.

ەسكە سالا كەتەيىك، بۇدان بۇرىن ب ق و- دا جاپپاي قىرىلعان 380-گە جۋىق كيىكتىڭ انىقتالعانىن جازعان بولاتىنبىز.

اۆتور: ەلجان ەرالى

Keywords: ايماق,
Up